កំពង់ឆ្នាំង៖ អំណោយមនុស្សធម៌ដែលដឹកនាំលោក ថោង ចំរើន ប្រធានមន្ទីរសង្គមកិច្ចអតីតយុទ្ឋជន និងយុវនិតិសម្បទាខេត្តកំពង់ឆ្នាំង នៅព្រឹកថ្ងៃទី២៩ ខែមករា ឆ្នាំ២០១៥ បាននាំយកទៅចែកជូនគ្រួសារពិការក្រីក្រ និងចាស់ជរាគ្មានទីពឹងចំនួន៥គ្រួសារ នៅស្រុកសាមគ្គីមានជ័យ ពីធីនេះមានចូលរួមពីអាជ្ញាធរភូមិឃុំ លោកអភិបាលរងស្រុក និងសភាពសហព័ន្ឋយុវជនស្រុកសាមគ្គីមានជ័យផងដែរ ។
លោក ថោង ចំរើន ប្រធានមន្ទីរសង្គមកិច្ច អតីតយុទ្ឋជន និងយុវនិតិសម្បទាខេត្តបាននិយាយអោយដឹងថា៖ ដោយមានការអំពាវនាវពីរូបលោកចំពោះគ្រួសារជនពិការក្រីក្រខាងលើនេះ លោក លាង សេង ប្រធានមន្ទីរអភិវឌ្ឍន៏ជនបទខេត្តកំពង់ឆ្នាំង បានឧបត្ថមទឹកប្រាក់ផ្ទាល់ខ្លួនចំនួន១លានរៀល អោយលោកៗបាន យកទៅចាត់ចែងទិញគ្រឿងឧបភោគបរិភោគ ជូនគ្រួសារពិការទាំង៥គ្រួសារ ដែលរស់នៅក្នុងភូមិចំនួន៣ ក្នុងឃុំសេដ្ឋី ស្រុកសាមគ្គីមានជ័យ។ ក្នុងនោះ៣គ្រួសារនៅក្នុងភូមិថ្លុកឬស្សី មាន១ ឈ្មោះ ញ៉េច ថុង ភេទប្រុស អាយុ៤២ឆ្នាំ ពិការភ្នែកទាំង២ , ២ឈ្មោះ អ៊ុច ញឹង ភេទស្រី អាយុ ៧៤ឆ្នាំ ពិការជើងស្តាំ , ៣ឈ្មោះ ញ៉េម ម៉ុន ភេទស្រី អាយុ៧៤ឆ្នាំ ពិការជើងស្តាំ , ៤ឈ្មោះ ញឹម ប៉ាត ភេទប្រុស អាយុ៥៤ឆ្នាំ ពីការភ្នែកទាំង២រស់នៅភូមិពារាជ្យ និង៥ឈ្មោះ មាស ធន ភេទស្រី អាយុ៥៨ឆ្នាំ ពិការភ្នែកទាំង២ រស់នៅភូមិចំការស្វាយ។ក្នុងមួយគ្រួសារៗទទួលបាន អង្ករ ២០គីឡូក្រាម មី១កេះទឹកត្រី១យួរ ទឹកស៊ីអ៊ីវ១យួរ ត្រីខ១២កំប៉ុង ប្រេងឆា១ដប (ចំណុះ១លីត្រ) ប៊ីចេង១កញ្ចប់ និងថវិកា១២ម៉ឺនរៀល ។
លោក សោម ម៉េង អភិបាលរងស្រុកសាមគ្គីមានជ័យបានថ្លែងអំណរគុណថាៈ ជំនួស មុខអោយក្រុមគ្រួសារពិការក្រីក្រខាងលើ លោកសូមថ្លែងអំណរគុណចំពោះលោកប្រធានមន្ទីរសង្គមកិច្ចខេត្ត ដែលបាននាំអំណោយទាំងនេះមកចែកជូនគ្រួសារខាងលើ ពិសេសសូមថ្លែងអំណរគុណដល់លោក លាង សេង ប្រធានមន្ទីរអភិវឌ្ឍន៏ជនបទខេត្ត ដែលបានចំណាយថវិការផ្ទាល់ខ្លួន ផ្តល់អំណោយមនុស្សធម៏ដើម្បីរួមចំណែកជាមួយប្រមុខរាជរដ្ឋាភិបាល និងកាកបាទក្រហមកម្ពុជា ជួយដល់គ្រួសារពិការក្រីក្រ និងសូមជូនពរអោយអស់លោកជួបតែនឹងសេចក្តីសុខ មានអាយុវណ្ណៈ សុខៈ និងពលៈ ជារៀងរហូតតទៅ៕
( ឈៀង ថារិទ្ធ )