ខេត្តប៉ៃលិន៖ស្ត្រីចំណាស់ម្នាក់ ដែលជាកម្មករស៊ីឈ្នួលដកដំឡូងមីឲ្យគេ បានឡើងដើមស្វាយ ក៏រអិលមែកស្វាយធ្លាក់មកក្រោម សន្លាប់មួយសន្ទុះ ក៏ដឹងខ្លួនងើបមិនរួច បានលូនប្រហែល១០០ម៉ែត្រហៅប្តីឲ្យជួយ ត្រួវបានបងប្អួនដឹកតាមម៉ូតូមកកាន់មន្ទីរពេទ្យបង្អែកខេត្តប៉ៃលិនភ្លាមៗ ។ ហេតុការណ៏ស្ត្រីចំណាស់រអិលមែកស្វាយធ្លាក់រងរបួសនេះ បានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី១១ ខែមិនា ឆ្នាំ២០១៥ ស្ថិតនៅចំការ ក្នុងភូមិកូនដំរី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពពត៌មានពីបុរសឈ្មោះ សៃ សាមុត អាយុ៥១ឆ្នាំ ត្រួវជាប្តីស្ត្រីរងគ្រោះ បានឲ្យដឹងថា៖ ប្រពន្ធរបស់គាត់ឈ្មោះ ឡាំ ម៉ន អាយុ៥៧ឆ្នាំ ជាអ្នកស៊ីឈ្នូលដកដំឡូងមីឲ្យគេ មករស់នៅខេត្តប៉ៃលិនបានប្រហែល៥ឆ្នាំ មានស្រុកកំណើតនៅខេត្តកំពង់ស្ពឺ ។ ប្រភពបន្តទៀតថា៖ នៅថ្ងៃកើតហេតុរូបគាត់និងស្ត្រីរងគ្រោះ បានមកស៊ីឈ្នូលដកដំឡូងគេដែលមានទីតាំងនៅភូមិកូនដំរី ឃុំស្ទឹងត្រង់ បន្ទាប់ពីសំរាកបាយថ្ងៃត្រង់ ស្ត្រីរងគ្រោះ បានដើទៅចូលចំការស្វាយ ដើម្បីបោះស្វាយយកមកហូប ប៉ុន្តែ នៅពេលឡើងលើដើម ស្រាប់តែរអិលមែកស្វាយធ្លាក់មកក្រោម សន្លាប់មួយសន្ទុះ ហើយក៏ដឹងខ្លួនវិញ ក៏មានការចុកចង្កោះងើបមិនរួច ក៏លូនបានប្រហែល១០០ម៉ែត្រ ក៏ស្រែកហៅរូបគាត់ឲ្យជួយ ព្រមទាំងកម្មករដែលធ្វើការជាមួយ។ ប្រភពបន្តថា៖ក្រោយពេលកើតហេតុរុបគាត់និងកម្មករក្នុងចំការ បាននាំគ្នាទៅជួយលើក យកមកដាក់លើគ្រែ ដោយឃើញស្ថានភាពស្ត្រីរងគ្រោះជាប្រពន្ធមានអាការៈមិនស្រួល ក៏លើកដាក់លើម៉ូតូយកមកសង្គ្រោះនៅមន្ទីរពេទ្យបង្អែកខេត្តប៉ៃលិនតែម្តង ៕ អត្ថបទ សេង សុវណ្ណារិទ្ធ