បាត់ដំបង: យ៉ាងហោចណាស់ក៏មាននារីម្នាក់ត្រូវបានរថយន្តកៀបស្លាប់ភ្លាមៗ ក្នុងចំណោមអ្នកដំណើរដែលរងរបួសធ្ងន់ស្រាលជាង20នាក់ ខណ:ដែលរថយន្តក្រុងនេះកំពុងបើកបរយ៉ាងលឿនតាមបណ្តោយផ្លូវជាតិលេខ5 ក្នុងទិសដៅពីភ្នំពេញទៅប៉ោយប៉ែត កាលពីថ្ងៃទី 22-3-15 
វេលាម៉ោង 2,23នាទី រំលងអធ្រាត លុះទៅដល់ចំនុចភូមិអូសទូក ឃុំកំពង់ព្រៀងស្រុកសង្កែ ខេត្តបាត់ដំបង ស្រាប់តែអ្នកបើកបរហាក់បីដូចជាងងុយដេក ក៏រេចង្កូតធ្លាក់ទៅបុកនឹងខឿនផ្លូវចូលផ្ទះប្រជាពលរដ្ឋ ហើយហោះទៅធ្លាក់នៅក្នុងប្រលាយតែម្តង។យោងតាមរបាយការណ៍របស់សមត្ថកិច្ចមូលដ្ឋានដែលបានសាកសួរអ្នកដំណើរបានអោយដឹងថា មុនពេលកើតហេតុគឺមានរថយន្តក្រុងមួយគ្រឿងរបស់ក្រុមហ៊ុន លីហុង ពាក់ស្លាកលេខ ភ្នំពេញ
3B 6159 គឺធ្វើដំណើរក្នុងទិសដៅពីភ្នំពេញ ទៅប៉ោយប៉ែត ថែមទាំងបានបើកបរក្នុងល្បឿនយ៉ាងលឿន ទៀតផង លុះទៅដល់ត្រង់ចំនុចកើតហេតុ ស្រាប់តែអ្នកបើកបរហាក់ដូចជាដេកលក់ ទើបធ្វើអោយ រថយន្តនោះបានរេចង្កូតទៅខាងស្តាំ ផ្អៀងធ្លាក់ទៅក្នុងប្រលាយ ហើយជ្រុលទៅបុកនឹងខឿនដែលគេធ្វើផ្លូវសំរាប់ចូលផ្ទះយ៉ាងពេញទំហុឹង ព្រមទាំងបានហោះរំលងទៅធ្លាក់ក្នុងប្រលាយម្ខាងទៀត ធ្វើអោយអ្នកដំណើរនៅក្នុងរថយន្តទាំងអស់មានការភិតភ័យ
ស្លន់ស្លោ និងបោកទង្គិចទៅនឹងរថយន្តបណ្តាលអោយរងរបួសជាច្រើននាក់ ដោយឡែកស្ត្រីម្នាក់ដែលអង្គុយនៅខាងមុខគឺត្រូវក្បាករថយន្ត ដែលរួញយ៉ាងខ្លាំងនោះកៀបជាប់ និងស្លាប់ភ្លាមៗតែម្តង។ក្រោយពេលកើតហេតុ នៅពេលសមត្ថកិច្ចចុះទៅដល់ ទើបដឹងថានារីរងគ្រោះដែលស្លាប់នោះមានឈ្មោះ អ៊ុំ អូន អាយុ41ឆ្នាំ រស់នៅភូមិកំពង់អុល សង្កាត់ផ្សារឆ្នាំង ក្រុងកំពង់ឆ្នាំង រីឯអ្នករបួសទាំងអស់សរុបមានចំនួន25នាក់ ដោយក្នុងនោះមានរបួសធ្ងន់ចំនួន3នាក់ ចំណែកបុរសម្នាក់ដែលមានវ័យប្រហែលជាង30ឆ្នាំ ហើយត្រូវបានបាក់ជើងខាងឆ្វេងម្ខាងបាននិយាយថាគេគឺជាព្រូឡាន ប៉ុន្តែបើតាមការសិក្សា និងពិនិត្យទៅលើរថយន្តដែលមានការប៉ះទង្គិចយ៉ាខ្លាំងចំកន្លែងអង្គុយរបស់អ្នកបើកបរនោះ សមត្ថកិច្ចអាចធ្វើការសន្និដ្ឋានបានថាបុរសរូបនេះអាចជាអ្នកបើកបរ ប៉ុន្តែត្រូវបានគេលាក់លៀមមិនហ៊ាននិយាយប្រាប់គេ ដោយខ្លាចមានគ្រោះថ្នាក់។ក្រោយពេលកើតហេតុ សមត្ថកិច្ចបានបញ្ជូនជនរងគ្រោះទាំងអស់
ទៅកាន់មន្ទីរពេទ្យយ៉ាងបន្ទាន់ ដើម្បីធ្វើការសង្គ្រោះ ដោយឡែកសពក៏ត្រូវបានប្រគល់ទៅអោយក្រុមគ្រួសារដែរដើម្បីទទួលយកទៅធ្វើបុណ្យតាមប្រពៃណីនៅឯលំនៅដ្ឋាន ចំពោះរថយន្តដែលបង្កអោយមានគ្រោះថ្នាក់ដល់អាយុជីវិត របស់អ្នកដំណើរនោះត្រូវបាននាំយកទៅរក្សាទុកនៅអធិការដ្ឋានជាបណ្តោះអាសន្នដើម្បីរកដំណោះ ស្រាយជាក្រោយ ហើយទោះបីជាអ្នកបើកបរឆ្លើយថាជាព្រូក៏ដោយក៏មិនអាចគេចផុតពីសំណាញ់ច្បាប់ដែរ ព្រោះក្នុងនាមជាអ្នកបើកបរមិនមានការទទួលខុសត្រូវដល់ជីវិតអ្នកដំណើរដែលសង្ឃឹម និងទុកចិត្តទៅលើអ្នកបើកបរតែម្នាក់គត់នោះ បែបនេះគួរតែច្បាប់ដាក់ទណ្ឌកម្មអោយបានតឹងរុឹងបន្តិចទៅលើ
អ្នកបើកបរដែលខ្វះការទទួលខុសត្រូវ៕
