កំពង់ឆ្នាំង៖ករណីចាក់សំរាមចោលយ៉ាងអនាធិបតេយ្យនៅចំណុចរណ្តៅចាក់សំរាមនៅជើងភ្នំតូច ស្ថិតក្នុងភូមិ គល់គុប ឃុំស្រែថ្មី ស្រុករលាប្អៀរ ត្រូវបានអាជ្ញាធរភូមិឃុំសំណូមពរដលអាជ្ញាធរខេត្ត ជួយមានវិធានការណ៍ដោះស្រាយនៅក្នុងវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សា
ខេត្តកំពង់ឆ្នាំងអាណត្តិទី២ នាពីព្រឹកថ្ងៃទី១៦ ខែធ្នូ ឆ្នាំ២០១៤ នៅក្នុងសាលាស្រុករលាប្អៀរ។
នៅក្នុងវេទិកានេះមានការចូលរួមពីអនុភូមិ មេភូមិ មេឃុំ ក្រុមប្រឹក្សាឃុំ អភិបាលស្រុក ក្រុមប្រឹក្សាស្រុក និងប្រធានអនុប្រធានមន្ទីរជុំវិញខេត្តចំនួន៤៥៨នាក់ ក្រោមអធិបតីភាពលោក អ៊ុន សំអុល អភិបាលរងខេត្ត។
ក្រោយពីលោក អ៊ុក កីឡា នាយករងរដ្ឋបាលសាលាខេត្តបានអានរបាយការណ៍បូកសរុបស្តីពីសមិទ្ធិផលការងារសំខាន់ៗឆ្នាំ២០១៤ និងទិសដៅការងារសំខាន់ៗឆ្នាំ២០១៥របស់រដ្ឋបាលខេត្តកំពង់ឆ្នាំងរួចមក គណៈអធិបតីបានផ្តល់សិទ្ធអោយសមាជឹកសមាជិការក្នុងអង្គវេទិកា ឡើងសាកសួររាល់បញ្ហាលំបាកនានាដែលទាក់ទងនៅក្នុងមូលដ្ឋានរបស់ខ្លួន ដើម្បីអោយមន្ទីរជំនាញពាក់ព័ន្ធធ្វើការដោះស្រាយ។
នៅក្នុងវេទិកានេះអាជ្ញាធរនៅតាមមូលដ្ឋានមួយចំនួនបានសំណូមពរដល់មន្ទីរអង្គភាពមួយចំនួនជួយដោះ ស្រាយ ដូចជា៖បញ្ហាប្រព័ន្ធស្រោចស្រពទឹកស្រែប្រាំងនៅក្នុងឃុំជ្រៃបាក់,ការវាស់វែងដីធ្លីផ្តល់កម្មសិទ្ធជូនប្រជាពលរដ្ឋមានការជាន់គ្នានៅក្នុងឃុំប្រស្នឹប,ការវាស់វែងដីធ្លីរួចហើយនៅក្នុងឃុំទឹកហូត ជាង៣ឆ្នាំមិនទាន់ឃើញចេញប័ណ្ណកម្មសិទ្ធអោយ,ការផ្តល់សេវាសាធារណៈនានានៅតាមសាលាឃុំ និងនៅតាមមណ្ឌលសុខភាពឃុំ និងបញ្ហាទាក់ទងនិងសណ្តាប់ធ្នាប់សន្តិសុខ ចោរកម្ម គ្រឿងញៀន ក្មេងទំនើង ល្បែងស៊ីសង។
