ខេត្តប៉ៃលិន ៖ ភ្ញៀវទេសចរជាតនិងអន្តរជាតិដែលបានទៅឬឆ្លងកាត់នៅព្រំដែនកម្ពុជា-ថៃ បានរិះគន់យ៉ាងខ្លាំងទៅលើអាជ្ញាធរថា បានបណ្តែតបណ្តោយឱ្យអ្នកមានលុយកាក់អំណាចបុណ្យសក្តិ ឃុបឃិតគ្នាជាមួយឈ្មួញ យកគ្រឿងចក្រទៅជីកកកាយដីភ្នំស្ទើតែរាបស្មើដើម្បី
សាងសង់សំណង់ផ្សេងៗនិងយកអាចម៍ដីលក់យ៉ាងគគ្រឹកគគ្រេង បង្កឱ្យបាត់បង់ធន់ធានធម្មជាតិ និងប៉ះពាល់បរិស្ថានយ៉ាងខ្លាំង។ចំណែកអាជ្ញាធរបានត្រឹមឆ្លើយដាក់គ្នា។
កន្លែងដែលកំពុងជីកកកាយនិងសាសង់សំណង់ផ្សេងៗនោះស្ថិត នៅចំណុចអង់ តែនទូរស័ព្ទ ០១២ និង០៩៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ គ្រឿងចក្របានជីកកកាយយកដីភ្នំដឹកទៅលក់ផងនិងធ្វើឱ្យភ្នំនេះ រាបស្មើដើម្បីសាងសង់សំណង់ផ្សេងៗ ដែលពួកអ្នកមានអំណាចទាំងនោះ មិនខ្វល់ពីការបាត់បង់ធនធានធម្មជាតិឡើយ ។
ប្រភពព័ត៌មានពីប្រជាពលរដ្ឋរស់នៅភូមិផ្សារព្រំជាច្រើននាក់បានខ្សឹបខ្សៀវគ្នាឱ្យដឹង ថា តំបន់ព្រៃភ្នំនៅក្នុងភូមិផ្សារព្រំ នឹងក្លាយទៅជាទីវាលរហោស្ថាន ស្រឡះគ្មានដើមឈើ១ដើមនោះឡើយ ដោយសារតែអ្នកមានអំណាច និងមានលុយកាក់ បានឃិបឃិតគ្នាជាមួយឈ្មួញ យកគ្រឿងចក្រទៅជីកកកាយភ្នំយកដីទៅលក់ ហើយបន្ទាប់មកគេនឹងយកភ្នំនេះទៅសាងសង់ជាផ្ទះជួល ជាអគារ ឬពុះឡូតិ៍លក់ផងដែរ ។
ប្រភពបន្តទៀតថា ពីមុននៅលើភ្នំតំបន់ព្រំដែននេះ ពោរពេញទៅដោយរុក្ខជាតិពណ៌ខៀវស្រងាត់ស្រស់បំព្រងគួរឱ្យចង់គយគន់ ត្រជាក់ភ្នែក ទាំងភ្ញៀវទេសចរជាតិ និងអន្តរជាតិផងដែរ ។ ប៉ុន្តែរហូតមកដល់ពេលនេះ គេឃើញឈ្មួញបានយកគ្រឿងចក្រទៅសម្រុកជីកកកាយដីភ្នំយកទៅលក់ ហើយយកកន្លែងដីភ្នំនេះធ្វើជាកម្មសិទ្ធិរបស់ខ្លួន ។
ម្យ៉ាងវិញទៀត ឈ្មួញដែលកំពុងតែដឹកដីនៅតំបន់ភ្នំនេះលក់ ឈ្មោះ តា គីម រស់នៅភូមិអូរពឺត សង្កាត់ទួលល្វា ក្រុងប៉ៃលិន ។ ប្រជាពលរដ្ឋរិះគន់បន្តទៀតថា បើសិនជាអាជ្ញាធរមូលដ្ឋាននៅតែបណ្តែតបណ្តោយបែបនេះតទៅទៀត ភ្នំដែលជាកេរតំណែលពីដូនតាតាំងពីយូរលង់ណាស់មកហើយ នឹងរលាយសាបសូន្យគ្មានសល់បន្តិចនោះឡើយ ។
ជាមួយគ្នានេះដែរម្ចាស់គ្រឿងចក្រនិងរថយន្តដឹកដី លោក គីម បានឱ្យដឹងតាមទូរស័ព្ទថា គាត់ជីកយកដីពីអ្នកមានអំណាច ផ្កាយពីរម្នាក់ រស់នៅក្រុងប៉ៃលិន ដោយគេឱ្យគាត់កាយមិនគិតលុយអីទេ គឺគេចង់ឱ្យកាយដីលើភ្នំនេះរាបស្មើដើម្បីសាងសង់ផ្ទះព្រោះដីនេះគេមានប្លង់ លោកបាន បន្តទៀតថា ម្ចាស់ដីនេះជាអ្នកមានអំណាច ខាងលោកមិនសួរនាំអ្វីច្រើនពីគាត់នោះឡើយ ។
ពាក់ព័ន្ធទៅនឹងបញ្ហានេះ លោក សំ សារ៉េត អភិបាលស្រុកសាលាក្រៅ បានឱ្យដឹងថា ខាងលោកមិនទាន់ដឹងថាដីនេះជារបស់អ្នកមានអំណាច ឬអ្នកមានលុយកាក់យកគ្រឿងចក្រទៅជីកកកាយដីភ្នំនៅឡើយទេ ហើយខា ងលោកនឹងចុះត្រួតពិនិត្យឱ្យដឹងច្បាប់ ។ លោកបានបញ្ជាក់ទៀតថា ខាងលោកក្តាប់ព័ត៌មាន នេះមិនទាន់ជុំនៅឡើយ ហើយកំពុងតែចាត់ក្រុមការងារឱ្យចុះទៅធ្វើការត្រួតពិនិត្យ ឱ្យបានច្បាស់លាស់នៅពេលឆាប់ៗខាងមុខនេះ ព្រោះលោកទើបតែកាន់ជាអភិបាលស្រុកសាលាក្រៅនេះទើបបានប៉ុន្មានខែប៉ុណ្ណុះហើយរឿងដីភ្នំទាំងនោះមានប្លង់ឬអត់ប្លង់ឋិតនៅលើមន្ទីរសុរិយោដីទេជាអ្នកសម្រេចចេញប្លង់ឱ្យ ។
ចំណែកលោក សែម សុខន ប្រធានការិយាល័យភូមិបាលស្រុកសាលាក្រៅ បានឱ្យដឹង ថា ដីដែលគេកំពុងតែយកគ្រឿងចក្រទៅជីកកកាយ ខាងលើនោះ អត់មានប្លង់រឹងនោះទេ គឺគ្រាន់តែមានបង្កាត់ដៃកាន់កាប់តែប៉ុណ្ណោះ ។ លោកបានបន្តទៀតថា នៅខេត្តប៉ៃលិនជាតំបន់ខ្ពស់រាប កន្លែងណាក៏មើលទៅឃើញខ្ពស់ដែរ ហើយកន្លែងដែលគេជីកកកាយនេះត្រូវបានមេចែកឱ្យតាំងពីសម័យសមាហរណកម្មមកម្លេះ គឺសម័យខ្មែរក្រហម ៕
