ស្ទឹងត្រែង៖ឈើផ្ចឹកសុក្រំប្រភេទសរសរប្រវែងចាប់ពី៣ម៉ែត្ររហូតដល់៥ម៉ែត្រដែលមានមុខកាត់ចាប់ពី២០សង់ទីម៉ែត្ររហូតដល់២៥សង់ទីម៉ែត្រ ប្រមាណជិត២រយកំណាត់ ដែលក្រុមឈ្មួញអារលាក់ទុកក្នុងព្រៃត្រូវបានបញ្ជាពីរដ្ឋបាលព្រៃឈើថ្នាក់កណ្តាល អោយកំលាំង
រដ្ឋបាលព្រៃឈើស្ទឹងត្រែង ធ្វើការចុះបង្ក្រាបកាលពីម៉ោង១៥និង៣០នាទីរសៀលថ្ងៃទី១៨ខែមិនាឆ្នាំ២០១៥ នៅចំណុចផ្លូវចូលញ៉ឺន ស្ថិតក្នុងភូមិគីឡូ៨ សង្កាត់សាមគ្គី ក្រុងស្ទឹងត្រែង។
ទីតាំងស្តុកឈើខាងលើគឺជាទីតាំងដែលក្រុមឈ្មួញតែងតែប្រព្រឹត្តបទល្មើសរាប់ឆ្នាំមកហើយ ហើយគេមិនដែលឃើញមានការបង្ក្រាប ពីខណ្ឌរដ្ឋបាលព្រៃឈើស្ទឹងត្រែងទេ? តែក្រោយពីមានសេចក្តីរាយការណ៍ដល់ជំនាញរដ្ឋបាលព្រៃឈើថ្នាក់កណ្តាល បានបញ្ជាអោយលោកឈាង តុលានាយខណ្ឌដាក់កំលាំងធ្វើការចុះបង្ក្រាបតែម្តង។
ប្រភពពីប្រជាពលរដ្ឋបានអោយដឹងថាឈើទាំងនោះ ត្រូវបានក្រុមឈ្មួញអារជ្រៀក ក្នុងភូមិសាស្ត្រខាងលើ ជាសរសរដែលមានប្រវែងចាប់ពី៣ម៉ែត្ររហូតដល់៥ម៉ែត្រ និងបានដឹកតាមគោយន្តមកដាក់នៅតាមអមសងខាងផ្លូវលំ ជាច្រើនគំនរក្នុងមួយគំនរៗ មានចាប់ជិត១០ដើមរហូតជិត២០ដើម និងគ្រោងធ្វើការដឹកជញ្ជូនចេញ ក្រោមការត្រូវរូវគ្នាជាមួយជំនាញមូលដ្ឋាន តែក្រោយពីមានសេចក្តីរាយការណ៍ ដល់រដ្ឋបាលព្រៃឈើថ្នាក់កណ្តាល ទើបមានការបង្ក្រាប។
ប្រជាពលរដ្ឋបានលើឡើងពីភាពអសកម្មរបស់ខណ្ឌរដ្ឋព្រៃឈើស្ទឹងត្រែង ដោយមើលឃើញថាសព្វថ្ងៃភាពអនាធិបតេយ្យក្នុងការដឹកជញ្ជូនឈើនៅតាមដងផ្លូវជាតិលេខ៧ ទាំងតាមគោយន្តនិងតាមរថយន្តយីឌុប ដែលបន្លំតាមខ្សែរថយន្តស្របច្បាប់ ក្រោមការឃុបឃិតជាមួយមន្ត្រីជំនាញ។ជាក់ស្តែងដូចជាឈើខាងលើនេះ បើសិនមិនមានការទាន់ពេលវេលាទេនោះ ត្រូវបានដឹកទៅដល់គោលដៅបាត់ទៅហើយ។
ឈើនេះត្រូវបានមន្ត្រីរដ្ឋព្រៃឈើ យករថយន្តយីឌុបមួយគ្រឿង ដើរប្រមូលពេញមួយរថយន្តយីឌុបតែម្តង ដែលមានចំនួនប្រហែល១៨០ដើម រីឯចំនួនពិតប្រាកដគេមិនទាន់បានវាស់វែងនៅឡើយទេហើយបានធ្វើការដឹកជញ្ជូនទាំងយប់ យកមករក្សាទុកនៅខណ្ឌរដ្ឋបាលព្រៃឈើខេត្តដើម្បីចាត់ការតាមនីតិវិធីច្បាប់៕