ភ្នំពេញ ៖ គ្រោះថ្នាក់ចរាចរណ៏មួយ នៅលើកំណាត់ផ្លូវ ជាតិលេខ ៤ យ៉ាងហោចណាស់ក៏មនុស្ស០២នាក់បានស្លាប់ភ្លាមៗនៅកន្លែងនិងម្នាក់ទៀតរងរបួស ព្រោះតែម៉ូតូបុកគ្នាជាមួយម៉ូតូពេញទំហឹង កាលម៉ោង ១និង៤០នាទីយប់ ឈានចូលថ្ងៃទី១៤ មីនា២០១៤ នៅចំណុច ការ៉ាស់សាំងតូតាល់
ស្ថិតតាមបណ្តោយផ្លូវជាតិ លេខ៤ ក្នុងភូមិអូដឹម សង្កាត់ចោមចៅ ខណ្ឌពោធិ៍សែនជ័យ ។
យោងតាមប្រភពព័ត៌មានបានឱ្យដឹងថា មុនពេលកើតហេតុម៉ូតូស៊ុយហ្ស៊ូគីណិច ពណ៌ស មួយគ្រឿង ពាក់ស្លាកលេខភ្នំពេញ1BV-1623 ជិះដោយយុវជនម្នាក់និងរួមដំណើរជាមួយយុវជនម្នាកទៀត បានធ្វើដំណើរពីទិសដៅ លិចទៅ កើត ស្រាប់តែមកដល់ចំណុចកើតហេតុក៏បានបុកគ្នាជាមួយម៉ូតូហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1AT-4539 ជិះដោយយុវជនម្នាក់មិនស្គាល់អត្តសញ្ញាណ ក្នុងទិសដៅពីលិចទៅកើតស្របទិសគ្នា និងបានបុកគ្នា យ៉ាងពេញទំហឹងលាន់សូរដូចរន្ទះ បណ្តាលឱ្យអ្នកបើកបរម៉ូតូទាំងពីរនាក់ បែកមុខបែកមាត់ ផុងលលាក្បាលស្លាប់ភ្លាមៗនៅកន្លែងកើតហេតុ យ៉ាងអាណោចអធម៏ ហើយចំណែកយុវជនម្នាក់ដែលរងរបួសនោះក៏ត្រូវបានរថយន្តសាមុយដឹងយកទៅមន្ទីរពេទ្យផងដែរ ។
ក្រោយពេលកើតហេតុ សមត្ថកិច្ចកំពុងស្រាវជ្រាវរកអត្តសញ្ញាណសព ដើម្បីទាក់ទងក្រុមគ្រួសារមកទទួលយកទៅធ្វើបុណ្យ តាមប្រពៃណី រីឯម៉ូតូទាំងពីរគ្រឿង វិញសមត្ថកិច្ចបានវាស់វែងយកទៅរក្សាទុកនៅខណ្ឌពោធិ៍សែនជ័យ រងចាំការដោះស្រាយ ៕
