ខេត្តក្រចេះ ៖ឈើអារលេខមួយ ប្រភេទសុក្រម ត្រូវបានក្រុមឈ្មួញ នាំគ្នាសម្រុកដឹកជញ្ជូនចេញ ពីក្រុមហ៊ុនដីព្រៃសប្បទាន នៅចំនុចឃុំ២ធ្នូ ស្រុកស្នួល ខេត្តក្រចេះ តាមត្រាក់ទ័រ រថយន្ត ឫម៉ូតូកែច្នៃ ក្នុងមួយថ្ងៃៗមានចំនួនរាប់រយម៉ែត្រគូប នាំយកទៅលក់ក្នុងប្រទេសវៀតណាម យ៉ាងអានាធិ បតេយ្យដោយពុំមានស្ថាប័នជំនាញនិងសមត្ថកិច្ចពាក់ព័ន្ធនៅតាមច្រកទ្វារព្រំដែនមានវិធានការទប់ស្កាត់និងបង្ក្រាបឡើយ ប៉ុន្តែបែរជាឃុបឃិតគ្នាជាលក្ខណៈប្រព័ន្ធ បង្កើតឱ្យមានបទល្មើសដឹក ជញ្ជូនឈើឆ្លងដែនដោយរលូនទៅវិញ។
ប្រភពពីប្រជាពលរដ្ឋ ក៏ដូចជាប្រជាសហគមន៏ការពារព្រៃឈើនៅតំបន់នោះ ធ្លាប់បានរាយ ការណ៏ថា ការកាប់ អារនិងដឹកឈើរបស់ក្រុមឈ្មួញនៅតំបន់នោះគឺ បានកើតមានជាយូរយា រមកហើយ ដោយគេដឹងថា មានឈើលេខ១ ចំនួនរាប់រយមែត្រគូប បានធ្លាយទៅប្រទេសវៀត ណាម បានដោយសុវត្ថិភាព ហើយក្រុមឈ្មួញទាំងនោះគឺមានសមាសភាព សុទ្ឋសឹងជាកង កម្លាំងប្រដាប់អាវុធ ដែលក្នុងមេឈ្មួញម្នាក់ដែលគេដឹងថា ជាមន្ត្រីយោធា ឈ្មោះ ហ៊ួត ប៊ុនគីម និងមួយចំនួនទៀតគឺជាជនជាតិវៀតណាម ។
ពួកគេបានធ្វើសកម្មភាពដឹកជញ្ជូនឈើតាមច្រករបៀងចំនួន៥ច្រក គឺច្រករបៀង D16 / D10 / ប៊ិនឌាំង / 06 /07/ ដោយគេដឹងថា ច្រកនីមួយៗគឺគ្រប់គ្រងដោយលោក ធីម ធឿន ប្រធាន នគរបាលវរះព្រំដែន៦១៩ដែលទើបមកកាន់តំណែងថ្មីនៅតំបន់នោះ។
ប្រភពដដែលបានឱ្យដឹងទៀតថា ក្នុងមួយថ្ងៃៗពួកគាត់សង្កេតឃើញមានមន្ត្រីជំនាញ និងសមត្ថកិច្ច ពាក់ព័ន្ធជាច្រើនបាននាំគ្នាទៅអង្គុយសំកុកចាំយកលុយពីបទល្មើសព្រៃឈើ នៅត្រង់ចំណុចមួយ នេះ ដែលក្នុងនោះគេឃើញមានមន្ត្រីនគរបាលវរះព្រំដែន៦១៩ ដែលគ្រប់គ្រងដោយលោក ធីម ធឿន និងមន្ត្រីកងរាជអាវុធហត្ថស្នាក់ការសន្តិសុខ ៧០៩ ប៉ូលិសសេដ្ឋកិច្ច មេព្រៃផងដែរ ។
ពួកគាត់បានបន្តថា ទីតាំងខាងលើនេះ គឺមានរថយន្តកែឆ្នៃធំៗ និងត្រាក់ទ័រវៀតណាម ម៉ូតូចូលដឹកឈើគ្រប់ប្រភេទរាប់សិបគ្រឿង នាំទៅលក់នៅប្រទេសវៀតណាម ហើយសកម្មភាពទាំងនេះបាន ធ្វើឱ្យមជ្ឈដ្ឋានទូទៅនិងប្រជាពលរដ្ឋនាំគ្នានិយាយតៗគ្នាថា ឃើញបទល្មើស ហើយតែមិនបង្ក្រាប បែរជានាំគ្នាឃុបឃិតជាលក្វណៈប្រព័ន្ធបង្កើតឱ្យមានបទល្មើស ក្នុង ដែនសមត្ថកិច្ចខ្លួនទៅវិញ។
ទាក់ទងនឹងការចោទប្រកាន់របស់ប្រជាពលរដ្ឋខាងលើ ភ្នាក់ងាកម្ពុជាថ្មី មិនអាចទំនាក់ទំនងសុំការបំភ្លឺពីលោក ធីម ធឿន ប្រធានប៉ុស្គិ៍នគរបាលការពារព្រំដែន ដែលគ្រប់គ្រងច្រករបៀងទាំង៥ ក្នុងឃុំ២ធ្នូ ស្រុកស្នួលនោះបានទេកាលពីម្សិលមិញ ដោយទូរសព្ទ័និយាយបន្តិចក៍ដាច់ទៅវីញ ។
