ភ្នំពេញ៖ បុរសម្នាក់បានគៀបជាប់នៅក្នុងរថយន្តរងរបួសធ្ងន់បាក់ភ្លៅខាងស្តាំ ខណៈពេលដែល រថយន្តរបស់គាត់បានបែកកង់ខាងក្រោយ រួចបើករកកន្លែងប៉ះកង់ ប៉ុន្តែមិនមានកន្លែងប៉ះកង់នៅតាមផ្លូវឡើយ រួចក៏រីយ៉ែថយក្រោយត្រឡប់ទៅវិញ ដោយបុរសនោះកំពុងតែនិយាយទូរស័ព្ទ ហើយរថយន្តរីយ៉ែថយក្រោយដោយដៃមួយចហៀង ក៏ជ្រុលធ្លាក់ផ្លូវជម្រៅជាង១០មែត្រ បណ្តាលអោយរថយន្តរមៀលចូលបោកទៅនិងចំណោតផ្លូវ ក្រឡាប់៦ ទៅ៧ជុំ ខ្ទាតកញ្ចក់ចេញពីរថយន្តរាយប៉ាយពេញដី រងការខូចខាតខ្ទេចរថយន្តមួយទាំងស្រុង។ហេតុការណ៍នេះបានកើតឡើងនៅវេលាម៉ោង៨និង៣០នាទីយប់ ថ្ងៃទី១០ ខែកុម្ភៈ ឆ្នាំ២០១៥ នៅតាមបណ្តោយផ្លូវ១៥១ ក្នុងភូមិសំរោងខាងត្បូង សង្កាត់សំរោង ខណ្ឌព្រែកព្នៅ ។
បុរសរងគ្រោះមានឈ្មោះ ថៃ សុង អាយុ៦០ឆ្នាំ មានទីលំនៅ នៅឯខេត្តព្រះវិហារ មានមុខរបរជាអ្នកលក់ចាប់ហួយនៅខេត្តព្រះវិហារ ។ ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើត បុរសម្នាក់ដែលជាម្ចាស់រថយន្តម៉ាក ស្តារេច ពណ៌ស្លែ ពាក់ស្លាកលេខភ្នំពេញ 2H-0096 បានធ្វើដំណើរពីខេត្តព្រះវិហារ មកទីក្រុងភ្នំពេញ ក្នុងគោលបំណងមកទិញ អីវ៉ាន់នៅផ្សារអូឬស្សីដើម្បីយកទៅលក់នៅខេត្តព្រះវិហារវិញ។ប៉ុន្តែពេលមកដល់ទីក្រុងភ្នំពេញ បុរសនោះបានឈានចូលទៅលេងផ្ទះបងប្អូនរបស់គាត់នៅឯផ្សារព្រែកព្នៅ ព្រមទាំងសម្រាកនៅនិងហូបបាយជុំគ្នាជាមួយនិងបងប្អូន។ បន្ទាប់ពីបានសម្រាកនិងហូបបាយជុំគ្នារួចរាល់ហើយ នៅវេលាម៉ោងប្រហែលជិត៨យប់ ដោយរថយន្តរបស់បុរសនោះបានបែកកង់ខាងក្រោយ បុរសនោះក៏បើករថយន្តរបស់ គាត់យក ទៅប៉ះនៅឯកន្លែងប៉ះកង់រថយន្ត ដោយធ្វើដំណើរចេញពីផ្សារព្រែកព្នៅ រហូតមកដល់ផ្លូវលេខ១៥១ ដោយស្ថានភាពផ្លូវងងឹតហើយបុរសនោះមិនស្គាល់ភូមិសាស្ត្រផងនោះ ជាហេតុធ្វើឲ្យ បុរសនោះ បើករថយន្តតិចៗរកកន្លែងប៉ះកង តែរកកន្លែងប៉ះកង់មិនឃើញ ក៏ទូរស័ព្ទសួរបងប្អូនបណ្តើរ រីយ៉ែថយរថយន្តត្រឡប់មកក្រោយវិញបណ្តើរ ដោយបុរសនោះមិនស្គាល់ស្ថានភាពផ្លូវផង ជាហេតុធ្វើអោយបុរសនោះ រីយ៉ែរថយន្តជ្រុលធ្លាក់ផ្លូវដែលមានជម្រៅជាង១០មែត្រនោះ ធ្វើឲ្យ រថយន្ត ក្រឡាប់៥ទៅ៦ជុំ ខ្ទាតកញ្ចក់រថយន្តធ្លាក់រាយប៉ាយពេញដី ព្រមទាំងគៀប បុរសនោះ ជាប់ក្នុងរថយន្ត របួសធ្ងន់បាក់ភ្លៅខាងស្តាំ ចំណែករថយន្តរងការខូចខាតខ្ទេចរថយន្តមួយទាំងស្រង់។
ជាមួយគ្នានោះដែលនៅមុនពេលកើតហេតុ បុរសនោះបានស្ពាយកាបូបលុយធំមួយ លុះពេលបុរសនោះជួបហេតុការណ៍ខាងលើ កាបូបលុយនោះបានបាត់ពីកន្លែងកើតហេតុ ដោយក្នុងកាបូបនោះមានលុយចំនួន៦០០០ដុល្លាអាមេរិក និងលុយបាទជាង៣ម៉ឺនបាទថែមទៀតផង។ប្រភពពត៌មានដដែលបានបន្តទៀតថា បន្ទាប់ពីមានហេតុការណ៍នេះកើតឡើង មានផ្ទះប្រជាពលរដ្ឋមួយខ្នងដែលរស់នៅក្បែរនិងកន្លែងកើតហេតុបាន លាន់លឺសូរសំ៉ឡេងអ្វីម្យាងដូចជាប្លែក ក៏ស្ទុះចេញទៅមើលឃើញមានរថយន្តមួយគ្រឿងបានធ្លាក់ផ្លូវចូលទៅក្នុងដីរីងទឹក ខណះនោះបុរសម្នាក់ដែលជាម្ចាស់ផ្ទះដែលរស់នៅក្បែរនិងកន្លែងកើតហេតុនោះបានស្រែកហៅ អ្នកជិតខាង បង្កជាការភ្ញាក់ផ្អើលដើម្បីមកជួយសង្គ្រោះបុរសដែលបើករថយន្តធ្លាក់ផ្លូវនោះ។
បន្ទាប់ពីបានជួយយកបុរសដែលគៀបជាប់នៅក្នុងរថយន្តនោះចេញពីក្នុងរថយន្តរួចហើយ បុរសនោះត្រូវបានប្រជាពលរដ្ឋដឹកសង្គ្រោះយកមក មន្ទីរពេទ្យដែលនៅក្បែរនោះ។ ក្រោយពេលកើតហេតុសមត្ថកិច្ចក៏មកដល់កន្លែងកើតហេតុព្រមទាំងហៅរថយន្តស្ទួចមកស្ទួចយករថយន្តដែលធ្លាក់ផ្លូវនោះឡើងមកខាងលើផ្លូវវិញ ដើម្បីប្រគល់ទៅអោយបងប្អូនរបស់បុរសនោះយកទៅជួសជុលដោយខ្លួនឯង៕