ខេត្តក្រចេះ៖ រថយន្តសាំងយ៉ុងដឹកអ្នកដំណើរ លួចបង្កាប់ឈើប្រណិតបើកបរក្នុងល្បឿន លឿនពេក ទំនងជាកំពង់រត់គេចពីការតាមប្រមាញ់របស់ សមត្ថកិច្ចនោះក៍បានជ្រុលទៅបុកបាក់ផ្ទះបាយប្រជាពលរដ្ឋ នៅចំណុចនៅភូមិព្រែកតាអាំ ឃុំបុសលាវ ស្រុកចិត្របុរី
ខេត្តក្រចេះ កាលពីវេលាម៉ោង៥ទាបភ្លឺព្រឹកមិញនេះ ។
ប្រភពពីសមត្ថកិច្ចមូលដ្ឋាន បានអោយដឹងថា រថយន្តសាំយ៉ុងពណ៏សគ្មានស្លាកលេខ មួយគ្រឿងនេះបើកបរ ក្នុងទិសដៅពីជើងទៅត្បូង លុះមកដល់ចំនុច ដែលជាកន្លែងផ្លូវកោងខ្លាំងក៏ជ្រុលចង្កូត ទៅបុកផ្ទាំងប៉ាណូនៅតាមជញ្ជើមផ្លូវបាក់ពីផ្ទាំង ហើយក៍ជ្រុលទៅផ្ទះប្រជាពលរដ្ឋ បណ្តាលឲ្យផ្ទះបាយមួយកំណាត់ត្រូវបាក់ខូចខាតទាំងស្រុង ចំណែករថយន្តបង្កត្រូវបានក្រឡាប់ផ្ងារជើងឡើងលើ ខ្ទាតចេញសុទ្ធតែឈើប្រណិតធ្នង់សន្លឹកជាច្រើនផងដែរ ។
បើការឲ្យដឹងពីស្ត្រី ដែលជាម្ចាស់ផ្ទះឈ្មោះ ទូ ឡេន បានបញ្ជាក់ឲ្យដឹងថា មុនពេលកើតហេតុ រូបគាត់កំពុង អង្គុយធ្វើការនៅក្រោមផ្ទះ ស្រាប់តែរថយន្តនេះ បើកលឿនដូចព្រួញសំដៅមកបុកប៉ានណូចំនួន២ផ្ទាំងនៅចំហៀងផ្លូវកែងហើយក៏ជ្រុលមកបុកចំផ្ទះបាយ របស់គាត់លាន់សូរប្រាវ គាត់ក្រឡេកទៅឃើញផ្ទះបាយគាត់បានដាច់ចេញពីគ្នាតែម្តង ប៉ុន្តែសំណាងល្អ ដែលមិនបណ្តាលឲ្យមានអ្នករងរបួសឬស្លាប់បាត់បង់ជីវិតឡើយ ។
ស្ត្រីជាម្ចាស់ផ្ទះបញ្ជាក់ថា នេះជាលើកទី៣ហើយដែលមានរថយន្តសាំយ៉ុងដឹកឈើប្រណិតធ្នង់សន្លឹកដូចគ្នានេះ មកក្រឡាប់ត្រង់ផ្លូវកោងខាងជើង ក្បែរផ្ទះគាត់ តែមិនបណ្តាលឲ្យមានការខូចខាតបាក់បែកទ្រព្យសម្បត្តិដូចពេលនេះទេ។
ប្រភពមួយផ្សេងទៀតបានបញ្ជាក់ថា រថយន្តដឹកឈើដែលក្រឡាប់នោះ ទំនងជាកំពង់ព្យាយាមបើករត់គេច ពីការតាមប្រមាញ់របស់សមត្ថកិច្ច ទើបគេបើកលឿនបែបនេះ ព្រោះមុនពេលកើតហេតុគេឃើញមានរថយន្តមួយផ្សេងទៀតបើកប្រដេញតាមក្រោយប៉ុន្តែពួកគាត់ស្គាល់ថាសមត្ថកិច្ចខាងណានោះទេ ។
ប្រភពបន្តរថា បច្ចុប្បន្នសង្កេតឃើញពពួករថយន្តសាំយ៉ុងដឹកឈើ គ្រឿងសង្ហារឹម ឬ ដឹកជន្លង់ម្រេចច្រើនណាស់ ក្នុងមួយថ្ងៃៗ ហើយក្រុមនេះបើកបរលឿនមិនដែលចេះយឺតទេ បើទោះបីផ្លូវតូចចង្អៀតយ៉ាងណាក៍ដោយ ហើយរថយន្តទាំងនេះតែងតែបង្កឲ្យមានគ្រោះថ្នាក់ចរាចរណ៍ជាញឹកញាប់ ប៉ុន្តែសមត្ថកិច្ច ឬមន្ត្រីជំនាញមិនដែលខ្វល់រឿងបញ្ហារសុវត្ថិភាពរបស់ប្រជាពលរដ្ឋដែលកំពង់តែចរាចរណ៍នៅតាមដងផ្លូវនោះឡើយ ។
ផ្ទុយទៅវីញពួកគាត់សង្កេតឃើញក្រុមសមត្ថកិច្ចដែល(ដាក់កុងត្រូលជជុះ)នៅត្រង់ចំណុចសងខាងក្បាលស្ពានពាមទេ ចាំយកលុយពីក្រុមរថយន្តដឹកបទល្មើស ហើយបើរថយន្តណាមួយមិនបានបង់លុយឲ្យគេទេ ពួកគេនឹងប្រដេញតាមចាប់ប្រផាប់ប្រផីង ដូចតាមចាប់ចោរអញ្ជឹង ។
លោក កែវ ចំណាន នាយសង្កាត់រដ្ឋបាលព្រៃឈើកន្ទួត បានអោយដឹងដែរថា ឈើប្រណិតទាំងនោះគឺសុទ្ឋសឹងជាប្រភេទឈើធ្នង់ មានចំនួន៣៩កំណាត់ បើតាមការប៉ាន់ស្មានប្រហែលជាជាង២ម៉ែត្រគូប ហើយបច្ចុប្បន្ននេះកំពង់មានការចម្រោងចម្រាស់គ្នាដោយសារម្ចាស់ដែលរងកាខូចខាតមិនអនុញ្ញាតអោយសមត្ថកិច្ចនាំយកឈើឬរថយន្តបង្ករ ចេញទៅណាឡើយ ដោយគាត់ព្រួយបារម្ភខ្លាចមិនមានអ្នកដោះស្រាយបញ្ហារ ការខូចខាតទ្រព្យសម្បត្តិរបស់គាត់ ។ ម៉េង ហ៊ាង