ខេត្តកំពង់ធំៈ លោក រស់ វុទ្ធី នាយរងអធិការដ្ឋានរដ្ឋបាលជលផលខាងជើងបឹងទន្លេសាប និងលោក យ៉ាន់ វីសាក់ នាយផ្នែករដ្ឋបាលជលផលផាត់សណ្តាយ ដឹកនាំកំលាំងចម្រុះចុះបង្ក្រាបទីតាំងដាក់សម្រាស់ នៅចំនុចអន្លង់តាសោម ក្នុងភូមិសាស្ត្រទឹកដីឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីព្រឹកថ្ងៃទី ០៣ ខែ កុម្ភះ ឆ្នាំ ២០១៥ ។
សូមបញ្ជាក់ផងដែរថា ដោយមានការព្រួយបារម្ភណ៍ ពីសំណាក់ប្រមុខរាជរដ្ឋាភិបាលដែលមានសម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា បានដាក់បទបញ្ជារឲ្យរដ្ឋបាលជលផល គ្រប់ខេត្តក្រុង និងមានការចូលរួមពីសំណាក់សហគមន៍ មេភូមិ មេឃុំ និងប្រជាពលរដ្ឋ ឲ្យចូលរួមលុបបំបាត់ឲ្យអស់ នូវការដាក់ព្រួល របាំង អួនប្រឡាញឹក ស្បៃមុង សម្រាស់ រុញស៊ីប និងការប្រើប្រាស់ឧបករណ៍នេសាទដោយ ត្រូវបានឃាត់ដែលបានដាក់កាត់បឹង ព្រែក ទន្លេ ក្នុងគោលបំណងថែរក្សាមឆ្ឆាជាតិ និងជាការបើកផ្លូវឲ្យត្រី ធ្វើចរាចរណ៍ឡើងចុះ ក្នុងនោះដែរក៏គេឃើញមានផ្នែកខ្លះ សង្កាត់មួយចំនួនពុំទាន់បានអនុវត្តនូវវិធានការនេះនៅឡើយ ថែមទាំងបើកភ្លើងខៀវឲ្យមានការនេសាទដោយប្រើប្រាស់ឧបករណ៍ហាមឃាត់ទាំងនេះ ជាក់ស្តែងនៅក្នុងភូមិសាស្ត្រកំពង់ស្វាយ គេសង្កេតឃើញមានសម្រាស់ និងដាក់មោងក្រឡាញឹកផ្ទុយពីអនុសាស្ត្ររបស់ថ្នាក់ដឹកនាំ។
លោក យ៉ាន វិសាក់ នាយផ្នែករដ្ឋបាលជលផលផាត់សណ្តាយ បានឲ្យដឹងថា ខណៈនេះកំពុងតែអនុវត្តនូវតួនាទីរបស់ខ្លួន ក្នុងការចុះបង្ក្រាប បទល្មើស និងទប់ស្កាត់ការប្រើប្រាស់ឧបករណ៍នេសាទដោយខុសច្បាប់ និងមានការចូលរួមពីសហគមន៍ មេភូមិ មេឃុំ និងកម្លាំងសមត្ថកិច្ច ដូចជាថ្ងៃនេះជាដើម កម្លាំងចម្រុះបានចុះរួញសម្រាស់ចំនួន៦ដុំនៅចំនុច ចុងព្រែកតាសោម២ដុំ និងចំនុចចុងស្ពានសែន២ដុំ ព្រំប្រទល់ខេត្តកំពង់ឆ្នាំង ដោយយោងតាមប្រសាសន៍របស់ ឯកឧត្តម អេង ជាសាន ប្រតិភូរាជរដ្ឋាភិបាល និងជាប្រធានរដ្ឋបាលជលផល ឲ្យខណ្ទរដ្ឋបាលជលផលកំពង់ធំ សហការជាមួយអាជ្ញាធរ ចុះបង្ក្រាបជាបន្តបន្ទាប់ ។
លោក រស់ វុទ្ធី នាយរងអធិការដ្ឋានរដ្ឋបាលជលផលខាងជើងបឹងទន្លេសាប បានឲ្យដឹងថា ក្នុងកិច្ចសហការ បង្ក្រាបបទល្មើសនេសាទនេះគឺត្រូវបានធ្វើឡើងជាប្រចាំក្នុងភូមិសាស្ត្រទឹកដីខេត្តកំពង់ធំ ដោយហាមមិនឲ្យមានការដាក់សម្រាស់ និងប្រើប្រាស់ឧបករណ៍នេសាទបន្តទៀត ក្នុងនោះនិងមានការផ្សព្វផ្សាយស្តីពីច្បាប់ជលផលដល់សហគមន៍ និងប្រជាពលរដ្ឋ ឲ្យមានការយល់ដឹងកាន់តែស៊ីជំម្រៅ ដើម្បីជួយគ្នាទប់ស្កាត់ការនេសាទខុសច្បាប់។