ខេត្ដក្រចេះ៖ ស្ត្រីជនជាតិខ្មែរឥស្លាមម្នាក់ត្រូវបានកម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តក្រចេះ បញ្ជូនខ្លួនទៅសាលាតំបូងខេត្តកាលពីវេលាម៉ោង១០នឹង៣០នាទីព្រឹកថ្ងៃទី២ ខែកុម្ភះ ឆ្នាំ២០១៥ បន្ទាប់ពីស្ត្រីរូបនេះនិងបក្សពួកម្នាក់ទៀតធ្វើចរាចរក្រដាសប្រាក់ដុល្លាក្លែងក្លាយប្រភេទ២០ដុល្លាជាច្រើនសន្លឹកមកចាយនៅក្នុងពិធីបុណ្យនៅក្នុងវត្តព្រែកចម្លាក់ ស្ថិតនៅក្នុងភូមិព្រែកចម្លាក់ ឃុំកញ្ជរ ស្រុកឆ្លូង កាលពីយប់ថ្ងៃទី៣១ ខែមករា ឆ្នាំ២០១៥ ចុងសប្តាហ៍កន្លងមកនេះ ។
ប្រភពពីមន្ត្រីនគរបាលសេដ្ឋកិច្ចបានឲ្យដឹងថា ស្ត្រីជនសង្ស័យខាងលើមានឈ្មោះ សុះ វី អាយុ៣៥ឆ្នាំ ជនជាតិខ្មែរឥស្លាម មានមុខរបរមិនពិតប្រាកដ រស់នៅភូមិកាប្រាំ ឃុំទំពាំងឬស្សី ស្រុកត្បូងឃ្មុំ ខេត្តត្បូងឃ្មុំ ។បើយោងតាមចម្លើយសារភាពរបស់ស្ត្រីជនសង្ស័យរូបនេះ បានប្រាប់សមត្ថកិច្ចឲ្យដឹងថា លុយដុល្លាក្លែងក្លាយនេះគឺរូបគេបានមកពីជនម្នាក់ផ្សេងទៀតប្រគល់ឲ្យមកដើម្បីយកទៅចាយ បំណងឆបោកយកលុយពិតប្រាកដត្រឡប់មកវិញ ។
នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តក្រចេះ លោកវរសេនីយ៍ទោ កែវ សុគៀន បានបញ្ជាក់ប្រាប់ឲ្យដឹងថា ស្ត្រីជនសង្ស័យខាងលើគឺត្រូវកម្លាំងនគរបាលអធិការដ្ឋានស្រុកឆ្លូងធ្វើការឃាត់ចាប់ កាលពីថ្ងៃទី៣១ ខែមករាចុងសប្តាហ៍កន្លងមក បន្ទាប់ពីជនសង្ស័យរូបនេះបានយកលុយដុល្លាប្រភេទក្រដាស២០ដុល្លា ដើរចាយទិញរបស់របរបន្តិចបន្តួចពីអ្នកលក់ដូរនៅក្នុងវត្តព្រែកចម្លាក់ហើយឲ្យអ្នកលក់អាបលុយពិតប្រាកដមកឲ្យខ្លួនវិញ ។
នាយការិយាល័យបានបញ្ជាក់ទៀតថា ក្រោយពេលឃាត់ចាប់ស្ត្រីជនសង្ស័យខាងលើ សមត្ថកិច្ចដកហូតបានវត្ថុតាងរួមមាន៖ ប្រាក់រៀលចំនួន២៦៨.៧០០រៀល ទូរស័ព្ទដែម៉ាកណូគា(អិនចុចពិល)ចំនួន១គ្រឿង ដោយឡែកក្រដាសប្រាក់ដុល្លាក្លែងក្លាយប្រភេទ២០ដុល្លា ចំនួន១៦សន្លឹកដែលបានមកពីប្រជាពលរដ្ឋយកមកប្រគល់ឲ្យសមត្ថកិច្ចនោះ គឺស្ត្រីជនសង្ស័យឈ្មោះ សុះ វី ទទួលស្គាល់ថាជារបស់ខ្លួនតែចំនួន០៦សន្លឹកប៉ុណ្ណោះ រីឯក្រដាសប្រាក់ដុល្លាចំនួន១០សន្លឹកទៀតគឺជារបស់ឈ្មោះ សុះ តស់ ។
លោកវរសេនីយ៍ទោ ហុង សុខលី អនុការិយាល័យកណ្តាល នគរបាលប្រឆាំងបទល្មើសសេដ្ឋកិច្ចខេត្តក្រចេះ បានបញ្ជាក់ឲ្យដឹងថា ក្រោយពីសមត្ថកិច្ចដកហូតបានវត្ថុតាងជាក់ស្តែង និងយោងទៅតាមចម្លើយសារភាពរបស់ស្ត្រីជាជនសង្ស័យ ពេលនេះកម្លាំងនគរបាលជំនាញបានកសាងសំនុំឯកសារគ្រប់គ្រាន់ ហើយបានបញ្ជូនជនសង្ស័យទៅសាលាតំបូងខេត្តក្រចេះដើម្បីចាត់ការបន្តតាមនីតិវិធីច្បាប់ ។ ចំណែកបក្សពួករបស់ស្ត្រីសង្ស័យរូបនេះ ដែលជាប់ពាក់ព័ន្ធនឹងការធ្វើចរាចរក្រដាសប្រាក់ដុល្លាក្លែងក្លាយ ពេលនេះកម្លាំងនគរបាលកំពុងតែកំណត់មុខសញ្ញាតាមចាប់ខ្លួនមកផ្តន្ទាទោសតាមច្បាប់៕
