បាត់ដំបង: យ៉ាងហោចណាស់ក៏មានមនុស្សចំនួន3នាក់ត្រូវបានស្លាប់ភ្លាមៗក្នុងចំណោមជនរងគ្រោះចំនួន4នាក់ខណ:ដែលពួកគេកំពុងឈរនៅលើចិញ្ចើមថ្នល់ខាងមុខរោងការត្រង់ចំនុចភូមិស្រះកែវ
ឃុំកំពង់ព្រះ ស្រុកសង្កែ ខេត្តបាត់ដំបង នៅវេលាម៉ោង11,40នាទីថ្ងៃហើយត្រូវរថយន្តរេចង្កូត
ចុះពីផ្លូវជាតិលេខ5ទៅបុកទាំងកំរោលតែម្តង ។ យោងតាមរបាយការរបស់សមត្ថកិច្ចដែលបានស្រង់សំដីពីប្រភពមួយចំនួនអោយដឹងថានៅមុនពេលកើតហេតុគឺមានរថយន្តមួយគ្រឿងម៉ាកហុីយ៉ាន់ដាយព៌ណស ពាក់ស្លាកលេខភ្នំពេញ
3B 3967បានបើកបរយ៉ាងលឿនក្នុងទិសដៅពីបាត់ដំបងទៅភ្នំពេញ ។ របាយការបានបន្តថា លុះទៅជិតដល់ចំនុចកើតហេតុរថយន្តនោះបានព្យាយាមឡើងជែង រថយន្តមួយគ្រឿងទៀតដែលកំពុងបើកបរស្របទិសគ្នានៅពីមុខ ប៉ុន្តែជាចៃដន្យនៅពេលដែលបំរុងនឹងជែងនោះក៏ត្រូវបានអាក់ខានទៅវិញដោយសារតែមានឧបសគ្គនៅពីមុខគឺមានរថយន្តមួយគ្រឿងកំពុងធ្វើដំណើរច្រាស់ទិសគ្នា ដូច្នេះធ្វើអោយរថយន្តបង្កនេះត្រូវបួងចង្កូតអែបចូលទៅស្តាំវិញ ប៉ុន្តែដោយសារតែល្បឿនលឿនផងនោះធ្វើអោយរថយន្តនេះជ្រុលធ្លាក់ចុះទៅដល់ចិញ្ចើមផ្លូវ ហើយក៏បានបុករះទៅលើមនុស្សជាច្រើននាក់ដែលកំពុងឈរចាំគ្នីគ្នានៅខាងមុខរោងការដើម្បីចូលទៅញាំការ
ធ្វើអោយមនុស្សចំនួន3នាក់ត្រូវបានស្លាប់ និងម្នាក់ទៀតរងរបួសជាទម្ងន់ ។ សមត្ថកិច្ចបានបន្ថែមថា ភ្លាមៗនោះកំលាំងបានដេញតាមរថយន្តបង្កដែលគេបានព្យាយាមបើករត់គេច ប៉ុន្តែបានតែប៉ុន្មានរយម៉ែត្រប៉ុណ្ណោះពេលដែលឃើញសភាពការមិនស្រួល
អ្នកបើកបរបានចតរថយន្តទុកចោលហើយរត់គេចខ្លួនបាត់ស្រមោលតែម្តងដោយបន្សល់តែរថយន្ត
និងជនរងគ្រោះដេកស្លាប់ត្រៀបត្រានៅក្បែចិញ្ចើមផ្លូវតែប៉ុណ្ណោះ ។ ជនរងគ្រោះទាំងនោះមានឈ្មោះ 1ព្រឿន ឧត្តម ភេទប្រុស អាយុ14ឆ្នាំរស់នៅភូមិស្រះកែវឃុំកំពង់ព្រះ (ស្លាប់) 2ឯម សុខន់ ភេទប្រុស អាយុ34ឆ្នាំ រស់នៅភូមិច្រាបក្រសាំង សង្កាត់វត្តគរ
(ស្លាប់) 3ឃឿន សីលៀង ភេទប្រុស អាយុ14ឆ្នាំ រស់នៅភូមិស្រះកែវ ឃុំកំពង់ព្រះ(ស្លាប់) និង4ឈ្មោះហើយ សុីថា ភេទស្រី អាយុ35ឆ្នាំ រស់នៅភូមិស្រះកែវ ឃុំកំពង់ព្រះ របួសធ្ងន់ ។ ភ្លាមៗក្រោយពេលកើតហេតុសមត្ថកិច្ចបានបញ្ជូនជនរងគ្រោះទៅកាន់មន្ទីរពេទ្យដើម្បីសង្គ្រោះចំណែកសពទាំង3នាក់ក៏ត្រូវបានធ្វើការប្រគល់ទៅអោយក្រុមគ្រួសារយកទៅធ្វើបុណ្យរៀងៗខ្លួន
អស់ហើយដែរ រីឯរថយន្តគឺសមត្ថកិច្ចបាននាំយកមករក្សាទុកនៅអធិការដ្ឋានដើម្បីស្រាវជ្រាវ
រកម្ចាស់មកដោះស្រាយតាមផ្លូវច្បាប់ ៕
