ភ្នំពេញ៖ យុវជនម្នាក់ស្លាប់បាត់បង់ជីវិតយ៉ាងអាណោចអាធ័មនៅនឹងកន្លែងកើតហេតុនឹងនារី ២នាក់ទៀត ត្រូវរងរបួសធ្ងន់ធ្ងរ ដោយសារពួកគេជិះម៉ូតូមួយគ្រឿងឌុបគ្នាចេញហូបការបងប្អូននៅខេត្តកណ្តាល ឆ្ពោះទៅផ្ទះ នៅខេត្តកំពង់ស្ពឺតែបានជួបគ្រោះថ្នាក់ចរាចរណ៍បុកចំគូទរថយន្តឡិចស៊ីស ៤៧០កំពុងបើកបរឆ្លងកាត់ផ្លូវជាតិ៣ យ៉ាងពេញទំហឹង កាលពីវេលាម៉ោង ២២ នឹង៣០នាទីយប់ថ្ងៃទី ១០ ខែកុម្ភៈ ឆ្នាំ ២០១៤ ស្ថិតតាមបណ្តោយផ្លូវ ជាតិលេខ ៣កែងផ្លូវលេខ ៣០ម៉ែត្រ ក្នុងភូមិប៉ប្រកខាងត្បូង សង្កាត់ចោមចៅ ខណ្ឌពោធិ៍សែនជ័យ ។
សាកសពយុវជនខាងលើឈ្មោះ ហ៊ុយ សំអូន ភេទប្រុស អាយុ ២៨ ឆ្នាំ នឹងនារី ២នាក់ដែលរងរបួសទី ១ ឈ្មោះ សោម ស្រីកា អាយុ ២៥ឆ្នាំ នឹងម្នាក់ទៀតត្រូវជាបងស្រីឈ្មោះសោម ស្រីនី អាយុ ៣០ឆ្នាំ អ្នកទាំង៣នាក់មានស្រុកកំណើតនៅខេត្តកំពង់ស្ពឺ ។
យោងតាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថាមុនពេលកើតហេតុជនរងគ្រោះទាំង ៣នាក់ បានជិះម៉ូតូមួយគ្រឿង ម៉ាកសេ ១១០ ពណ៌ខ្មៅ ពាក់ស្លាកលេខភ្នំពេញ 1BW 7714ឌុបគ្នា ធ្វើដំណើរតាមបណ្តោយផ្លូវជាតិលេខ ៣ ទិសដៅពីត្បូងទៅជើង ចេញពីហូបការបងប្អូននៅខេត្តកណ្តាល បំណងទៅផ្ទះរបស់ខ្លួនវិញនៅខេត្តកំពង់ស្ពឺ ប៉ុន្តែពេលបើកបរមកដល់ ចំណុចខាងលើក៏បានជ្រុលល្បឿនបុកចំគូទរថយន្ត
ឡិចស៊ីស ៤៧០ ពណ៌ស្ករ ពាក់ស្លាកលេខ ភ្នំពេញ 2Q 0728 បើកបរ ដោយបុរសម្នាក់ឆ្លងកាត់ផ្លូវជាតិលេខ ៣ ចូលផ្លូវលេខ៣០ ម៉ែត្រ ទាំងកម្រោលតែម្តង បណ្តាលឲ្យយុវជនជា អ្នក ឌុបដួលបោកក្បាលនឹងស្លាប់យ៉ាងអាណោចអាធ័មក្នុងថ្លុកឈាមនៅនឹងកន្លែងកើតហេតុនឹងនារី ២នាក់ដែលជិះពីក្រោយត្រូវរងរបួសធ្ងន់ធ្ងរបានរថយន្តសាមុយមកដឹកយកទៅសង្គ្រោះនៅមន្ទីរពេទ្យទាន់ពេលវេលា ។
ចំណែក ម៉ូតូរបស់ជនរងគ្រោះត្រូវរងការខូចខាតទាំងស្រុងខ្ទាតជាង ២០ម៉ែត្រពីរថយន្ត ហើយរថយន្តឡិចស៊ីសខូចខាត ផ្នែកខាងក្រោយផងដែរ ។ ក្រោយកើតហេតុសាកសពត្រូវប្រគល់ឲ្យក្រុមគ្រួសារដឹកយកទៅធ្វើបុណ្យតាមប្រពៃណី ហើយរថយន្ត ឡិចស៊ីស៤៧០ នឹងម៉ូតូសេ១១០ ត្រូវបានសមត្ថកិច្ចមូលដ្ឋានសហការជាមួយនគរបាលជំនាញចុះវាស់វែង
ស្ទូចយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយនាពេលក្រោយ។ គ្រោះថ្នាក់នេះសមត្ថកិច្ចសន្និដ្ឋានបង្កឡើងដោយសារជនរងគ្រោះស្រវឹងស្រាហើយជិះម៉ូតូឌុបគ្នា លឿនពេក ចាប់ហ្វ្រាំងមិនទាន់ពេលរថយន្តបត់ទើបជ្រុលបុកទាំងកម្រោលតែម្តងទៅ៕ 
