ខេត្តប៉ៃលិន ៖ គេសង្កេតឃើញថា នៅផ្នែកខាងជើងបរិវេណផ្សារសាមគ្គី ហៅប៉ាហ៊ី ដែលមានទីតាំង ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ជាច្រើននាក់ មានការធុញទ្រាន់ និងរអ៊ូរទាំ ទៅនឹងភាពរញ៉េរញ៉ៃ ឥតសណ្តាប់ធ្នាប់របស់អាជីវករលក់ដូរលើផ្លូវសាធារណៈយ៉ាងខ្លាំង ដោយចោទ
ប្រកាន់ទៅលើអាជ្ញាធរក្រុង ខេត្ត ថាមិនយកចិត្តទុកដាក់ ទើបចេះតែបណ្តែតបណ្តោយឱ្យអាជីវករលក់ដូរលើផ្លូវសាធារណៈ យ៉ាងអនាធិបតេយ្យបែបនេះ ។ ភាពអនាធិបតេយ្យនេះ បានកើតមានឡើងអស់រយៈពេលប្រហែលជាច្រើនឆ្នាំកន្លងមកហើយ វាហាក់ដូចជាមិនឃើញមានវិធានការអ្វីពីសំណាក់អាជ្ញាធរណាម្នាក់ឡើយ ពោលគឺ បណ្តែតបណ្តោយឱ្យក្រុមអាជីវករ បន្តលក់ដូរនៅកណ្តាលផ្លូវ រកកន្លែងដើរ ជិះកង់ម៉ូតូ ឬបើកបររថយន្តមិនកើត នោះឡើយ ដោយមានអាជីវការខ្លះ លក់នៅសងខាងផ្លូវ ខ្លះទៀតដាក់ ត្រីសាច់ បន្លែ រ៉ឺម៉កម៉ូតូ លក់ដូរនៅចំកណ្តាលទ្រូងផ្លូវតែម្តង ។
ប្រភពព័ត៌មានពីប្រជាពលរដ្ឋដែលធ្វើដំណើរឆ្លងកាត់ បានឱ្យដឹងថា៖ ជារៀងរាល់ថ្ងៃ គេមិនដែលឃើញមានអាជ្ញាធរ ឬប្រធានផ្សារណាម្នាក់ ចុះមករៀបចំកន្លែងលក់ដូរនេះឱ្យមានសណ្តាប់ធ្នាប់នោះទេ ចង់អ្នកណាលក់ដូរនៅពីខាងមុខ ឬខាងក្រោយ ក៏គ្មានអ្នកណាឈឺក្បាលវិលមុខអ្វីដែរ ហើយពេលរថយន្តឬម៉ូតូបើកបរកាត់នៅកន្លែងនេះម្តងៗធ្វើឱ្យកកស្ទះចរាចរណ៍ពិបាកចៀសគ្នាខ្លាំងណាស់ ។ 
ចំណែកអ្នករត់ម៉ូតូឌុបវិញ ក៏ចតរញ៉េរញ៉ៃ នៅមុខផ្សារដែរ ដោយពេល រថយន្តបើកបរឆ្លងកាត់ផ្លូវនេះម្តងៗ បណ្តាលឱ្យកកស្ទះចរាចរណ៍យ៉ាងយូរ ព្រមទាំងម៉ូតូបងប្អូនប្រជាពលរដ្ឋដែល មកទិញឥវ៉ាន់ម្ហូបអាហារ យកមកចតនៅខាងមុខនេះ ក៏គ្មានសណ្តាប់ធ្នាប់ថែមទៀតដែរ ហើយគេមិនឃើញមាន សន្តិសុខណាម្នាក់ ចុះរៀបចំសណ្តាប់ធ្នាប់នោះទេ ។
ពាក់ព័ន្ធទៅនឹងបញ្ហាអាជីវករលក់ដូររញ៉េរញ៉ៃនៅខាងជើងផ្សារសាមគ្គី ហៅប៉ាហ៊ីនេះ លោកអធិការក្រុងប៉ៃលិន លឹម វាសនា បានឱ្យដឹងតាមទូរស័ព្ទនាព្រឹកថ្ងៃទី៦ ខែមីនា នេះថា ខាងលោកបានចូលរួមប្រជុំជាមួយអភិបាលក្រុងប៉ៃលិនកាលពីថ្មីៗកន្លងទៅនេះផងដែរ ប្រហែលជានឹងមានការរៀបចំសណ្តាប់ធ្នាប់ខាងមុខឆាប់ៗនេះ ប៉ុន្តែខាងលោកអត់ច្បាស់នោះទេ បើចង់ច្បាប់អាចទាក់ទងទៅលោកអភិបាលក្រុងប៉ៃលិន ដើម្បីសួរបញ្ជាក់បន្ថែម ទៀតចុះ ។
ចំណែកលោកអភិបាលរងក្រុងប៉ៃលិន ឡូ លុយ បានឱ្យដឹងតាមទូរស័ព្ទថា៖ ពាក់ព័ន្ធទៅនឹងបញ្ហាអាជីវករលក់ដូរយ៉ាងរញ៉េរញ៉ៃ អនាធិបតេយ្យ នៅខាងជើងផ្សារសាមគ្គីនេះ ខាងលោកបានរៀបចំប្រជុំគណកម្មាការរួចរាល់អស់ហើយ កាលពីពេលថ្មីៗកន្លងទៅនេះ ហើយអាជ្ញាធរ នឹងរៀបចំ បាញ់ថ្នាំចំណាំ ត្រង់កន្លែងផ្លូវសាធារណៈ ថាតើត្រូវឱ្យពួកគាត់ដាក់លក់នៅកន្លែងណាខ្លះ ឬឱ្យរើចេញទៅរកកន្លែងលក់ដូរសមរម្យ ណាផ្សេងទៀត ។
កន្លងមក មានករណីគ្រោះថ្នាក់ចរាចរណ៍កើតឡើងជាញឹកញាប់នៅត្រង់កន្លែង ដែលក្រុមអាជីវករលក់ដូរនៅលើផ្លូវសាធារណៈ ដូចជាករណីម៉ូតូបុកក្មេងៗ បាក់ដៃបាក់ជើង រថយន្តដាច់ហ្វ្រាំងប៊ិះនឹងបុកអ្នកលក់ដូរ និងអ្នកទិញម្ហូបស្លាប់។ ជួនកាលទៀតមានម៉ូតូជាប់ហ្វ្រាំង បុកអាជីវករ និងប្រជាពលរដ្ឋបណ្តាលឱ្យរបួសធ្ងន់ និងស្រាល ជាច្រើននាក់ កាលពីថ្មីៗកន្លងទៅនេះផងដែរ ៕
អត្ថបទ សេង សុវណ្ណារិទ្ធ