ដោយឡែកបញ្ហាប្រឈមដែលគួរអោយចាប់អារម្មណ៍នោះ គឺអាជ្ញាធរមូលដ្ឋាននៅក្នុងឃុំស្រែថ្មីបានលើក ឡើងថា៖នៅចំណុចអន្លង់ចាក់សំរាមជើងភ្នំតូចនៅក្នុងភូមិគល់គប់ ឃុំស្រែថ្មី ត្រូវបានអ្នកម៉ៅការសំរាមនៅក្នុងក្រុងកំពង់ឆ្នាំង ដឹកសំរាមយកទៅចាក់ចោលពាសវាលពាសកាលយ៉ាងអនាធិប្បតេយ្យ ដោយគ្មានរណ្តៅសំរាប់ ចាក់សំរាមនោះឡើយ ដែលករណីនេះធ្វើអោយប៉ះពាល់យ៉ាងធ្ងន់ធ្ងរដល់សុខមាលភាពរបស់ប្រជាពលរដ្ឋ នៅ ក្នុងតំបន់នោះមានក្លិនស្អុយអសោច និងមានសត្វរុយយ៉ាងច្រើនដេញរោមអ្នកដំណើរដែលបានឆ្លងកាត់។ ទន្ទឹម នេះដែរ អាជ្ញាធរមូលដ្ឋានបានសំណូមពរដល់អ្នកម៉ៅការដឹកសំរាមចេញពីក្រុងកំពង់ឆ្នាំងជីករណ្តៅថ្មីប្រមូល សំរាមដែលបានចាក់ចោលពាសវាលពាសកាលទាំងនោះដាក់ក្នុងរណ្តៅមួយកន្លែង ដើម្បីជួយរក្សាដល់បរិស្ថាន និងសុខមាលភាពរបស់ប្រជាពលរដ្ឋដែលរស់នៅតំបន់នោះ។
ពាក់ព័ន្ធនឹងករណីខាងលើនេះតំណាងមន្ទីរបរិស្ថានខេត្ត បានបកស្រាយបញ្ជាក់អោយដឹងថា៖ខាងមុខនេះ តាមគំរោង អាជ្ញាធរខេត្តនឹងធ្វើការជីករណ្តៅដ៍ធំមួយសំរាប់ស្តុកសំរាមដែលដឹកចេញពីក្រុងកំពង់ឆ្នាំង ក្រោមការ ឧបត្ថម្ភថវិការបស់ធនាគារមួយ ដែលបច្ចុប្បន្នមន្ទីរបរិស្ថានខេត្ត និងអាជ្ញាធរពាក់ព័ន្ធនៅក្នុងមូលដ្ឋានកំពុងសិក្សា រកទីតាំង ដើម្បីដោះស្រាយបញ្ហានេះ។
ចំណែកបញ្ហាពាក់ព័ន្ធជាមួយកង្វល់របស់ប្រជាពលរដ្ឋនៅក្នុងឃុំទឹកហូត មន្ទីររៀបចំដែនដី សំណង់ និងសុរិយោដីខេត្ត បានឡើងបកស្រាយអោយដឹងថា៖ក្រោយពីការវាស់វែងដីធ្លីរបស់ប្រជាពលរដ្ឋជាលក្ខណៈប្រព័ន្ធនៅក្នុងឃុំទឹកហូតរួចមក មន្ទីររបានកសាងឯកសារបញ្ជូនទៅក្រសួងរួចហើយ ប៉ុន្តែក្រោយមកថ្នាក់ជាតិបានអោយផ្អាកការចេញប័ណ្ណកម្មសិទ្ធដីរបស់ប្រជាពលរដ្ឋនៅក្រោមថ្នល់ជាតិមួយរយៈនេះជាកិច្ចការរបស់ថ្នាក់លើ។
លោក អ៊ុន សំអុល អភិបាលរងខេត្តបានមានប្រសាសន៍ណែនាំដល់អាជ្ញាធរគ្រប់ជាន់ថ្នាក់ក្នុងស្រុក និងមន្ទីរពាក់ព័ន្ធទាំងអស់នៅក្នុងខេត្ត សហការគ្នាអោយបានល្អដើម្បីសំរេចតួនាទីភារកិច្ចរៀងៗខ្លួនដើម្បីចូល រួមអភិវឌ្ឍន៍ខេត្តកំពង់ឆ្នាំង,ចូលរួមអនុវត្តន៍គោលនយោបាយភូមិឃុំមានសុវត្ថិភាព និងការចូលរួមក្នុងការកំណែទម្រង់ស៊ីជម្រៅថ្នាក់ក្រោមជាតិរបស់រាជរដ្ឋាភិបាលអាណត្តិទី៥៕
