មានក្រុមហ៊ុនឯកជនដឹកដីជាច្រើន ដូចជា ក្រុមហ៊ុន ខាត់ថៃ ក្រុមហ៊ុន គួយហួច និងក្រុមហ៊ុនជាច្រើនទៀត កំពុងតែធ្វើសកម្មភាពដឹកជញ្ជូនអាចម៍ដីរាល់ថ្ងៃ ចំពោះអាជ្ញាធរវិញ មិនរវល់អើពើ នាំគ្នាស្ងាត់មាត់ឈឹង ជាក់ស្តែង ដូចជានៅចំណុចភូមិអូរថ្កូវ សង្កាត់រលាប ក្រុងពោធិសាត់ ខេត្តេពោធិសាត់ ឡានដីដឹកតាមផ្លូវបំបែកលាជ និងតាមផ្លូវជាតិលេខ៥ ចូលមកក្រុងពោធិសាត់ យ៉ាងគគ្រឹកគគ្រេងរាល់ថ្ងៃ បណ្តាលអោយមានផលប៉ះពាល់ដល់ផ្លូវសាធារណៈ និងសុខភាពបងប្អូនប្រជាពលរដ្ឋ រស់នៅតាមដងផ្លូវ ធ្វើអោយអាចម៍ដី ធ្លាក់ប៉ាយពេញផ្លូវ គ្មានការគ្របហ៊ុំព័ទ្ធ ម្យ៉ាងទៀត ធ្វើអោយប៉ះពាល់ដល់ការធ្វើដំណើរ ដល់ភ្ញៀវទេសចរណ៍ ដែលមកទស្សនានៅក្នុងខេត្តទៀតផង ។
ប្រជាពលរដ្ឋបានអោយដឹងថា រាល់ថ្ងៃមានការធុញទ្រាន់ និងឡានដឹកដី ដែលក្រុមហ៊ុនឈ្មួញរកស៊ីដឹកដីត្រូវរ៉ូវជាមួយអាជ្ញាធរ ដឹកគ្មានសណ្តាប់ធ្នាប់បែបនេះ គិតតែប្រយោជន័ផ្ទាល់ខ្លួន មិនគិតពីប្រយោជន៍រួម ធ្វើអោយប្រជាពលរដ្ឋទូទៅ មានការអន់ចិត្ត រិះគន់យ៉ាងខ្លាំងគ្រប់ៗគ្នា ។
ប្រជាពលរដ្ឋបន្តថា ពួកគេនាំគ្នាដឹកតាមផ្លូវ ចាប់ពីភូមិអូរថ្កូវ សង្កាត់រលាប ចូលក្រុងពោធិសាត់ជារៀងរាល់ថ្ងៃ ហេតុនេះហើយ ប្រជាពលរដ្ឋ សិស្សានុសិស្ស និងកម្មករ កម្មការិនីរោងចក្រកាត់ដេរ ធ្វើដំណើរតាមផ្លូវ សំណូមពរដល់អាជ្ញាធរ និងឯកឧត្តម ម៉ៅ ធនិន្ទ អភិបាលនៃគណអភិបាលខេត្ត មេត្តាជួយអន្តរាគមន៍ លើក្រុមហ៊ុនដឹកជញ្ជូនដី ដែលកំពុងធ្វើសកម្មភាពដឹកជញ្ជូន យ៉ាងអាណាធិបតេយ្យទាំងអស់នេះ ដែលធ្វើអោយប៉ះពាល់ដល់សុខភាព និងការធ្វើដំណើរ របស់ប្រជាពលរដ្ឋ អោយបានស្រួលផង ៕
