សៀមរាបៈ កាលព្រឹកថ្ងៃច័ន្ទ ទី២៩ ខែធ្នូ ឆ្នាំ២០១៤ មានករណីស្លាប់ដោយបិទភ្នែកមិនជិតមួយ។ បុគ្គលដែលស្លាប់ឈ្មោះឧបាសិកា ខ្លេង នួន អាយុ៧៤ឆ្នាំរស់នៅភូមិស្វាយតាដោក ឃុំអន្លង់សំណរ ស្រុកជីក្រែង ខេត្តសៀមរាប។ លោកយាយ ហម ឃិន អាយុ៧២ឆ្នាំ ត្រូវជាប្អូនជីដូនមួយ
រស់នៅភូមិជាមួយគ្នានិយាយថា៖ មុនពេលកើតហេតុ លោកយាយ ខ្លេង នួន បានមកលេងផ្ទះគាត់ដែលជាប្អូន។ មួយសន្ទុះក្រោយមក ស្រាប់តែមានបុគ្គលិកធនាគារភូមិចំនួន៤នាក់ ជិះម៉ូតូពណ៌សមកតាមបងស្រីរបស់គាត់អោយទៅសាលាឃុំ។ ប៉ុន្តែជនរងគ្រោះនិយាយថា៖ ខ្ញុំមិនអាចទៅឥឡូវបានទេព្រោះខ្ញុំឃ្លានបាយខ្លាំងណាស់ ចាំខ្ញុំហូបបាយសិនទើបខ្ញុំទៅសាលាឃុំជាមួយលោកគ្រូព្រោះបើអោយខ្ញុំទៅពេលនេះខ្ញុំច្បាស់ជាស្លាប់ជាមិនខាន។
ទោះបីជាលោកយាយនិយាយយ៉ាងណាក៏ដោយ បុគ្គលិកធនាគារពុំព្រម ហើយបង្ខំគាត់ទៅអោយដោយខានមិនបានបាន។ ទន្ទឹមនឹងនោះដែរ ប្រជាពលរដ្ឋច្រើននាក់បាននិយាយថា បុគ្គលិកធនាគារបើកម៉ូតូដឹកគាត់ឆ្វែលសាលាឃុំចុះឡើងៗដូចសត្វខ្លែងហើរឆ្វែលរកចំណី។
រីឯបុគ្គលិកធនាគារវិញ បានបំភ្លឺថា ក្រុមការងាររបស់ពួកគាត់ដឹកលោកយាយទៅសាលាឃុំប្រហែលជា៥នាទីប៉ុណ្ណោះ។ លោក សេង យន់ មេឃុំអន្លង់សំណរ មានប្រសាសន៍ថា៖ កាលពីម្សិលមិញ លោកហើយនឹងស្មៀនឃុំទៅប្រជុំបូកសរុបការងារប្រចាំឆ្នាំ២០១៤នៅឯសាលាស្រុក។ តែចំពោះរឿងធនាគារ និងកូនបំណុលវិញលោកបានសសេរលិខិតអញ្ជើញ លោក ស៊ុម ធឹម និងអ្នកស្រី ញ៉ែម មិច ដែលជាអ្នកធានាទៅបំភ្លឺនៅសាលាឃុំ ចំនួន៣ដង តែពួកគេមិនព្រមមក។ លោក ស៊ុម ធឹម និងភរិយានិយាយថា ពួកគាត់មិនអាចទៅសាលាឃុំទេ ព្រោះគាត់គ្មានលុយសងជំនួស។
លោក អេង វណ្ណៈ ដែលត្រូវជាកូនប្រសាររបស់លោកយាយ ខ្លេង នួន ហើយនិងប្រពន្ធឈ្មោះ លី សុនី ជាកូនបំណុលបាននិយាយថា៖ គាត់ជំពាក់លុយធនាគាភូមិចំនួន៥០០ដុល្លា សងរួច៦ខែហើយប៉ុន្តែមិនដឹងជានៅសល់ប៉ុណ្ណាទៀត ព្រោះឯកសារនៅឯប្រពន្ធរបស់លោកការសងយឺតយ៉ាវបណ្តាលមកពីមុខរបររបស់គាត់មិនគាប់កប។ ករណីខាងលើនេះធ្វើអោយមតិរបស់ប្រជាពលរដ្ឋជាច្រើនរិះគន់ទៅដល់បុគ្គលិកធនាគារដែលរៀនចប់បរិញ្ញាប័ត្រទើបអាចទទួលការងារនេះបាន ប៉ុន្តែធ្វើការមិនត្រឹមត្រូវតាមច្បាប់។ ព្រោះច្បាប់ធនាគារ មនុស្សដែលមានអាយុច្រើនជាង៦០ឆ្នាំគ្មានសិទ្ធខ្ចីប្រាក់ធនាគាររឺក៏ធានាបានឡើយ ម្យ៉ាងទៀតលោកយាយ ខ្លេង នួន មានអាយុរហូតដល់៧៤ហើយ ហេតុអ្វីក៏បង្ខំអោយគាត់ទៅ។ ដោយ អ៊ុក ផ្លុង
