កំពង់ឆ្នាំង៖គំរោងសាងសង់ដំបូលគ្រែលក់ដូរចំនួន៤៨០គ្រែ នៅខាងត្បូងនិងខាងជើងសងខាងទីតាំងផ្សារលើត្រូវបានអាជីរករក្នុងផ្សារលើទាំងអស់តវ៉ាប្រឆាំងមិនអោយធ្វើ ដោយអនុញ្ញាតអោយអាជីវករលក់ដូរទីធ្លាសង ខាងផ្សារលើដាក់ឆ័ត្របាន តែមិនអោយធ្វើជាតូបប្រក់ដំបូលតាមគំរោងរបស់អាជ្ញាធរខេត្តឡើយ ហើយបើចង់ធ្វើគឺចាំផុតកុងត្រាក្នុងសៀវភៅបន្ទុកផ្សារលើលើសិនក្នុងឆ្នាំ២០២៥។ការតវ៉ាប្រឆាំងគំរោងខាងលើនេះបានកើតឡើងនៅរសៀលថ្ងៃទី០៥ ខែមិនាឆ្នាំ២០១៥ នៅពេលគណៈកម្មការរៀបចំសោភណ្ឌ័ភាពនិងសណ្តាប់ធ្នាប់ខេត្តបានអញ្ជើញអាជីវករក្នុងផ្សារលើមកប្រជុំផ្សព្វផ្សាយគំរោងខាងលើ នៅក្នុងសាលានយោបាយខេត្ត។
លោក ហ៊ី ណាត អភិបាលរងខេត្ត និងជាប្រធានគណៈកម្មការរៀបចំសោភណ្ឌ័ភាព និងសណ្តាប់ធ្នាប់ខេត្ត បានថ្លែងនៅក្នុងអង្គប្រជុំជាមួយនឹងអាជីវករជាង១០០នាក់ដែលបានចូលរួមប្រជុំថា៖គំរោងរៀបចំសាងសង់ដំបូលគ្រែចំនួន៤៨០គ្រែនៅសងខាងទីតាំងផ្សារលើនេះ គឺអាជ្ញាធរខេត្តចង់រៀបចំសណ្តាប់លក់ដូរ និងអនាម័យជុំវិញផ្សារអោយបានល្អប្រសើរ ក្រោយពីអង្គការចៃការជប៉ុនបានកសាងដាក់ការ៉ូការ៉ូឡាបានស្អាតបាតជុំវិញទីតាំងផ្សារលើហើយនោះ។ព្រោះកន្លងមកទីធ្លាសងខាងផ្សារលើនេះ អាជីវករមកពីជនបទនិងក្នុងក្រុងបានដាក់កញ្ច្រែងលក់បាំងតែឆ័ត្រ គ្មានសណ្តាប់ធ្នាប់គ្មានអនាម័យឡើយ ហើយគំរោងថ្មីនេះតម្រូវអោយជួលគ្រែលក់ដូរដែលមានដំបូលពីលើ ពីអ្នកវិនិយោគក្នុង១ខែប្រមាណ៥ម៉ឺនរៀល ដើម្បីអោយសងខាងផ្សារមានសណ្តាប់ធា្នប់ មានសោភណ្ឌ័ភាព និងអាចធ្វើអនាម័យបានល្អប្រសើរ។
នៅក្នុងកិច្ចប្រជុំនេះបងប្អូនអាជីវករលក់ដូរក្នុងទីតាំងផ្សារលើបានឡើងតវ៉ាដូចគ្នាៗថា៖ពួកគាត់តំណាងអោយអាជីវករក្នុងផ្សារលើទាំងអស់មិនឯកភាពគំរោងសាងសង់ដំបូលគ្រែទាំង៤៨០កន្លែងនោះឡើយ ព្រោះខុសនិងសៀវភៅបន្ទុកផ្សារលើដែលសាងសង់ដោយក្រុមហ៊ុន ថូម៉ាក់ លក់អោយអាជីវករចំនួន២៥ឆ្នាំទើបចប់កុងត្រា មកដល់ពេលនេះនៅ១០ឆ្នាំទៀតទើបបញ្ចប់កុងត្រា។ព្រោះថានៅពេលសាងសង់តូប និងគ្រែបន្ថែមទៀតនោះនៅសងខាងផ្សារពួកគេលក់ខាងមុខគាត់ ហើយពួកគាត់លក់ដូរក្នុងផ្សារពិតជាលក់មិនដាច់ឡើយ។
