សៀមរាប នៅថ្ងៃទី០៤ ខែកុម្ភៈ ឆ្នាំ២០១៥ ដែលជាថ្ងៃបើកកិច្ចដំណើការអង្គសន្និសឹទពិភពលោក ស្តីពីទេសចរណ៍និងវប្បធម៌ ដែលបានប្រព្រឹត្តទៅរយៈពេល២ថ្ងៃនៅក្រុងសៀមរាប-អង្គរក្រោមការចូលរួមពីសំណាក់ប្រតិភូបណ្តាប្រទេសនានា ចំនួន ៩៩ ប្រទេស
នោះ ដោយឡែកក្នុងនាមជាភាគីម្ចាស់ផ្ទះ លោកស្រីភរិយារបស់លោកឧបនាយករដ្ឋមន្ត្រី សុខ អាន បានស្វាគមន៍យ៉ាងកក់ក្តៅ និងបានជូនដំណើរប្រតិភូភរិយាបណ្តាថ្នាក់ដឹកនាំ នៃបណ្តាប្រទេសមួយចំនួនដែលបានអញ្ជើញចូលរួមក្នុងអង្គសន្និសិទពិភពលោកនេះ ទៅធ្វើទស្សនកិច្ច នៅស្រុកបន្ទាយស្រី ខេត្តសៀមរាប ។ 
នៅក្នុងដំណើរទស្សនកិច្ចនេះ គឺមានការរៀបចំឆ្ពោះទៅរកគោលដៅចំនួន៣ជាសំខាន់ ដែលទាក់ទងទៅនឹងវប្បធម៌ប្រពៃណីរស់នៅរបស់ប្រជាជន ប្រវត្តិសាស្ត្រ និង ទេសចរណ៍ ។ ការស្វែងយល់អំពីប្រពៃណីរស់នៅរបស់ប្រជាជន គឺមានការទាក់ទងទៅនឹងមុខរបរ និង ជីវភាព ។ នៅក្នុងនេះ ចំណីអាហារនិងរសជាតិម្ហូបខ្មែរ ក៏ជាចំណែកមួយដ៏សំខាន់ផងដែរ ។ ប្រតិភូភរិយាថ្នាក់ដឹកនាំ បានអញ្ជើញទៅដល់ភូមិអូរទទឹង ឃុំព្រះដាក់ ស្រុកបន្ទាយស្រី ដែលជាមូលដ្ឋានស្ថិតក្រោមចំណាប់អារម្មណ៍របស់ភ្ញៀវជាតិនិងអន្តរជាតិ ថាជាមូលដ្ឋានល្បីឈ្មោះ មានលក់នំបញ្ចុកឆ្ងាញ់ ។ 
នៅក្នុងមូលដ្ឋានមួយនេះ គណប្រតិភូ បានស្វែងយល់អំពីរបៀបធ្វើនំបញ្ចុក នឹងបានភ្លក់រសជាតិនំបញ្ចុកនោះផងដែរ ។ ពួកគាត់មានចំណាប់អារម្មណ៍ថា របៀបធ្វើនំបញ្ចុកខ្មែរ គឺវាស្មុគ្រស្មាញបន្តិច ប៉ុន្តែវាមានរសជាតិឆ្ងាញ់ពិសា ។ គួរបញ្ជាក់ថា នំបញ្ចុកខ្មែរ គឺជាប្រភេទអាហារពិសេសរបស់ខ្មែរ ដែលភាគច្រើននៅក្នុងសង្គមខ្មែរ គេច្រើនធ្វើនំបញ្ជុកសម្រាប់ទទួលភ្ញៀវក្នុងពិធីបុណ្យទានផ្សេងៗ ឬក៏ធ្វើនំបញ្ចុកសម្រាប់លក់តែម្តង ។ នៅក្នុងគ្រួសារខ្មែរ ពុំសូវមានឱកាស បានធ្វើនំបញ្ចុក សម្រាប់ទទួលទានជាលក្ខណៈគ្រួសារនោះឡើយ ។
នៅក្នុងដំណើទស្សនកិច្ចនោះ ផលិតផលស្ករត្នោត ក៏ជាទីចាប់អារម្មណ៍របស់គណប្រតិភូផងដែរ ។ អ្នកភូមិសណ្តាយ ឃុំខ្នារសណ្តាយ ដែលស្ថិតនៅតាមបណ្តោយដងផ្លូវទៅប្រាសាទបន្ទាយស្រី បាននិយាយប្រាប់គណប្រតិភូឲ្យបានជ្រាបថា ត្នោត គឺមានសារសំខាន់ខ្លាំងណាស់សម្រាប់ជីវភាពរស់នៅរបស់ពួកគាត់ ព្រោះត្នោតបានផ្តល់ប្រាក់ម្រៃបន្ថែមដល់គ្រួសាររបស់ពួកគាត់ ក្រៅអំពីការធ្វើស្រែ ។ 
គ្រួសារមួយដែលបានទទួលប្រតិភូដោយក្តីរាក់ទាក់បំផុតនោះ បាននិយាយថា អ្នកស្រុកក្នុងភូមិមួយនេះ ក្រៅពីការផលិតស្ករត្នោត ទឹកត្នោតក៏អាចលក់បាន ដើមត្នោតក៏អាចច្នៃប្រឌិតជាសម្ភារផ្សេងៗសម្រាប់ដាក់តាំងលក់ ហើយក្រៅពីនេះ ទាំងស្លឹក ទាំងធាងត្នោត សុទ្ធតែមានប្រយោជន៍សម្រាប់ជីវភាពរស់នៅរបស់ក្រុមគ្រួសាររបស់ពួកគាត់ ។ ពួកគាត់បាននិយាយបន្តឲ្យដឹងថា កើតចេញអំពីត្នោត គាត់អាចរកម្រៃបានពីភ្ញៀវទេសចរណ៍ ។ ជាមួយនឹងការស្វែងយល់អំពីការធ្វើស្ករត្នោត និងបានយល់ជ្រាបអំពីអត្ថប្រយោជន៍នៃដើមត្នោត គណប្រតិភូក៏បានភ្លក់រសជាតិស្ករត្នោត និង នំផ្លែអាយផងដែរ ។ ពួកគាត់បាននិយាយថា ស្ករត្នោតខ្មែរមានក្លិនឈ្ងុយ ផ្អែមឆ្ងាញ់ពីធម្មជាតិពិតៗ ហើយនំផ្លែអាយ ងាយស្រួលធ្វើ នឹងមានរសជាតិឆ្ងាញ់ ជាបង្អែមធម្មជាតិ ។
សម្រាប់ដំណើរទស្សនកិច្ចនេះ ប្រាសាទបន្ទាយស្រី គឺជាគោលដៅនៃការលើកបង្ហាញជូនភ្ញៀវ អំពីវិស័យទេសចរណ៍ វប្បធម៌ និង ប្រវត្តិសាស្ត្រ ដូចដែលអ្វី ដែលជាប្រធានបទនៃអង្គសន្និសិទពិភពលោក កំពុងប្រើប្រាស់ទំព័រប្រវត្តិសាស្ត្រថ្មី ដើម្បីជម្រុញឲ្យវិស័យទេសចរណ៍មានឱកាសដ៏ពេញលេញ បំពេញតួនាទីរបស់ខ្លួន ចូលរួមលើកស្ទួយ ការ ការពារវប្បធម៌ និងបានផ្សារភ្ជាប់វិស័យទាំងពីរ ( ទេសចរណ៍និងវប្បធម៌ ) ទៅនឹងជីវភាពរបស់ប្រជាពលរដ្ឋ ៕
