បាត់ដំបង: បុរសម្នាក់ដែលជាជនជាតិចិនហុងកុងបានរងរបួសរហូតដល់មានឈាមជោគប្រាណខណ:ដែលបុរសរូបនោះកំពុងបើកបររថយន្តម្នាក់ឯងនៅតាមបណ្តោយផ្លូវជាតិលេខ5 នាថ្ងៃទី26-2-15 វេលាម៉ោង10ព្រឹក លុះដល់ចំនុចភូមិថ្នល់បត់ ឃុំឫស្សីក្រាំង ស្រុកមោងឫស្សីខេត្តបាត់ដំបង ស្រាប់តែកង់រថយន្តខាងមុខផ្នែកខាងស្តាំ បានផ្ទុះឡើង បណ្តាលអោយរថយន្តនោះរេចង្កូតទៅខាងស្តាំធ្លាក់ចេញពីផ្លូវជាតិហើយក្រឡាប់ជាច្រើនត្រឡប់ និងខ្ទេចខ្ទីស្ទើរទាំងស្រុង។
យោងតាមប្រភពដែលនៅទីនោះបានអោយដឹងថា រថយន្តដែលជួបឧប្បទ្ទវហេតុ
ដោយខ្លួនឯងនេះម៉ាករ៉េវហ្វ ព៌ណខ្មៅ ពាក់ស្លាកលេខ ភ្នំពេញ2K 0883 ព្រមទាំងបានបើកបរយ៉ាងលឿនក្នុងទិសដៅពីបាត់ដំបងទៅភ្នំពេញ ។ប្រភពដដែលនេះបានបន្តទៀតថា លុះទៅដល់ចំនុចកើតហេតុ ស្រាប់តែគេបានឮសំលេងផ្ទុះកង់រថយន្តនោះយ៉ាងខ្លាំង បណ្តាលអោយចង្កូតរបស់រថយន្តចាប់ផ្តើមរេ និងបោលចុះទៅស្នាមភ្លោះខាងស្តាំ និងធ្វើអោយតួរថយន្តក្រឡាប់ជាច្រើនត្រឡប់ ព្រមទាំងបង្កអោយអ្នកបើកបររងរបួស
យ៉ាងដំណំ ដោយមានឈាមហូរពីក្បាល និងផ្ទៃមុខជាច្រើនកន្លែងថែមទៀតផង។
ចំណែកលោកអធិការរង ឌឿន សម្បត្តិ បានបញ្ជាក់ថា បញ្ហានេះគឺបានកើតឡើងដោយសារតែរការបើកបរថយន្តមានល្បឿនលឿន និងដោយសារកំហុសបច្ចេកទេស ព្រោះកង់អាចសឹកខ្លាំងទើបបណ្តាលអោយផ្ទុះបែបនេះ ប៉ុន្តែក្រោយពេលកើតហេតុភ្លាមៗសមត្ថកិច្ចបានបញ្ជូនជនរងគ្រោះដែលមានឈ្មោះ ហា លីយ៉ុង ភេទប្រុស អាយុ52ឆ្នាំ មានតួនាទីជាជាងតម្លើងកាមេរ៉ាសុវត្ថិភាពរបស់ក្រុមហ៊ុនមួយនៅកម្ពុជា ទៅកាន់ន្ទីរពេទ្យបង្អែកស្រុកមោងឫស្សី ប៉ុន្តែក្រោយពីលាងសំអាតមុខរបួសរួចក៏ត្រូវក្រុមការងាររបស់ជនរងគ្រោះសុំយកទៅព្យាបាលនៅឯទីក្រុងភ្នំពេញវិញ ចំណែក> រថយន្តក៏សមត្ថកិច្ចអនុញ្ញាតិអោយពួកគេធ្វើការស្ទូចយកទៅជួសជុលដោយខ្លួនឯងផងដែរ ។គួរបញ្ជាក់ដែរថា នៅពេលដែលរថយន្តរេចង្កូតបំរុងធ្លាក់ចុះទៅក្រោមនោះ ក៏បានកៀទៅលើកង់មួយគ្រឿងដែលជិះដោយក្មេងម្នាក់ប៉ុន្តែជាសំណាងល្អ ដោយក្មេងនោះរងរបួសស្រាលតែប៉ុណ្ណោះ ៕