ម្យ៉ាងទៀតពួកអ្នកលក់ដូរក្រៅដំបូលផ្សារមិនបានទិញតូបអស់រាប់ពាន់រាប់ម៉ឺនដុល្លានិងមិនបានបង់ពន្ធប្រចាំខែបង់ប៉ាតង់ប្រចាំឆ្នាំដូចពួកគាត់នោះឡើយ បែរជាចង់អោយពួកគេមានគ្រែ តូបនៅពីមុខពួកគាត់ទៅវិញប៉ុន្តែដើម្បីចែកគ្នារស់ ពួកគាត់លក់ដូរនៅក្នុងផ្សារឯកភាពអោយអ្នកលក់ដូរនៅសងខាងផ្សារទាំងនោះ ដាក់ឆ័ត្រលក់ដូចកាលពីមុន ម្យ៉ាងទៀតពេលមានគ្រោះអគ្គីភ័យកើតឡើងក្នុងផ្សារ រថយន្តពន្លត់អគ្គីភ័យនិងអាចជួយ
ពន្លត់បានទាន់ពេលវេលា មិនទើបតូប គ្រែដែលមានគំរោងសាងសង់ទាំងនេះឡើយ។
អាជីវករមួយចំនួនទៀតបានលើកឡើងថា៖គំរូជាក់ស្តែងមួយនៅក្នុងផ្សារឆ្នាំងផ្សារក្រោម នៅពេលមានអ្នកលក់ដូរខាងក្រៅផ្សារបានដោយសេរីនេះ អាជ្ញាធរមិនអាចទប់ស្កាត់បាន អ្នកទិញគ្រែក្នុងផ្សារលក់មិនដាច់ក៏បាននាំគ្នាចេញមកធ្វើតូបលក់ដូរក្រៅផ្សារតាមជួរដើមស្រស់ដែរ ដែលមកដល់ពេលនេះអាជ្ញាធរមិនអាចរៀបចំសណ្តាប់ធ្នាប់លក់ដូរទាំងនោះបានឡើយ ហើយម៉េចក៏ចង់ធ្វើអោយផ្សារលើមានគំរូដូចផ្សារឆ្នាំងទៀត។ទន្ទឹមនោះដែរអាជីវករផ្សារលើសំសំណូមពរអោយក្រុមហ៊ុន ថូម៉ាក់ គោរពកិច្ចសន្យាក្នុងសៀវភៅបន្ទុក ដែលបាន
ចែងថាត្រូវជួសជុលថែទាំផ្សារជាប្រចាំ តែរយះពេល១៥ឆ្នាំងកន្លងមកនេះដំដូលផ្សារលើបានធ្លុះធ្លាយនិងលិចទឺកភ្លៀងស្ទើរតែគ្រប់ទីកន្លែង តែមិនឃើញក្រុមហ៊ុន ថូម៉ាក់ ធ្វើការជួសជុលនោះឡើយ ។
ក្នុងពេលបញ្ចប់កិច្ចប្រជុំលោក ហ៊ី ណាត បានថ្លែងថា៖លោកនិងយកសំណូមពរ និងការតវ៉ាទាំងអស់ខាងលើនេះទៅរាយការណ៍ជូនលោកអភិបាលខេត្ត និងក្រុមការងាររបស់ក្រុង និងខេត្ត ដើម្បីសិក្សាសម្របសម្រួលដោះស្រាយជាបន្តទៀតជូនអាជីវករ ទាំងក្នុងផ្សារនិងទាំងនៅសងខាងផ្សារលើអោយមានកន្លែងលក់ដូរទាំងអស់គ្នានិងឯកភាពគ្នា៕