ខេត្តសៀមរាប: យ៉ាងហោចណាស់ក៏មានក្រុមក្មេងសិស្សសាលាបឋមសិក្សាពង្រ ឃុំពង្រចំនួន៤នាក់បានរងរបួសធ្ងន់ ខណៈពួកគេរើសគ្រាប់មិនទាន់ផ្ទុះមួយគ្រាប់ប្រភេទ តេឡង់ យកទៅវាយលេង បណ្តាលឲ្យផ្ទុះកក្រើកវាលស្រែ ដែលអ្នកភូមិអះអាងថា ជាបន្ទាយទាហានចាស់ធ្វើឲ្យមានការភ្ញាក់ផ្អើលដល់ពលរដ្ឋ រីឯកុមារារងគ្រោះទាំង៤នាក់ត្រូវបានក្រុមគ្រួសារយកទៅសង្គ្រោះនៅមន្ទីរពេទ្យគន្ធបុប្ផាខេត្តសៀមរាប។
ហេតុការណ៍នេះបានកើតឡើងនៅវេលាម៉ោង១០ព្រឹកថ្ងៃទី២៤ ខែមីនា ឆ្នាំ២០១៥ ស្ថិតនៅក្នុងភូមិពង្រ១ ឃុំពង្រក្រោម ស្រុកជីក្រែង ខេត្តសៀមរាប និងមានចំងាយ ប្រមាណ ១៥០ម៉ែត្រ ពីសាលាបឋមសិក្សាពង្រ ដែលជាកន្លែង ដែលសិស្សរងគ្រោះ កំពុងសិក្សា។
អធិការនគរបាលស្រុកជីក្រែង លោកវរសេនីយ៍ទោ តូច សាកលបានប្រាប់នៅរសៀលថ្ងៃទី២៥ ខែមីនានេះថា កុមារារងគ្រោះទាំង៤ ដែលរងរបួសធ្ងន់ មានទី១.ឈ្មោះ ជា ចិត្ត អាយុ១៣ឆ្នាំ រស់នៅភូមិពង្រ, ទី២.ឈ្មោះ ហេង ស៊ាងហៃ អាយុ១២ឆ្នាំ មាន ទីលំនៅភូមិពពេល, ទី៣ ឈ្មោះ ដាវុធ អាយុ១០ឆ្នាំ មានទីលំនៅភូមិពង្រ១ និងទី៤.ឈ្មោះ ហ៊ុន រឿន អាយុ១២ឆ្នាំ មានទីលំនៅភូមិពពេល ឃុំពង្រក្រោម ស្រុកជីក្រែង។ ក្មេងរងគ្រោះ រៀនជុំគ្នា នៅសាលាបឋមសិក្សាពង្រ ឃុំពង្រក្រោម ស្រុកជីក្រែង ខេត្តសៀមរាប។លោកបន្តថា គ្រោះថា្នក់ផ្ទុះគ្រាប់នេះ គឺនៅពេលដែលគ្រូ ឲ្យសិស្សចេញលេង ហើយក្មេងទាំង៤បានធ្វើដំណើរទៅលេងក្រោយផ្ទះប្រជាជន ឈ្មោះ ឆឹង កន ដែលមានចំងាយ ខាងជើងសាលាពង្រ ប្រមាណ១៥០ម៉ែត្រ ហើយក្មេងប្រុស ឈ្មោះ ដាវុធ ក៏បានឃើញគ្រាប់តេឡង់ ចាស់មួយគ្រាប់ ហើយក៏យកមកឲ្យ កុមារឈ្មោះ ជា ចិត្ត ទុកលក់ឲ្យអ្នកទិញអេតចាយ ។បន្ទាប់មក ឈ្មោះ ជា ចិត្ត ក៏បានយកដំបង មួយកំណាត់មកដំ ទើបបណ្តាលឲ្យគ្រាប់តេឡង់នោះ ផ្ទុះឡើង ហើយកុមារទាំង៤ ដែលឈរក្បែរនោះ រងរបួសធ្ងន់ទាំងអស់គ្នា។ ក្រោយពីការផ្ទុះគ្រាប់ អ្នកស្រុក ក៏បានរត់ទៅកាន់ កន្លែងកើតហេតុ ក៏ឃើញកុមារាទាំង៤នាក់ រងរបួសរដូករណែល ក៏នាំគ្នាដឹកមកកាន់មន្ទីរពេទ្យ ដើម្បីព្យាបាល។លោកបញ្ជាក់ទៀតថា ទីតាំងខាងលើនេះពីមុនជាកន្លែងបន្ទាយទាហាន ដូច្នេះវាអាចនៅសេសសល់គ្រាប់មិនទាន់ផ្ទុះខ្លះៗ។
បន្ទាប់ពីកើតហេតុភ្លាមៗសមត្ថកិច្ចនិងក្រុមគ្រួសារក្មេងរងគ្រោះបានបញ្ជូនមកកាន់មន្ទីរពេទ្យគន្ធបុប្ផាដើម្បីជួយសង្គ្រោះ៕