អ្នកលេងហ្គេម ១១នាក់ ត្រូវបានកម្លាំងកងរាជអាវុធហត្ថខណ្ឌសែនសុខ ដឹកនាំ ដោយព្រះរាជអាជ្ញារងសៀងសុខ នៅរសៀលថ្ងៃទី២៦ ខែមករា ឆ្នាំ២០១៥ បានឆ្មក់ចូល ទីតាំងហ្គេមស្ទូចត្រី១កន្លែង ដែលភាគច្រើនហ្គេមនេះ បានពង្វក់សិស្សសាលា ភ្លេចការ រៀនសូត្រ មានទាំងប្រុសទាំងស្រីចូលទៅលេង ដោយក្នុងប្រតិបត្ដិការនេះ សមត្ថកិច្ច ឃាត់ខ្លួនអ្នកលេងបាន
ចំនួន ១១នាក់ ក្នុងនោះមានស្រី ៣នាក់ ។
មន្ដ្រីអាវុធហត្ថខណ្ឌសែនសុខ បានឱ្យដឹងថា ទីតាំងហ្គេមស្ទូចត្រី ដែលប្រមូលម្ដុំ ដោយអ្នកចូលលេងជាច្រើននាក់រៀងរាល់ថ្ងៃខាងលើនេះ ស្ថិតនៅផ្ទះលេខ៦៦ ផ្លូវលេខ ៥៩៨ សង្កាត់ភ្នំពេញថ្មី ខណ្ឌសែនសុខ ។
តាមមន្ដ្រីអាវុធហត្ថដដែលបានឱ្យដឹងទៀតថា ម្ចាស់ទីតាំងហ្គេម មានឈ្មោះ ឡង់ ស៊ីណា ភេទស្រី អាយុ៥១ឆ្នាំ មានលិខិតអនុញ្ញាតពីលោក ជុំ វុទ្ធី ប្រធានមន្ទីរវប្បធម៌ និងវិចិត្រសិល្បៈរាជធានីភ្នំពេញ កាលពីថ្ងៃទី៣០ ខែឧសភា ឆ្នាំ២០១៤ ហើយអស់ សុពលភាពត្រឹមថ្ងៃទី៣០ ខែឧសភា ឆ្នាំ២០១៥ ដែលសុំបើកអាជីវកម្មមានយីហោ ថា សេវាកំសាន្ដហ្គេមតុក្កតា អេស អ អាយ ។
មន្ដ្រីអាវុធហត្ថបានបញ្ជាក់ទៀតថា ប្រតិបត្ដិការខាងលើនេះ ក្រៅពីការឃាត់ ខ្លួនមនុស្សទាំង ១១នាក់ ដែលមានម្ចាស់ទីតាំងផង កម្លាំងសមត្ថកិច្ច ក៏បានដកហូត ទូហ្គេមស្ទូចត្រីចំនួន ១ផងដែរ ។ បច្ចុប្បន្ន មនុស្សទាំង ១១នាក់ ត្រូវបានសមត្ថកិច្ច បញ្ជូនទៅមូលដ្ឋានកងរាជអាវុធហត្ថខណ្ឌសែនសុខ ដើម្បីធ្វើការសាកសួរបន្ត ។
តាមប្រភពព័ត៌មានបានឱ្យដឹងថា ទីតាំងហ្គេមស្ទូចត្រីនេះ មានស្ទើរគ្រប់ទីកន្លែង ក្នុងរាជធានីភ្នំពេញ ជាពិសេសតាមផ្សារទំនើប ដូចជាផ្សារស្ទឹងមានជ័យថ្មី និងផ្សារ សុវណ្ណាជាដើម ៕
