នៅរសៀលថ្ងៃទី ១២ ខែមីនាឆ្នាំ២០១៤ ឯ.ឧ ឃឹម ប៊ុនសុង អភិបាលនៃគណៈអភិបាលខេត្តសៀមរាប បានអនុញ្ញាតឲ្យលោក ជេហ្វហ្វ្រី សាសស្មេន នាយកគ្រប់គ្រងទូទៅសណ្ឋាគារអង្គរ ខេត្តសៀមរាប ចូលជួបពិភាក្សាការងារមួយចំនួន ក្នុងការអភិវឌ្ឍន៍សោភណ្ឌភាព បរិស្ថាន អនាម័យ
ក្រុងប្រវត្តិសាស្ត្រខេត្តសៀមរាប នៅសណ្ឋាគារបូរីអង្គរខេត្តសៀមរាប ។
មានប្រសាសន៍នោះដែរលោក ជេហ្វហ្វ្រី សាសស្មេន នាយកគ្រប់គ្រងទូទៅសណ្ឋាគារអង្គរ ក៏បានបញ្ជាក់ ពីគោលបំណងរបស់លោក ក្នុងការចូលរួមជាមួយអាជ្ញាធរខេត្តសៀមរាប ដើម្បីធ្វើការរៀបចំនូវសោភណ្ឌភាពក្រុង ទាំង បរិស្ថាន អនាម័យ ក្នុងការជម្រុញឲ្យក្រុងប្រវត្តិសាស្ត្រមួយនេះ មានការប្រែមុខមាត់កាន់តែស្រស់បំព្រោង លម្អទៅ ដោយព័ណ៌បៃតង ដើម្បីទាក់ទាញនូវភ្ញៀវទេសចរណ៍គ្រប់ជាតិសាសន៍ ចូលមកស្នាក់នៅទស្សនាកម្សាន្ត ប្រកបទៅ ដោយបរិយាកាសបរិសុទ្ធ ។ លោកក៏បានបន្តទៀតថា គម្រោងរបស់សណ្ឋាគារនឹងចូលរួមធ្វើការដាំដើមឈើ នៅតាម អមសង្ខាងផ្លូវដែល ខេត្តបានធ្វើការពង្រីក ចាប់ពីមុខសណ្ឋាគារសុខាអង្គរ ទៅដល់ស្តុបភោជនីយដ្ឋានទន្លេសាប ។ ក្នុងនោះដែរលោកក៏បានបញ្ជាក់ទៀតថា នឹងធ្វើការចូលរួម គាំទ្រ ពីការរៀបចំធ្វើអង្គរសង្ក្រាន្តឆ្នាំ២០១៤ នៅលើទឹកដី សៀមរាបអង្គរ ព្រមទាំងនឹងចូលរួមធ្វើការផ្សព្វផ្សាយដល់ភ្ញៀវទេសចរណ៍ ដែលបានចូលមកស្នាក់នៅទស្សនាកម្សាន្ត នៅខេត្តប្រវត្តិសាស្ត្រ ក្នុងឱកាសដែលប្រជាពលរដ្ឋខ្មែរទូទាំងព្រះរាជាណាចក្រកម្ពុជា ទទួលអំណរសាទរបុណ្យចូល ឆ្នាំថ្មីប្រពៃណីជាតិខ្មែរ ដើម្បីបានចូលរួមសប្បាយរីករាយ ជាមួយប្រជាពលរដ្ឋខ្មែរ លេងកម្សាន្តល្បែងប្រជាប្រិយ៍ប្រពៃណីផងដែរ ។
