ភ្នំពេញ៖ អាជ្ញាធររាជធានីភ្នំពេញ និងអាជ្ញាធរអគ្គិសនីកម្ពុជាបានជួបពិភាក្សាគ្នាមួយ ដើម្បីរកដំណោះស្រាយ ពីបញ្ហា តម្លៃភ្លើង នឹងការតបណ្តាញភ្លើងអគ្គិសនីចូលផ្ទះ និងបន្ទប់ជួលរបស់កម្មករនៅរាជធានីភ្នំពេញ ខណៈពេលគិតត្រឹមថ្ងៃទី៤ ខែកុម្ភៈ អគ្គិសនីកម្ពុជា បានតណ្តាញភ្លើង ចូលក្នុងបន្ទប់ជ្ទះជួល របស់កម្មករ បានប្រមាណជិត ៥០០០ បន្ទប់ហើយនោះ។ កិច្ចពិភាក្សានេះ បានប្រព្រឹត្ដទៅកាលពីថ្ងៃទី០៥ ខែកុម្ភៈ ឆ្នាំ ២០១៥ នៅសាលារាជ ធានីភ្នំពេញ រវាង លោកប៉ា សុជាតិវង្ស អភិបាលរាជធានីភ្នំពេញ និងលោក កែវ រតនៈ ប្រតិភូរាជរដ្ឋាភិបាលទទួលបន្ទុកប្រធានអគ្គិសនីកម្ពុជា។
លោកប៉ា សុជាតិវង្ស បានបញ្ជាក់ថា៖ ដើម្បីឲ្យតម្លៃភ្លើងចុះថោក គឺត្រូវយ៉ាងម៉េចឲ្យការផលិតភ្លើងបានច្រើន ទៅតាមតម្រូវការរបស់ប្រជាពលរដ្ឋ ពេលនោះ តម្លៃភ្លើង នឹងចុះថោកហើយ”។ លោកក៍ បានស្នើឲ្យអាជ្ញាធរខណ្ឌទាំងអស់ដែលមានកម្មករស្នាក់នៅផ្ទះជួល ត្រូវចុះស្រង់ស្ថិតិ ឲ្យបានច្បាស់លាស់ ដើម្បីផ្ទៀងផ្ទាត់ឲ្យបានត្រឹមត្រូវ ជាមួយអង្គការជំនាញ ដោយសារមកដល់ពេលនេះ អគ្គិសនីកម្ពុជា បានចុះតបណ្តាញអគ្គិសនីជូនដល់ផ្ទះនិងបន្ទប់ជួលរបស់កម្មករ ជាបណ្តើរមកហើយ បានប្រមាណជិត ៥០០០បន្ទប់ ខណៈពេលបន្ទប់ជួលកម្មករនៅរាជធានីមាន ៨២៤៧៥ លើកលែងតែ ខណ្ឌព្រែកព្នៅមិនទាន់មានរបាយការណ៍បន្ទប់ជួលកម្មករ។ លោកបានបន្តថា៖ដើម្បីឲ្យកម្មករទទួលបានសេវាទឹក ភ្លើង ថោក ពីគោលនយោបាយថ្មីរបស់រាជរដ្ឋាភិបាល ដោយកន្លងសម្តេចតេជោ ហ៊ុន សែន បានបញ្ជាឲ្យអង្គភាពជំនាញទាំងនោះ បញ្ចុះតម្លៃភ្លើង ផ្ទះជួល ទឹក ឲ្យកម្មករ និងគិតគូពីសុខទុករបស់កម្មករ”។
ពាក់ព័ន្ធនឹងការតបណ្តាញទឹកភ្លើងនោះដែរ លោកក៍ បានបញ្ជាឲ្យមន្ទីរចំនួនពីរ ត្រូវចុះធ្វើការជាមួយអាជ្ញាធរខណ្ឌនិងក្រសួងជំនាញ គឺមន្ទីរឧស្សាហកម្ម ទៅផ្សាភ្ជាប់ជាមួយក្រសួងឧស្សាហកម្ម រដ្ឋាករស្វយ័ត អាជ្ញាធរខណ្ឌ ក្នុងការបញ្ចុះតម្លៃទឹក និងមន្ទីររ៉ែនិងថាមពល