ខេត្តប៉ៃលិន៖ ហេតុការណ៏គួរឲ្យតក់ស្លុតមួយ បានកើតឡើងដោយសាររថយន្តវីហ្គូមួយបាំងកន្លះពាក់ស្លាកលេខថៃមួយគ្រឿងបើកបុកម៉ូតូពីក្រោយ ខណៈពេលដែលកំពុងធ្វើដំណើរលើផ្លួវជាតិ បណ្តាលឲ្យយុវជនម្នាក់ដាច់ជើងខាងឆ្វេងត្រឹមកជើងនិងម្នាក់ទៀតរងរបួស
ស្រាល ត្រួវបានសមត្ថកិច្ចបញ្ចូនទៅសង្គ្រោះនៅមន្ទីរពេទ្យខេត្តបាត់ដំបង ចំណែកអ្នកបើកបររថយន្តបង្កបានរត់គេចខ្លួនបាត់ ។ គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១រសៀលថ្ងៃទី២៦ ខែកុម្ភៈ ឆ្នាំ២០១៥ នៅលើកំណាត់ផ្លូវជាតិលេខ៥៧ ត្រង់ចំណុចផ្លូវកោងចន្លោះបង្គោលគីឡូម៉ែត្រលេខ៩៥-៩៦ ស្ថិតក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
យុវជនរងគ្រោះទាំងពីរនាក់ទី១-ឈ្មោះស៊ឹម ស៊ីញ អាយុ២១ឆ្នាំ ជាអ្នកបើកបរ ម៉ូតូរងរបួសដាច់ជើងខាងឆ្វេងត្រឹមកជើង ,ទី២-ឈ្មោះស៊ឹម ភីណា អាយុ ២៨ឆ្នាំរងរបួសស្រាល ។ ជនរងគ្រោះទាំងពីរនាក់ជាបងប្អូនបង្កើត មានទីលំនៅភូមិបឹងព្រលឹត ឃុំស្ទឹងកាច់ ស្រុកសាលាក្រៅ ខេត្តប៉ៃលិន បើកបរម៉ូតូម៉ាកហុងដាឌ្រីម សេ១២៥ សេរីឆ្នាំ២០១០ពណ៌ខៀវ ពាក់ស្លាក់លេខបាត់ដំបង 1J-2515 ។ ចំនែករថយន្តបង្កម៉ាកវីហ្គូមួយបាំងកន្លះសេរីឆ្នាំ២០១២ ពណ៌ទឹកប្រាក់ ពាក់ស្លាក់លេខប្រទេសថៃ (រៈយ៉ង ៧១២៦) ក្រោយពេលកើតហេតុអ្នកបើកបររត់គេចខ្លួនបាត់ទុករថយន្ត ចោលនៅកន្លែងកើតហេតុ។
ប្រភពពីសាក្សីនៅកន្លែងកើតហេតុ បានឲ្យដឹងថា៖ មុនពេលកើតហេតុគេឃើញយុវជនពីរនាក់ជិះម៉ូតូហុងដាទ្រីមសេ១២៥ ពណ៌ខៀវ ពាក់ស្លាកលេខបាត់ដំបង 1-J2515 បើកបរតាមទិសដៅពីកើតទៅលិច ។ លុះដល់ចំណុចផ្លូវកោង គេឃើញរថយន្តវីហ្គូមួយបាំងកន្លះ ពណ៍ទឹកប្រាក់មួយគ្រឿងបើកបរតាមទិសដៅស្របទិសគ្នាជាមួយម៉ូតូយុវជនរងគ្រោះ ពេលនោះម៉ូតូយុវជនរងគ្រោះបម្រុងបត់ឆ្វេងស្រាប់តែរថយន្តបុកពីក្រោយម៉ូតូបណ្តាលឲ្យយុវជនទាំងពីរនាក់ខ្ទាត់ធ្លាក់នៅចិញ្ចើមផ្លូវ ចំនែករថយន្តក៏បើកហួសកន្លែងកើតហេតុចំងាយប្រហែលជាង៤០០ម៉ែត្រ ក៏បើកថយក្រោយវិញដល់កន្លែងកើតហេតុក៏ទុករថយន្តចោល ហើយរត់គេចខ្លួនបាតតែម្តង ។
ប្រភពបន្តទៀតថា៖ អ្នកបើកបររថយន្តបង្កហេតុបើករថយន្តហួសទៅមុខ ហើយបើកថយក្រោយវិញប្រហែលជាចង់កិនសម្លាប់ជនរងគ្រោះ តែដោយសារឃើញគេនាំគ្នាទៅមើលច្រើនក៏ ទុករថយន្តចោល ហើយរត់គេចខ្លួនតែម្តង ។
ប្រភពពីសមត្ថកិច្ចចរាចរណ៏ផ្លួវគោកខេត្ត បានបញ្ជាក់ថា៖ ករណីនេះរថយន្តវីហ្គូមួយបាំងកន្លះជាអ្នកបង្កឡើងដោយអ្នកបើកបររថយន្តប្រើប្រាស់ក្នុងល្បឿនលឿនពេក ត្រង់ចំណុចផ្លូវកោង ទើបបណ្តាលឲ្យគ្រោះថ្នាក់កើតឡើងបែបនេះ ។ចំណែករថយន្តបង្ក និងម៉ូតូជនរងគ្រោះ ត្រួវបានកម្លាំងសមត្ថកិច្ចនាំយកមករក្សាទុកនៅការិយាល័យចរចរណ៍ផ្លូវគោកខេត្តប៉ៃលិន ដើម្បីរងចាំធ្វើការដោះស្រាយទៅតាមផ្លូវច្បាប់៕
