សៀមរាបៈ ពិធីបុណ្យចូលឆ្នាំចិន វៀតណាម ត្រូវបានប្រជាពលរដ្ឋខ្មែរដែល ជាប់សាច់សារលោហិតសែរស្រឡាយចិន បាននាំគ្នាគោរពឡើង គឺជាពិធីបុណ្យប្រពៃណីជាតិរបស់ប្រទេសចិន ប្រារព្ធធ្វើឡើងជារៀងរាល់ឆ្នាំម្តងដែលមានរយៈពេល៣ថ្ងៃឆ្នាំនេះត្រូវនឹងថ្ងៃទី ១៨ ,១៩,២០ ខែ កុម្ភះ ឆ្នាំ២០១៥ ពិធីបុណ្យ ចូលឆ្នាំចិន ត្រូវបានចាត់ទុកជាថ្ងៃដ៏មានសារសំខាន់សម្រាប់ប្រជាជនចិន ពិធីបុណ្យនេះនឹងត្រូវផ្លាស់ប្ដូរកម្រិត ហើយក្លាយទៅជាផ្នែកមួយនៃវប្បធម៌ប្រពៃណីរបស់ប្រទេស។ក្នុងពីធីបុណ្យចូលឆ្នាំចិន ឬក៏ពីធីផ្សេងៗជាជំនឿរបស់បងប្អូនជាប់សែរស្រឡាយចិន មានការបិទយ័ន្តនៅមុខផ្ទះ មានការដុតផាវ មានការលោតម៉ុងសាយ មានការសែនព្រេន មានការដុតក្រដាស ដុតធូបនៅព្រះវិហារ ការនាំយកអំពៅខ្មៅ និងស្លឹកមៀន និងការតាំងផ្កាអង្គាសីលក្នុងផ្ទះជាដើមក្នុងរយ: ពេល៣ថ្ងៃនេះ និងមិនត្រូវធ្វើអ្វីល្អក់កករនាំឱ្យប៉ះពាល់ដល់មង្គល ឬដល់ឆ្នាំថ្មី ជនជាតិចិនមានតំណមមិនឱ្យកើតរឿងយំសោកសៅ ពីព្រោះវាអាចនាំមកនូវរឿងអពមង្គលដល់ឆ្នាំថ្មី រហូតពេញមួយឆ្នាំ ក្នុងថ្ងៃនេះគេមានការប្រយ័ត្នប្រយែងចំពោះការកាន់ចាន ឬកែវ ព្រោះបើមានបង្កឱ្យប្រេះស្រាំ ឬធ្លាក់ បែកជាការនាំឱ្យបាត់បង់ជោគលាភ ហើយជីវិតក្នុងឆ្នាំនោះនឹងជួបតែរឿងប្រេះឆាពុំសូវមានសេចក្តីសុខឡើយ ។
-មិនត្រូវឈ្លោះប្រកែកគ្នា (នាំឱ្យកើតមានទុក្ខសោកពេញ១ឆ្នាំ)-មិនត្រូវបោកគក់សម្លៀកបំពាក់ (ព្រោះថ្ងៃចូលឆ្នាំចិនគឺជាទឹកមន្តប្រោសព្រំ)-មិនត្រូវកាត់សក់ ក្រចកដៃ (ព្រោះនាំក្តីឈឺចាប់ដល់សមាជិកគ្រួសារ)-មិនត្រូវប្រមូលលុយពីអ្នកជំពាក់បំណុល (មានន័យថាអ្នកនឹងត្រូវស្វែងរកអ្នកជំពាក់បំណុលក្នុងឆ្នាំថ្មីពេញ១ឆ្នាំ)-មិនត្រូវទិញសៀវភៅពេលចូលឆ្នាំចិនទេព្រោះពាក្យ «សៀវភៅ» ជាភាសាចិនគឺ «ស្សូ៊» មានន័យថា «បាត់បង់» ។
នៅថ្ងៃបុណ្យចូលឆ្នាំប្រពៃណីចិនសមាជិកគ្រួសារម្នាក់ៗរីករាយជួបជុំគ្នាយ៉ាងសប្បាយត្រេកអរដោយមានសំឡេងការជូនពរជ័យ «កុង ស៊ី ហ្វា ឆាយ» មានន័យថា «កុង ស៊ី» អបអរសាទរ ចំណែក «ហ្វា ឆាយ» ជូនពរឱ្យរកស៊ីមានបាន ។ កុង ស៊ី ហ្វា ឆាយ «រីករាយថ្ងៃចូលឆ្នាំថ្មី», ការជូនអាំងប៉ាវ, ការបរិភាគអាហារជុំគ្នា និងការលេងល្បែងស៊ីសងជាដើម ។ ការលេងល្បែងស៊ីសងនៅថ្ងៃចូលឆ្នាំថ្មីប្រជាជនចិនជឿជាក់ថាអាចបង្កើតសំណាងល្អ ។
អាងប៉ាវ គឺជាសំបុត្រពណ៌ក្រហម និងជាទំនៀមទម្លាប់របស់ជនជាតិចិនអំឡុងពេលបុណ្យចូលឆ្នាំប្រពៃណីចិន ឪពុក-ម្តាយជាអ្នកជូន «អាំងប៉ាវ» ដល់កូនៗរបស់ពួគេដែលនៅក្នុងអាំងប៉ាវនោះរួមមានក្រដាសប្រាក់ថ្មីៗផងដែរ ប្រជាជនចិនចូលចិត្តពណ៌ក្រហមព្រោះវាតំណាងឱ្យថាមពល សុភមង្គល និងសំណាងល្អ ។ ដូច្នេះហើយទើបពួកគេជ្រើសរើសអាំងប៉ាវពណ៌ក្រហមជាកាដូរក្នុងថ្ងៃបុណ្យចូលឆ្នាំប្រពៃណីចិន ការជូនអាំងប៉ាវមានន័យថា ជា «ការជូនពរជ័យ និងសំណាងល្អចូរមានដល់សាច់ញ្ញាតិក្នុងក្រុមគ្រួសារ» ។
ចំណែកកូនចៅសែរស្រឡាយចិនបានទៅជួបជុំគ្នានៅផ្ទះរបស់ដូនតា នៅថ្ងៃទី២ ហើយបានពិសារម្ហូបបួសរួមគ្នា ហើយបានជូនអាំងប៉ាវ ដល់ដូនតា ក្រោយមកដូនតាក៏បានជូនអាំងប៉ាវដល់ចៅៗវិញ ក្នុងនោះអាំងប៉ាវទទួលបានតែសម្រាប់តែ អ្នកមិនទាន់រៀបការ ឬនៅលីវ ចំណែកអ្នកដែលរៀបការរួចហើយ ទោះជាមានកូន ឬមិនមានក្តីក៏ត្រូវតែឲ្យអាំងប៉ាវដល់ក្មួយៗវិញ ។ ដោយ ប៊ុន រដ្ឋា