រាជធានីភ្នំពេញ ៖ បង្គោលស្លាកសញ្ញាចរាចរ១ដើមនិងរនាំងដែកពុះចែកទ្រូងផ្លូវចំនួន៣ផ្ទាំងត្រូវបានបាក់និងដួលរប៉ាត់រប៉ាយពេញផ្លូវដោយសាររថយន្តម៉ាកស៊ុយហ្ស៊ូគី ពណ៌ទឹកសមុទ្រមួយគ្រឿង បើកបរដោយបុរសស្រវឹងស្រាជោគជាំម្នាក់បុកកាលពីវេលាម៉ោង១២និង៤០នាទី អធ្រាត
ឈានចូលថ្ងៃ ទី២០ ខែមីនាឆ្នាំ២០១៤ នៅទល់មុខក្រុមហ៊ុនតូយ៉ូតា តាមបណ្តោយមហាវិថីសហពន្ធ័រុស្ស៊ី សង្កាត់ទឹកថ្លា ខណ្ឌសែនសុខ ។
នៅកន្លែងកើតហេតុប៉ូលិសមិនទាន់ស្គាល់អត្តសញ្ញាណបុរសស្រវឹងស្រាជោគជាំបើករថយន្តបង្កហេតុនៅឡើយទេ។
លោក ស៊ិន សុវណ្ណ នាយរងផ្នែកសណ្ដាប់ធ្នាប់ចរាចរផ្លូវគោកខណ្ឌសែនសុខបានឱ្យដឹងថា មុនពេលកើតហេតុមានរថយន្តម៉ាកស៊ុយហ្ស៊ូគី ពណ៌ទឹកសមុទ្រ មួយគ្រឿង ពាក់ស្លាកលេខ ភ្នំពេញ 2A-4491 បើកបរដោយបុរសស្រវឹងស្រាម្នាក់ បានធ្វើដំណើរយ៉ាងលឿនតាមបណ្ដោយមហាវិថីសហពន្ធ័រុស្ស៊ី ក្នុងទិសដៅពីកើតទៅលិច ស្រាប់តែមកដល់ចំណុចកើតហេតុខាងលើបានរេចង្កូតជ្រុលទៅបុករះបាក់អស់បង្គោលស្លាកសញ្ញាចរាចរបង្ហាញទិសដៅ១ដើម រួមជាមួយរនាំងដែកពុះចែកទ្រូងផ្លូវ៣ផ្ទាំង។
ក្រោយពេលកើតហេតុអ្នកបើករថយន្តបង្កហេតុរួមជាមួយរថយន្តត្រូវបានប៉ូលិសនាំយកទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយ៕