បាត់ដំបង: ជំទប់ទីពីរឃុំម្នាក់ នៅក្នុងឃុំរកា ស្រុកសង្កែ ខេត្តបាត់ដំបង ដែលក្រុមគ្រួសារលោក មានផ្ទុកមេរោគអេដស៍ទាំងប្តី ទាំងប្រពន្ធ កំពុងធ្លាក់ក្នុងសភាពដុនដាបខ្លាំងហើយ កាលពីថ្ងៃទី12-3-15នេះ បន្ទាប់ពីកូនៗរបស់លោកបានបញ្ជូនទៅសំរាកព្យាបាលនៅឯមន្ទីរពេទ្យខេត្ត អស់រយ:ពេល ប្រមាណជិតមួយខែកន្លងមកនេះ។
គួរបញ្ជាក់ដែរថា បន្ទាប់ពីមានការចំលងមេរោគអេដស៍ពីគ្រូពេទ្យភូមិម្នាក់រួចមក ប្រជាពលរដ្ឋ
នៅទូទាំងស្រុកសង្កែ បានក្លាយខ្លួនជាជនរងគ្រោះ ដោយមានផ្ទុកមេរោគអេដស៍សរុបប្រមាណ ជាង900នាក់ ទាំងនេះគឺជាសោកនាដកម្មមួយយ៉ាងសាហាវឃោរឃៅជាទីបំផុតដែលមិនអាចស្មានដល់ព្រោះអត្រានេះ គឺជាបន្ទុកមួយដ៏ធ្ងន់ធ្ងរ សំរាប់រាជរដ្ឋាភិបាល ដែលជាអ្នកចេញមុខគិតគូរ អំពីសុខទុក្ខនិងជីវភាពក្នុងការរស់នៅប្រចាំថ្ងៃរបស់ពួកគាត់។
បន្ទាប់ពីទទួលបានព័ត៌មានថា ថ្មីៗនេះជំទប់ទីពីរឃុំរកា កំពុងស្ថិតក្នុងសភាពយ៉ាប់យុឺន ទៅហើយនោះ កម្ពុជាថ្មីបានព្យាយាមចុះទៅដល់លំនៅដ្ឋានរបស់លោក ដែលស្ថិតក្នុងភូមិរកានេះតែម្តងដើម្បីពិនិត្យមើលស្ថានភាពរបស់លោក។
នៅទីនោះប្អូនប្រុស ឆម ហ៊ អាយុ34ឆ្នាំ ត្រូវជាកូនបង្កើតបានរៀបរាប់នៅក្បែនឹងឪពុកដែល
កំពុងសំរាកដាក់សេរ៉ូមជាប់នៅនឹងដៃថា ឪពុក និងម្តាយរបស់គេគឺមានផ្ទុកមេរោគអេដស៍ទាំងពីរនាក់ ប៉ុន្តែពេលនេះគឺសភាពជំងឺរបស់ឪពុកកាន់តែធ្ងន់ធ្ងរខ្លាំងហើយ ដោយឡែកម្តាយ ដូចជាមិនមានបញ្ហា អ្វីនោះទេ ព្រោះពេលនេះម្តាយបានទៅមន្ទីរពេទ្យដើម្បីបើកថ្នាំពន្យា។
ប្អូនប្រុសបានបន្តថា ឪ់ពុករបស់ខ្លួនឈ្មោះ សឿន ឆម អាយុ63ឆ្នាំ ជាជំទប់ទីពីរឃុំរកា
ចណែកម្តាយមានឈ្មោះ រឿន រ៉ាយ អាយុ58ឆ្នាំ គឺចាប់តាំងពីដឹងថារូបគាត់មានផ្ទុកមេរោគអេដស៍ រួចមកគឺគាត់ហាក់ដូចជាមានសភាពកាន់តែដាបទៅៗ ប៉ុន្តែខុសប្លែកត្រង់ថា កន្លងមកការពិនិត្យរោគគឺលោកឪពុកមិនដែលមានរោគរបេងនោះទេ លុះប្រហែលជាមួយខែមុនដោយសង្គេតឃើញអការ: លោកឪពុកមានការខុសប្លែកច្រើនទើបសំរេចចិត្តបញ្ជូនគាត់ទៅសំរាកព្យាបាលនៅក្នុងមន្ទីរពេទ្យខេត្ត