លោកស្រី អ៊ុត ណារី ស្នងការរងនគរបាល ខេត្តកំពង់ឆ្នាំង ទទួលបន្ទុកយេនឌ័រ បានទទួលមរណៈភាព នៅវេលាម៉ោង២និង៣០នាទី រំលងអាធ្រាតឈានចូលថ្ងៃទី២៥ ខែមករា ឆ្នាំ២០១៥ ដោយសោកស្តាយអាឡោះអាល័យយ៉ាងខ្លាំង ពីសំណាក់ក្រុមគ្រួសារ ថ្នាក់នាំខេត្ត មន្ត្រីរាជការ និងមន្ត្រីនគរបាល ទូទាំងខេត្តកំពង់ឆ្នាំង ។ 
លោកឧត្តមសេនីយត្រី ប្រាក់ វុទ្ធី ស្នងការនគរបាល ខេត្តកំពង់ឆ្នាំង បានអោយដឹងថា លោកស្រី អ៊ុតណារី មានស្រុកកំណើត នៅភូមិដំណាក់ពពូល ឃុំកំពង់ឆ្នាំង ស្រុករលាប្អៀរ ខេត្តកំពង់ឆ្នាំង ទីលំនៅបច្ចុប្បន្ននៅភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ស្វាមីលោកស្រីគឺជាមន្ត្រីនគរបាលខេត្តកំពង់ឆ្នាំង ហើយបានទទួលមរណៈភាព ដោយសារគ្រោះថ្នាក់ចរាចរណ៍ តាំងពីឆ្នាំ២០១២មកម្ល៉េះ ។ 
លោកស្រីមានកូនក្នុងបន្ទុក៤នាក់ ស្រី២នាក់ និងប្រុស២នាក់ ។ លោកស្រី អ៊ុត ណារី បានចូលបំរើការងារ តាំងពីឆ្នាំ១៩៨១ ជាបុគ្គលិកពេទ្យ នៅឃុំកំពង់ឆ្នាំង ហើយលោកស្រី បានផ្ទេរចូលជាកងកម្លាំងនគរបាល ខេត្តកំពង់ឆ្នាំងនៅថ្ងៃទី៣០ ខែកញ្ញា ឆ្នាំ១៩៨៣ មានតួនាទីជាមន្ត្រី ស្ថិតិអត្តសញ្ញាណប័ណ្ណ នៃស្នងការដ្ឋាននគរបាលខេត្តកំពង់ឆ្នាំង ។ ដោយមានស្នាដៃល្អ ក្នុងការងារជាបន្តបន្ទាប់ លោកស្រីបានក្លាយជានាយរង ការិយាល័យសុខាភិបាល នៃស្នងការដ្ឋាន នគរបាលខេត្ត ។ នៅឆ្នាំ២០១៤ លោកស្រីបានទទួលតំណែង ជាស្នងការរងនគរបាលខេត្ត ទទួលបន្ទុកយេនឌ័រ ។
ក្នុងការបំពេញភារកិច្ច ជាង៣៤ឆ្នាំកន្លងមកនេះ លោកស្រី អ៊ុត ណារី បានទទួលបានមេដាយការពារជាតិ ចំនួន៣ គឺមេដាយមាស១ មេដាយប្រាក់១ មេដាយសំរិត១ និងទទួលបានមេដាយមាសការងារ ចំនួន១គ្រឿង ព្រមទាំងទទួលបានបណ្ណ័សរសើរ ចំនួន៣ផងដែរ ។
នៅវេលាម៉ោង៧និង៣០នាទីព្រឹក ថ្ងៃទី២៦ ខែមករា ឯកឧត្តម ឈួរ ចន្ទ័ឌឿន អភិបាលខេត្ត រួមដំណើរដោយមន្ត្រីក្រោមឱវាទ បានអញ្ជើញចូលរួមរំលែកមរណៈទុក្ខ និងគោរពវិញ្ញាណក្ខន្ធ លោកស្រី អ៊ុត ណារី នៅគេហដ្ឋានសព ក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ។ នាឱកាសនោះ ឯកឧត្តមអភិបាល ខេត្តកំពង់ឆ្នាំង បាននាំយកនូវថវិកាមួយចំនួន ចូលបុណ្យសព លោកស្រី អ៊ុត ណារី ផងដែរ ។ 
វេលាម៉ោងវេលាម៉ោង២រសៀល ថ្ងៃទី២៦ ខែមករា ឆ្នាំ២០១៥ សពលោកស្រី អ៊ុត ណារី ត្រូវបានដង្ហែ ទៅបូជានៅវត្ត អារញ្ញការាម ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ៕
