ខេត្តកំពង់ចាម គេសង្កែតឃើញមានរថយន្តសាំយ៉ុងជាច្រើនគ្រឿង កំពុងតែដឹកបទល្មើសព្រៃឈើ កាត់មុខសង្កាត់រដ្ឋបាលព្រៃឈើមេមុត និងពញ្ញ៉ាក្រែក យ៉ាងអាណាធិបតេយ្យ បែរជាអាជ្ញាធរពាក់ព័ន្ធ គ្មានវិធានការបង្ក្រាប់ទៅវិញ ។ ប្រភពពីសមត្ថកិច្ចតាមដងផ្លូវ បានឲ្យដឹងថា ចំពោះ
បទល្មើសព្រៃឈើ ត្រូវបានធ្វើចរាចរណ៍ទាំងយប់ ទាំងថ្ងៃ ហើយក្នុងមួយថ្ងៃៗមិនតិចជាង១០០ម៉ែត្រគូបនោះទេ ជាក់ស្តែងនៅវេលាម៉ោង១០ព្រឹក ថ្ងៃទី១៦ធ្នូម្សិលមិញ មានរថយន្តប្រភេទសាំយ៉ុងចំនួន៤គ្រឿង ផ្ទុកឈើខុសច្បាប់ពេញៗទ្បាន ដឹកចេញពីទឹកដីខេត្តក្រចេះ ឆ្លងកាត់មុខ
រដ្ឋបាលព្រៃឈើមេមុត និងពញ្ញ៉ាក្រែក និងបានឆ្លងកាត់មុខស្នាក់ការនគរបាលសេដ្ឋកិច្ចត្បូងឃ្មុំ យ៉ាងរលូន លុះរថយន្តបើកដល់ស្នាក់ការត្រួតពិនិត្យចរាចរណ៍ របស់នគរបាលខេត្តត្បូងឃ្មុំ នៅចំណុចមុខសាលាខេត្ត រថយន្តដឹកបទល្មើសមួយគ្រឿង ក៏បានបើកទៅកិនបង្គោលសញ្ញាចរាចរណ៍ បណ្តាលឲ្យគៀបជាប់នៅកង់រថយន្ត ហើយរថយន្តដឹកឈើខុសច្បាប់ ក៏ធ្វើដំណើរបន្តតាមផ្លូវជាតិលេខ៨ លុះដល់មុខវត្តតាអាំ ស្ថិតក្នុងភូមិកក់ ស្រុកពញ្ញ៉ាក្រែក ក៏បែកកង់ក្រោយផ្នែកខាងស្តាំ ហើយតៃកុងបានបត់ចូលក្នុងវត្ត ។
ពេលនោះអ្នកសារព័ត៌មាន បានប្រទះឃើញ ក៏បានទូរស័ទ្ទជំរាបទៅលោល ផាន់ សុភ័ក្ត ព្រះរាជអាជ្ញារង អមសាលាដំបូងខេត្តកំពង់ចាម ទើបលោកបញ្ជាទៅកម្លាំងកងរាជអាវុធហត្ថ ស្រុកពញ្ញ៉ាក្រែក និងមន្ត្រីរដ្ឋបាលព្រៃឈើ មកធ្វើការរឹបអូស ដែលឈើក្នុងរថយន្ត មានចំនួន៥០ដើម ។
ប្រជាពលរដ្ឋក៏បានរិះគន់ថា ការដឹកជញ្ជូនឈើបានយ៉ាងរលូននេះ បានសម្តែងឲ្យឃើញអំពើពុករលួយ របស់មន្ត្រីព្រៃឈើនៅតាមដង់ផ្លូវ និងនគរបាលសេដ្ឋកិច្ចខេត្តត្បូងឃ្មុំ ដែលដាក់ប៉ុស្តិ៍ចាំរាប់ក្បាល់ទ្បានបទល្មើសពីក្រុមឈ្មួញ ។
ពាក់ព័ន្ធនិងករណី ដឹកឈើយ៉ាងអាណាធិបតេយ្យទាំងអស់នេះ លោក អៀម សុគន្ធ នាយផ្នែករដ្ឋបាលព្រៃឈើមេមុត មិនអាចសុំការពន្យល់ណាទ្បើយ ព្រោះទូរស័ព្ទរបស់លោក អ្នកសារព័ត៌មានខល់ចូលដែរតែមិនលើក ៕