ហើយនៅទីនោះលោកឪពុកត្រូវបានក្រុមគ្រូពេទ្យ ដាក់គាត់ទៅនៅក្នុងសាលរបេង ដោយបានអះអាងថាគាត់មានជំងឺរបេងមួយមុខទៀត ព្រមទាំងបានផ្តល់ថ្នាំរបេងអោយគាត់លេបជាប្រចាំផង។ចាប់តាំងពីគាត់លេបថ្នាំរបេងពេលណា គឺអការ:រោគរបស់គាត់កាន់តែធ្ងន់ធ្ងរខ្លាំងឡើងស្ទើរតែផុតដង្ហើមម្តងៗ
លុះនៅថ្ងៃទី12-3-15 ដោយសង្គេតឃើញគាត់រឹងខ្លួន និងហើមដៃ ហើមជើង ព្រមទាំងគ្រាប់ភ្នែក ឡើងល្អក់ទៅហើយនោះ ក៏សុំគ្រូពេទ្យយកគាត់មកមើលនៅផ្ទះវិញ ដោយក្តីអស់សង្ឃឹម។ ហើយនៅពេលនេះ ទាំងបងប្អូនអ្នកដែលរស់នៅក្នុងភូមិ បានមកចោមរោមមើលគាត់ ដោយចាស់ៗខ្លះបាននាំគ្នាសូត្រធ៌មជាបណ្តើរៗហើយព្រោះម្នាក់ៗគ្មានសង្ឃឹមថាគាត់អាចបន្តជីវិតតទៅទៀតបានទេ។
ប្អូនប្រុស ឆម ហ៊ បានសង្កត់ធ្ងន់ថា ការរស់នៅក្នុងមន្ទីរពេទ្យបង្អែកខេត្តប្រមាណជិតមួយខែ
មកនេះ គឺក្រុមគ្រូពេទ្យហាក់មិនសូវយកចិត្តទុកដាក់ទៅលើអ្នកជំងឺទាល់តែសោះ ពិសេសគឺនៅពេលយប់ ព្រោះថ្ងៃខ្លះ នៅពេលដែលឃើញសភាពគាត់មានការយ៉ាប់ខ្លាំងខ្លួនក៏បានទៅហៅគ្រូពេទ្យអោយមកជួយមើល ប៉ុន្តែក្រោយពីមកស្ទាបខ្លួនហើយគឺគេពោលថា “អ្នកកើតអេដស៍តែអញ្ចឹង ហើយគេក៏ត្រឡប់ ទៅវិញបាត់ទៅ គឺគ្មានពាក្យអ្វីនិយាយអោយក្រុមគ្រួសារមានកក់ក្តៅក្នុងចិត្តទាល់តែសោះ ព្រោះអ្នកជំងឺបើគ្រូពេទ្យចេះប្រើភាសាល្អ នោះអារម្មណ៍របស់អ្នកជំងឺអាចបានធូរស្បើយទៅតាមហ្នឹងដែរ។
រាល់សកម្មភាព និងទង្វើ ដែលក្រុមគ្រូពេទ្យខេត្តបានធ្វើ សូមអោយលោកប្រធានមន្ទីរពេទ្យ
ពិនិត្យឡើងវិញ ព្រោះយ៉ាងណាក៏គួរតែគិតដល់ក្រមសីលធ៌មផងដែរដើម្បីជៀសវាងនូវពាក្យរិះគន់ពីសំណាក់មជ្ឈដ្ឋានខាងក្រៅវាមិនល្អទាល់តែសោះ។
នៅថ្ងៃ13មីនានេះដែរ គេសង្គេតឃើញលោក ឡោក ហ៊ួរ ប្រធានក្រុមការងារចុះជួយស្រុកសង្កែ របស់គណ:បក្សប្រជាជនក៏បានអញ្ជើញចុះទៅសួរសុខទុក្ខ ព្រមទាំងបានផ្តល់ជាអំណោយដល់លោក ជំទប់ទីពីរនេះដែរ ដើម្បីទប់ទល់ដល់ជីវភាពរបស់ក្រុមគ្រួសារ ដែលមិនអាចចេញទៅប្រកបការងារ រកស៊ីងក្រៅបានសោះនោះ ដោយសារតែរវល់ថែទាំដល់អ្នកជំងឺ៕
សោ និយមរ័ត្ន