បន្ទាប់ពីកម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃស្ទាក់ឃាត់ចាប់រថយន្តចំនួន២គ្រឿងកាលពីវេលាម៉ោង ២៣ យប់ថ្ងៃទី១៤ ខែមិនា ឆ្នាំ២០១៤ ដែលមានផ្ទុកឈើប្រណីតពេញនៅទីតាំងពីកន្លែងផ្សេងគ្នារួចមក នៅថ្ងៃទី១៨ មិនានេះ ជំនាញរដ្ឋបាលព្រៃឈើបានរាប់
ចំនួនឈើទាំងនោះរួចរាល់ហើយ ទោះជាយ៉ាងណាការរាប់ចំនួនឈើនេះមិនមានវត្តមានចូលរួមពីកម្លាំងនគរបាលប្រឆាំងបទល្មើសសេដ្ឋកិច្ចនោះទេ ប៉ុន្តែមន្ត្រីជំនាញបានបញ្ជាក់ថាឈើមានចំនួនជាង១២ម៉ែត្រគូប ហើយឈើទាំងនោះមានប្រភេទ ធ្នង់ នាងនួន និងក្រាក់ក្រញូង ដែលមានផ្ទុកក្នុងរថយន្ត២គ្រឿងចំណុះ២តោនកន្លះ។
សូមបញ្ជាក់ថាការបង្ក្រាបរថយន្តដឹកឈើប្រណីតនេះបានធ្វើឡើងនៅឃុំទឹកវិលចំនួនមួយគ្រឿង និងនៅឃុំព្រែកអំពិលចំនួនមួយគ្រឿង ដែលស្ថិតក្នុងស្រុកស្អាង ខេត្តកណ្ដាល ហើយបច្ចុប្បន្នឈើប្រណីតទាំងនេះកំពុងត្រូវបានរក្សាទុកនៅទីស្នាក់ការសង្កាត់រដ្ឋបាលព្រៃឈើតាខ្មៅ ដែលស្ថិតក្នុងភូមិព្រែកសំរោង ឃុំរកាខ្ពស់ ស្រុងស្អាង ខេត្តកណ្ដាល នឹងកំពុងរៀបចំកសាងសំណុំរឿងបញ្ជូនបន្តទៅកាន់ផ្នែករដ្ឋបាលព្រៃឈើកណ្ដាល ដើម្បីមានវិធានការបន្ត៕