គ្រោះថ្នាក់ចរាចរណ៍ដ៏គួរឱ្យរន្ឋត់មួយ ដែលបង្កឡើងដោយសារតែរថយន្តធនធំ បើកក្នុងល្បឿនយ៉ាងលឿន ជ្រុលទៅបុកម៉ូតូមួយគ្រឿង ដែលជិះដោយមនុស្សប្រុសស្រី៤នាក់ បណ្តាលឱ្យនារីម្នាក់ ស្លាប់យ៉ាងអាណោចអាធោម នៅនឹងកន្លែងកើតហេតុ ត្រូវរថយន្តបុកនិងកិនបែកក្បាលធ្លាយខួរ និងនារីម្នាក់ទៀត ស្លាប់ពេលបញ្ចូលទៅសង្គ្រោះ នៅមន្ទីរពេទ្យបានពាក់កណ្តាលផ្លូវ ចំណែកយុវជនម្នាក់ នារីម្នាក់ទៀត រងរបួសធ្ងន់ធ្ងរត្រូវបានរថយន្តសាមុយ ដឹកយកទៅសង្គ្រោះ នៅមន្ទីរពេទ្យភ្លាមៗផងដែរ ។
ហេតុការណ៍នេះ បានកើតឡើងកាលពីវេលាម៉ោង១០នឹង៤០នាទីយប់ ថ្ងៃទី២១ ខែមិនា ឆ្នាំ២០១៥ នៅចំណុចខាងត្បូងនឹងស្ពានដែក តាមបណ្តោយផ្លូវព្រះមុន្នីរ៉េត ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
នារីរងគ្រោះដែលត្រូវរថយន្ត កិនបែកក្បាលធ្លាយខួរ មានឈ្មោះ ដា នី អាយុជាង២០ឆ្នាំ នឹងនារីដែលបានស្លាប់ ពេលបញ្ចូនទៅសង្គ្រោះ បានពាក់កណ្តាលផ្លូវ មានឈ្មោះ ភឿន អាយុ៣៣ឆ្នាំ អ្នកទាំង២ ជាបងប្អូនបង្កើតនឹងគ្នា មានស្រុកកំណើត នៅក្នុងឃុំពាមទា ស្រុកកំពង់ត្របែក ខេត្តព្រៃវែង ។
ប្រភពពត៌មានពីសាក្សី នៅកន្លែងកើតហេតុ បានឱ្យដឹងថា មុនពេលកើតហេតុ គេបានឃើញមនុស្សប្រុសស្រី៤នាក់ ជិះម៉ូតូសេ១២៥ ពណ៍ខ្មៅ សេរីឆ្នាំ២០០៨មួយគ្រឿង ពាក់ស្លាកលេខ កណ្តាល 1D-3757 ឌុបគ្នាតាមបណ្តោយផ្លូវ២១៧ ទិសដៅពីត្បូងទៅជើង ខណះមកដល់ចំណុចកើតហេតុ ស្រាប់តែមានរថយន្តធនធំមួយគ្រឿង បើកក្នុងល្បឿនយ៉ាងលឿន ក៏ជ្រុលទៅបុកម៉ូតូពីក្រោយពេញទំហឹង និងកិននារីម្នាក់ពីក្រោមកងរថយន្ត បណ្តាលឱ្យបែកលលាក្បាលស្លាប់ភ្លាមៗ ។ ប៉ុន្តែជាអកុសលនារីម្នាក់ ដែលត្រូវជាបងស្រី របស់នារីស្លាប់ខាងលើ ដែលរងរបួសធ្ងន់នោះ បានដាច់ខ្យល់ស្លាប់ ពេលបញ្ចូនយកទៅសង្គ្រោះ បានពាក់កណ្តាលផ្លូវ ចំណែកម៉ូតូត្រូវកិនជាប់ក្រោមរថយន្ត រងការខូចខាតយ៉ាងដំណំ ។
ប្រភពបន្តថា ក្រោយកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ភ្លាមៗ ដល់កន្លែងកើតហេតុ និងឃាត់ខ្លួនបានប្រូរថយន្តម្នាក់ យកទៅសាកសួរនៅបុស្តិ៍នគរបាល ស្ទឹងមានជ័យ និងបានសហការ ជាមួយជំនាញ ធ្វើការវាស់វែងយកម៉ូតូនិងរថយន្តបង្ក ទៅរក្សាទុកនៅការិយាល័យ ចរាចរណ៍ជើងគោក រាជធានីភ្នំពេញ រង់ចាំដោះស្រាយ នាពេលក្រោយ ។ សមត្ថកិច្ចបានឱ្យដឹងថា សពនារីរងគ្រោះទាំង២នាក់ ត្រូវបានក្រុមគ្រួសារ មកទទួលយកទៅធ្វើបុណ្យ នៅឯស្រុកកំណើតតាមប្រពៃណី ៕