មានប្រសាសន៍នោះដែរឯ.ឧ ឃឹម ប៊ុនសុង ក៏បានលើកឡើងពីកិច្ចអភិវឌ្ឍន៍របស់ខេត្តសៀមរាប ក្នុងកែលម្អសោភណ្ឌភាពក្រុងប្រវត្តិសាស្ត្រដ៏ចំណាស់មួយនេះ ក្នុងតម្រូវការទទួលស្វាគមន៍ដល់ភ្ញៀវទេសចរណ៍ជាតិ អន្តរជាតិ ដែលបានចូលមកទស្សនាកម្សាន្ត នៅតាមតំបន់រមណីយដ្ឋានវប្បធម៌ប្រវត្តិសាស្ត្រ និង រមណីយដ្ឋានធម្មជាតិ ។ ឯកឧត្តមបានបន្តទៀតថា បច្ចុប្បន្ននេះក្រុងសៀមរាបត្រូវបានរៀបចំកែលម្អផ្លូវមួយចំនួន ក្នុងការពង្រីកផ្លូវ ដើម្បីសម្រួល និង បញ្ជៀសនូវការកកស្ទះចរាចរណ៍ក្នុងក្រុង ដោយពីមួយថ្ងៃទៅមួយថ្ងៃ កំណើននៃភ្ញៀវទេសចរណ៍មានការកើនឡើងជាលំដាប់ ហើយវិស័យទេសចរជាសរសៃឈាមសេដ្ឋកិច្ច នៃប្រភពចំណូលរបស់ជាតិមិនចេះរីងស្ងួត។ ក្នុងរយៈពេលប៉ុន្មានឆ្នាំចុងក្រោយនេះ វិស័យទេសចរបានធ្វើឲ្យកំណើនសេដ្ឋកិច្ច និង ជីវភាពរស់នៅរបស់ប្រជាពលរដ្ឋ ខេត្តសៀមរាបមានការប្រសើរឡើងផងដែរ ។ ឯ.ឧ ឃឹម ប៊ុនសុង ក៏បានគូសបញ្ជាក់ថា ដោយកត្តានេះហើយ ដែល ធ្វើឲ្យអាជ្ញាធរខេត្តសៀមរាប ត្រូវធ្វើការពង្រីកផ្លូវ និងបើកផ្លូវមួយចំនួនជុំវិញសួនច្បារព្រះអង្គចេកព្រះអង្គចម ព្រមទាំងលើកគម្រោងសាងសង់ស្ពានភ្លោះ អែបស្ពានថ្មព្រះរាជដំណាក់ ក្នុងការសម្រួលចរាចរណ៍នៅក្នុងសៀមរាបទៀតផង ។ ក្នុងដំណាក់កាលទីមួយនេះ ធ្វើការ ពង្រីកនូវកំណាត់ផ្លូវពីមុខសណ្ឋាគារសុខាអង្គរ ទៅដល់ភ្លើងស្តុបទន្លេសាប ព្រមទាំងរៀបចំគម្រោងដាំសាឡើងវិញ នូវដើមឈើ អមសង្ខាងផ្លូវបានពង្រីក នូវប្រភេទដើមឈើដ៏មានតម្លៃ នៅក្រោយពេលបុណ្យចូលឆ្នាំខ្មែរយើងនេះ ។ ក្នុងនោះដែរឯកឧត្តមអភិបាលខេត្ត ក៏បានជម្រាបដល់នាយកគ្រប់គ្រងសណ្ឋាគារ ដោយនៅថ្ងៃខាងមុខ នឹងមានការ រៀបចំអង្គរសង្ក្រាន្តនៅខេត្តសៀមរាប ដែលរៀបចំឡើងដោយសហភាពសហព័ន្ធយុវជនកម្ពុជានិង សូមឲ្យមានការចូលរួមសហការគាំទ្រគ្រប់បណ្តាសណ្ឋាគារទាំងអស់ នៃព្រឹត្តិការណ៍អង្គរសង្ក្រាន្ត ព.ស ២៥៥៧-២៥៥៨ គ.ស ២០១៤ ដែលគ្រោងនឹងធ្វើឡើងក្រោមប្រធានបទ «ការចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ»នាឆ្នាំនេះ ត្រូវបានគេរំពឹងថា នឹងអាចទាក់ទាញភ្ញៀវទេសចរណ៍ជាតិអន្តរជាតិកាន់តែច្រើនទ្វេដង ចូលមក ទស្សនានៅខេត្តសៀមរាបដែលជាទីតាំងនៃអតីតអាណាចក្រខ្មែរ ៕