ភ្នំពេញ ៖ រថយន្តកូរូណា ពណ៌សមួយគ្រឿងជិះធ្វើដំណើរជាលក្ខណៈគ្រួសារបើកឆ្លងស្ដុបផ្លូវភ្លោះអូរឫស្សីក៏ត្រូវម៉ូតូសង់ឌ្រីមC125 ពណ៌ខ្មៅមួយគ្រឿងបោះពួយបុកចំពីជំហៀងខាងឆ្វេងរថយន្តបណ្ដាលឱ្យអ្នកជិះម៉ូតូផ្លោងខ្ទាតបោកទៅកញ្ចក់រថយន្ត កាលពីវេលាម៉ោង១១និង២៩នាទីយប់ថ្ងៃទី
១៨មីនា ២០១៤ ចំណុចស្តុបស្ដុបផ្លូវភ្លោះអូរឫស្សី តាមបណ្ដោយផ្លូវព្រះមុនីវង្សកែងផ្លូវ២១៤ ស្ថិតក្នុងសង្កាត់បឹងរាំង ខណ្ឌដូនពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តកូរូណា មួយគ្រឿង ពណ៌ស ពាក់ស្លាកលេខ ភ្នំពេញ 2F-1797 ជិះជាលក្ខណៈគ្រួសារតាមផ្លូវ២១៤ ពីលិចទៅកើតបើកឆ្លងស្ដុប ក៏មានម៉ូតូសេ១២៥មួយគ្រឿង ពណ៌ខ្មៅ ពាក់ស្លាកលេខ កណ្តាល 1F-0954 ជិះគ្នា២នាក់បោះពួយយ៉ាងលឿនតាមផ្លូវព្រះមុនីវង្ស ទិសដៅពីជើងទៅត្បូង ស្រាប់តែមកដល់ស្តុបព្រះមុនីវង្សកែងផ្លូវ២១៤ ក៏បានបុកមួយម៉ូតូតែម្តងបណ្តាលឱ្យអ្នកជិះម៉ូតូផ្លោងខ្ទាតបោកទៅកញ្ចក់រថយន្តរងរបួសស្រាល ចំណែករថយន្តរងការខូចខាតចំហៀងកង់ឆ្វេងនិងបែកកញ្ចក់រថយន្តខាងមុខ។
បន្ទាប់ពីកើតហេតុភាគីទាំងសងខាងជជែកគ្នាយកត្រូវរៀងខ្លួនជាង១ម៉ោងហើយភាគីរថយន្តក៏ដោះស្រាយសងសំណងទៅខាងម៉ូតូដើម្បីបញ្ចប់រឿងនៅកន្លែងកើតហេតុ ព្រោះមិនចង់មានរឿងវែងឆ្ងាយ៕
