បុរសម្នាក់ជាជនជាតិចិន និងរួមដំណើរដោយប្រពន្ធនឹងកូន បើករថយន្តកាមរីឆ្លាមមួយគ្រឿង ក្នុងល្បឿនលឿន ហើយស្ថិតក្នុងស្ថានភាពស្រវឹងផងនោះ បានជ្រុលចង្កូតទៅបុកបង្គោលភ្លើងបំភ្លឺផ្លូវ បណ្តាលឲ្យធ្លាក់អំពូលរាយប៉ាយពេញផ្លូវ នៅចំណុចគល់ស្ពានអាកាស៧មករា តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកល្អក់ទី១ ខណ្ឌទួលគោក កាលពីវេលាម៉ោង១២និង១០នាទីរំលងអាធ្រាត ឈានចូលថ្ងៃទី១២ខែកុម្ភៈ ឆ្នាំ២០១៥។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាកកាមរីឆ្លាម ពណ៌ស ពាក់ស្លាកលេខ ភ្នំពេញ2H-5082 បើកបរដោយបុរសជនជាតិចិនម្នាក់ និងរួមដំណើរជាមួយប្រពន្ធកូន បានធ្វើដំណើរតាមបណ្តោយផ្លូវសហព័ន្ធរុស្ស៊ី ក្នុងទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុ ស្រាប់តែរ៉េចង្កូតទៅបុកនិងបង្គោលភ្លើងបំភ្លឺផ្លូវ ធ្លាក់អំពូលបែក ហើយរថយន្តបង្កបានព្យាមបើករថយន្តទាំងដាច់កាឡេម្ខាងផ្នែងខាងមុខបានប្រហែលជា២០ម៉ែត្ររថយន្តក៏ទៅមុខលែងរួច។
ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ និងយករថយន្តបង្ក ទៅរក្សាទុក នៅការិយាល័យចរាចរណ៍ជើងគោកដើម្បីរងចាំដោះស្រាយនៅពេលក្រោយ៕
