ខេត្តស្វាយរៀង ឃាត់ខ្លួន និងកសាងសំណុំរឿង បញ្ជូនទៅតុលាការខេត្ត ពីបទឆបោកចំនួន៤៧០០$ ពីអ្នកលក់សូទ្បា ក្នុងខេត្តស្វាយរៀង ជនសង្ស័យពីរនាក់ ត្រូវសមត្ថកិច្ចការិយាល័យនគរបាល ព្រាហ្មទណ្ឌកំរិតធ្ងន់ នៃស្នងការដ្ឋាននគរបាល ខេត្តស្វាយរៀង ឃាត់ខ្លួនបាន ក្រោយពីបទឆបោកប្រាក់ ។
បើតាមសមត្ថកិច្ច បានឱ្យដឹងថា ជនសង្ស័យទីមួយមានឈ្មោះ ស៊ុន ធីចំណាន ភេទប្រុស អាយុ២០ឆ្នាំ និងទីពីរឈ្មោះ ពេញ សុធឿន អាយុ១៩ឆ្នាំ ទាំងពីរនាក់នេះ មានមុខរបរមិនពិតប្រាកដ និងមានទីលំនៅ ក្នុងខេត្តពោធិ៍សាត់ ប៉ុន្តែបានមកស្នាក់នៅបណ្តោះអាសន្ន ក្នុងភូមិស្វាយចេក ឃុំព្រៃឈរ ស្រុកកំពុងត្របែក ខេត្តព្រៃវែង ។
រីឯជនរងគ្រោះ មានឈ្មោះ ម៉ុត វណ្ណាន ភេទប្រុស អាយុ៣៥ឆ្នាំ មុខរបរលក់គ្រឿងសូឡា និងមានទីលំនៅ នៅរាជធានីភ្នំពេញ ។ ប្រភពខាងលើ បានបន្តទៀតថា ដំបូងឡើយ ជនរងគ្រោះ និងជនសង្ស័យ មានការរកស៊ីទិញលក់សូឡាជាមួយគ្នា តាំងពីខែវិច្ឆិកាមកម្ល៉េះ ដោយជនសង្ស័យបានយកសូឡា ពីជនរងគ្រោះជាបន្តបន្ទាប់ ដោយមិនបង្វិលប្រាក់ឱ្យឡើយ តែបានសន្យាថា និងប្រគល់ប្រាក់ទាំងអស់ នៅថ្ងៃទី១ ខែកុម្ភៈ ឆ្នាំ២០១៥ ។ លុះមកដល់ថ្ងៃកំណត់ មិនឃើញជនទាំងពីរ ប្រគល់ប្រាក់តាមការសន្យា ជនរងគ្រោះ ក៏បានទូរស័ព្ទទៅកាន់ពួកគេ ប៉ុន្តែមិនអាចទាក់ទងបាន ទើបតែថ្ងៃទី៧ ខែកុម្ភៈ ឆ្នាំ២០១៥ ទើបអាចទាក់ទងបាន ។
នៅពេលជនរងគ្រោះ សួរនាំពីប្រាក់ដែលត្រូវសង ជនទាំងពីរក៏បានប្រាប់មកវិញថា បើចង់បានប្រាក់ទាល់តែយកសូឡា មកឱ្យបន្ថែម ដោយឱ្យជនរងគ្រោះ យកមកប្រគល់ឱ្យ នៅស្រុកកំពង់ត្របែក ខេត្តព្រៃវែងទៅវិញ ។ ដោយមានការសង្ស័យ និងខ្លាចខាតបង់កាន់តែច្រើននោះ ជនរងគ្រោះ ក៏បានមកដាក់ពាក្យបណ្តឹង នៅការិយាល័យព្រហ្មទណ្ឌកំរិតធ្ងន់ ឱ្យជួយធ្វើការតាមរកជនសង្ស័យទាំងពីរតែម្តងទៅ ។
ក្រោយពីទទួលបានពាក្យបណ្តឹង សមត្ថកិច្ចក៏បានឱ្យជនរងគ្រោះ ធ្វើការទាក់ទងទៅកាន់ជនទាំងពីរ ដើម្បីបញ្ជោតថា បានយកសូឡាថ្មី មកប្រគល់ឱ្យហើយ តែដោយសារជួលរថយន្តឈ្នួល ទើបមិនអាចយកទៅប្រគល់ឱ្យដល់កន្លែងណាត់ ដោយតំរូវឱ្យជនទាំងពីរ ឡើងមកយកនៅភូមិធ្លក ឃុំក្រោលគោ ស្រុកស្វាយជ្រំ ខេត្តស្វាយរៀងវិញ ។ ដោយមិនដឹងថា នេះជាការបោកបញ្ជោត ពីសំណាក់សមត្ថកិច្ច ទើបជនទាំងពីរ បានបើកឡានកាម៉ារីឆ្លាម ពាក់ស្លាកលេខ ភ្នំពេញ 2J-1249 មកទទួលរបស់ទៅតាមការណាត់ចុងក្រោយ ហើយក៏ជាប់អន្ទាកសមត្ថកិច្ចតែងម្តង ។បច្ចុប្បន្នជនសង្ស័យទាំងពីរ ត្រូវបានសមត្ថកិច្ច កំពុងសាកសួរ ដើម្បីកសាងសំណុំរឿង បញ្ជូនទៅតុលាការខេត្ត ចាត់ការទៅតាមនីតិវិធី ៕
