ភ្នំពេញៈ តែបានសម្រេចទ្រោមខ្លួននៅពេលដែលប្រជាពលរដ្ឋ ក្នុងភូមិត្រពាំងថ្លឹង ខណ្ឌពោធិ៍សែនជ័យ ចាប់បាននិងនាំគ្នាព្រួតវាយ ជនសង្ស័យម្នាក់ប្រដាប់ដោយកាំបិទ បានធ្វើសកម្មភាពភ្ជុងយកម៉ូតូពីនារីម្នាក់ តែមិនបានសម្រេចព្រោះត្រូវនារីរងគ្រោះស្រែកឆោឡោ បានបង្កឲ្យមានការផ្អើល ដល់ប្រជាពលរដ្ឋដែលនៅក្បែរនោះ ដេញចាប់វាយបាន និង នាំគ្នាវាយទ្បើងទ្រោមខ្លួន ទើបប្រគល់ឲ្យសមត្ថកិច្ច ។ ហេតុការណ៍នេះ បានកើតឡើងកាល ពីវេលាម៉ោង២០និង០០នាទីយប់ ថ្ងៃទី១២ ខែកុម្ភៈ ឆ្នាំ២០១៥ នៅចំណុចមុខមន្ទីរពេទ្យឯករាជ្យ តាមបណ្តោយផ្លូវវេងស្រេង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញនារីរងគ្រោះ ជិះម៉ូតូមួយគ្រឿង ម៉ាកគុបជ្រុង ពណ៌ទឹកបិច ធ្វើដំណើរតាមបណ្តោយផ្លូវវេងស្រេង ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែលេចមុខជនសង្ស័យម្នាក់ បានទៅស្ទាក់ពីមុខម៉ូតូនារីរងគ្រោះ ហើយបានយកកាំបិទភ្ជុងប្លន់យកម៉ូតូ តែត្រូវបាននារីរងគ្រោះស្រែកឆោឡោឡើង ធ្វើឲ្យផ្អើកដល់ប្រជាពលរដ្ឋដែលនៅក្បែរចេញមកជួយអន្តរាគមន៍ និងដេញចាប់ជនសង្ស័យបាន ហើយព្រួតគ្នាវាយយ៉ាងចាស់ដៃ បណ្តាលជនសង្ស័យរងរបួសធ្ងន់ ។
សមត្ថកិច្ចបានឲ្យដឹងថា ជនសង្ស័យមានឈ្មោះ គង់ វ៉ៃឈឺន ភេទប្រុស អាយុ៣០ឆ្នាំ ស្នាក់នៅសង្កាត់ផ្សារថ្មីទី៣ ខណ្ឌដូនពេញ ។
ក្រោយពេលកើតហេតុ សមត្ថកិច្ចបាននាំខ្លួនជនសង្ស័យទៅសាកសួរ ដើម្បីរងចាំបញ្ជូនបន្តទៅអធិការដ្ឋាន នគរបាលខណ្ឌពោធិ៍សែនជ័យ ស្រាយតាមផ្លូវច្បាប់ ៕