កំពង់ធំ ៖ បទល្មើសនេសាទគឺជាចំនុចសរសើប របស់រាជរដ្ឋាភិបាល ក្នុងការយកចិត្តទុកដាក់ ការពារ ធនធានមឆ្ឆាជាតិ ដើម្បីធានាបាននូវ បញ្ហាស្បៀងអាហារ សម្រាប់ការរស់នៅប្រចាំថ្ងៃរបស់ ប្រជាពលរដ្ឋខ្មែរ មួយចំនួនធំ បានពឹងផ្អែកទៅលើផលនេសាទ ទើបរាជរដ្ឋាភិបាល បានសម្រេច លុបឡូនេសាទទាំង ៣៦ កន្លែងទូទាំងប្រទេស ហើយបានប្រគល់ឡូត៍នេសាទទាំងអស់ ឲ្យប្រជាពលរដ្ឋ ជាម្ចាស់ការ ក្នុងការថែរក្សា និងទទួលផលនេសាទ ដោយប្រើប្រាស់ឧបករណ៍នេសាទ ស្របច្បាប់ ព្រមទាំងបានដាក់បទបញ្ជាឲ្យ រដ្ឋបាលជលផល រៀបចំដែនអភិរក្សត្រីមេពូជ សម្រាប់ផ្គត់ផ្គង់ទៅថ្ងៃអានាគត់បន្តទៀត និងបានហាមឃាត់ ដាច់ខាត មិនឲ្យមានការ ចូលទៅនេសាទក្នុងដែនអភិរក្ស។
ជាក់ស្តែងយុវជន១០នាក់ ដែលមានអាយុចាប់ពី ១៦ .១៧. ១៨ ឆ្នាំ បាននាំគ្នា យកអួនទៅរាយមង នៅក្នុង ដែនហាមឃាត់ ក្នុងតំបន់អភិរក្សត្រីមេពូជ ត្រូវបាន លោក យ៉ាន់ វិសាក់ នាយផ្នែករដ្ឋបាលជលផលផាត់ សណ្តាយ សហការជាមួយ ប៉ូលិស ប៉េអ៊ឹម និងកងទ័ពជើងទឹក ចុះទៅឃាត់យុវជនទាំង១០នាក់ នៅក្នុងដែនអភិរក្ស ព្រមទាំងវត្ថុតាងមាន អួនចំនួន ២វង់ កាណូត២ គ្រឿង និងទូក២គ្រឿង ម៉ាស៊ី២គ្រឿង ជនសង្ស័យទាំង ១០ នាក់ ត្រូវបាននាំមក ខណ្ទរដ្ឋបាលជលផលកំពង់ធំ ដើម្បីធ្វើកំណត់ហេតុ។
លោក ប៉ែន វណ្ណរិទ្ធ នាយខណ្ទរដ្ឋបាលជលផល កំពង់ធំ បានអោយដឹងថា ដោយយល់ឃើញថា ក្រុមជនសង្ស័យ បាននេសាទជ្រុលចូលទៅ តំបន់ហាមឃាត់ជាលើកដំបូង ផ្សំនិងយុវជនទាំងនេះ មានអាយុតិច សុទ្ធតែក្មេងៗបាននេសាទអួនប្រវែង ត្រឹមតែជាង ៦០ម៉ែត្រ ទើបបានសុំយោបល់ លោកព្រះរាជអាជ្ញាអមសាលាដំបូង ខេត្តកំពង់ធំ ឲ្យធ្វើការអប់រំណែនាំ ព្រមទាំងបញ្ឈប់ការនេសាទ នៅក្នុងតំបន់អភិរក្សបន្តទៀត ។
លោក ប៉ែន វណ្ណរិទ្ធ បានណែនាំឲ្យយុវជនទាំងអស់ កុំប្រើប្រាស់ឧបករណ៍នេសាទដោយខុសច្បាប់ និងហាមចូលនេសាទចូលកន្លែងអភិរក្ស ដែលជាកន្លែងហាមឃាត់ និងជាកន្លែងឡូត៍អភិរក្សត្រីមេពូជ លោកបានបញ្ជាក់ថា ការថែក្សានេះ មិនមែនទុកសម្រាប់បងៗជាសមត្ថកិច្ចជលផល ជាអ្នកនេសាទនោះទេ គឺទុកសម្រាប់ ក្មួយ និងបងប្អូនប្រជាពលរដ្ឋទាំងអស់ ដូច្នេះបងសូមសំណូមពរ ឲ្យប្អូនជួយគ្នាថែរក្សា ធនធាន មឆ្ឆាជាតិ កុំប្រើប្រាស់ឧបករណ៍នេសាទខុសច្បាប់ និងចូលរួមផ្សព្វផ្សាយ ដល់មូលដ្ឋានទាំងអស់ ដើម្បី ផលប្រយោជន៍ យើងទាំងអស់គ្នា។