ត្រូវផ្សាភ្ជាប់ឲ្យជិតស្និទ្ធជាមួយក្រសួងរ៉ែនិងថាមពល និងអគ្គិសនីកម្ពុជា ជាមួយអាជ្ញាធរខណ្ឌ ដើម្បីជំរុញការបញ្ចុះតម្លៃភ្លើង។ជាមួយគ្នានោះដែរ លោកអភិបាល បានណែនាំឲ្យអភិបាលខណ្ឌទាំងអស់ ត្រូវចុះណែនាំម្ចាស់ផ្ទះជួល កុំធ្វើការតម្លើងថ្លៃផ្ទះជួល ខណៈពេលដែលរាជរដ្ឋាភិបាលបានយកធ្វើការទុកដាក់លើជីវភាពរបស់កម្មករ ក្នុងការបញ្ចុះតម្លៃភ្លើង នៅតាមផ្ទះនិងបន្ទប់ជួល
របស់កម្មករ។
លោកបន្ដថា៖ អាជ្ញាធរខណ្ឌ ត្រូវធ្វើស្រង់ស្ថិតិបន្ទប់ផ្ទះឲ្យបានត្រឹមត្រូវ ដោយមានតួលេខខុសគ្នា រវាងអាជ្ញាធរខណ្ឌ និងរដ្ឋាករទឹក ព្រោះថា តួលេខរបស់អាជ្ញាធរខណ្ឌបន្ទប់ផ្ទះជួលមានជាង ៨១៣៥៨ បន្ទប់ ចំណែកតួលេខរបស់រដ្ឋាករទឹក មានជាង ៩០៤៧៨ បន្ទប់ជួល។ ជាការឆ្លើយតបនិងការលើកឡើងរបស់អាជ្ញាធរខណ្ឌពោធិសែនជ័យ និងខណ្ឌដង្កោ អំពីការស្នើសុំឲ្យមានភ្លើងនិងទឹកថោកសម្រាប់ប្រជាពលរដ្ឋក្រីក្រនៅតាមជាយក្រុងដែលទើបកាត់មកពីខេត្តកណ្តាល លោកអភិបាលបានថ្លែងថា អាជ្ញាធរខណ្ឌត្រូវចាត់វិធានការ ត្រូវធ្វើយ៉ាងណាឲ្យប្រជាពលរដ្ឋក្រីក្រនៅតាមជាយក្រុង បានប្រើប្រាស់ភ្លើងក្នុងតម្លៃថោកសមរម្យ ពីព្រោះនៅពេលបច្ចុប្បន្ននេះ ប្រជាពលរដ្ឋក្រីក្រហើយ បែរជាប្រើភ្លើងថ្លៃទៅវិញ ចំណែកឯអ្នកមាននៅក្នុងទីក្រុងភ្នំពេញ បែរជាប្រើប្រាស់ភ្លើងថោក ដូច្នេះត្រូវធ្វើការកាត់គម្លាតរវាងអ្នកមាននិងអ្នកក្រ។
លោកកែវ រតនៈ ប្រតិភូរាជរដ្ឋាភិបាល ទទួលបន្ទុកប្រធានអគ្គិសនីកម្ពុជា បានបញ្ជាក់ថា៖ ដោយមានការសហការល្អរវាងសាលាក្រុង និងសាលាខណ្ឌ ចុះតាមផ្ទះជួល ធ្វើការកត់ត្រាផ្ទះជួលរបស់កម្មករហើយក្នុងពេលចុះតបណ្តាលនាពេលកន្លងមកបានល្អនិងទទួលជោគជ័យ តាមគោលការណ៍ណែនាំរបស់សម្តេចតេជោ។ អគ្គិសនីកម្ពុជា គឺអង្គភាពជំនាញមួយ បានត្រៀមសម្ភារៈបច្ចេកទេសនិងថវិកា បានគ្រប់ចំនួនហើយ សម្រាប់តបណ្តាញភ្លើងឲ្យកម្មករ ដើម្បីឲ្យកម្មករបានប្រើប្រាស់ភ្លើងក្នុងតម្លៃ៦១០ រៀលក្នុង ១ គីឡូវ៉ាត់ម៉ោង ក្រោម ៥០ គីឡូវ៉ាត់ម៉ោង ក្នុងមួយខែ ៕