ខណ្ឌសែនសុខ នារីម្នាក់ជិះម៉ូតូក្នុងល្បឿនយ៉ាងលឿន បុកម៉ូតូមួយគ្រឿងទៀត កំពុងជិះកាត់ទទឹងផ្លូវពេញទំហឹង បណ្តាលឱ្យយុវជនម្នាក់ បោកក្បាលហូរឈាមស្លាប់ភ្លាមៗ និងរបួសធ្ងន់៣នាក់ ត្រូវបានរថយន្តសាមុយ ដឹកយកទៅសង្គ្រោះ នៅមន្ទីរពេទ្យ ចំណែកម៉ូតូទាំង២គ្រឿង រងការខូចខាតយ៉ាងដំណំ កាលពីវេលាម៉ោង១នឹង១៥នាទីរំលងអាធ្រាត ឈានចូលថ្ងៃទី២៨ ខែមិនា ឆ្នាំ២០១៥ នៅចំណុចភ្លើងស្តុបទឹកថ្លា តាមបណ្តោយផ្លូវសហព័ន្ឋរ៉ុស្សី ស្ថិតក្នុងសង្កាត់ទឹកថ្លា ខណ្ឌសែនសុខ ។
យុវជនរងគ្រោះមានឈ្មោះ ប៊ូយ ពិសិដ្ឋ មានមុខរបរជាកម្មករ មានស្រុកកំណើតនៅភូមិវាល ឃុំស្អាងភ្នំ ស្រុកស្អាង ខេត្តកណ្តាល បច្ចុប្បន្នស្នាក់នៅកន្លែងធ្វើការ ក្នុងសង្កាត់ទឹកថ្លា ខណ្ឌសែនសុខ ។ប្រភពព័ត៌មាននៅកន្លែង បានប្រាប់ឱ្យដឹងថា មុនពេលកើតហេតុ គាត់បានឃើញយុវជនរងគ្រោះខាងលើ ជិះម៉ូតូឌ្រីមសេ១២៥ ពណ៍ខ្មៅមួយគ្រឿង សេរីឆ្នាំ២០១០ ពាក់ស្លាកលេខ កណ្តាល 1H-1088 ជិះឌុបគ្នា៣នាក់ តាមបណ្តោយផ្លូវលេខ១០១៩ ទិសដៅពីត្បូងទៅ
ជើង ខណះដែលកំពុងជិះឆ្លងកាត់ទទឹងផ្លូវ ជិតនឹងផុតទៅហើយនោះ ស្រាប់តែមាននារីម្នាក់ ជិះម៉ូតូអាយខុន សេរីឆ្នាំ២០០៨ ពណ៍ផ្ទៃមេឃលាយស ពាក់ស្លាកលេខ ភ្នំពេញ 1Y-4432 ជិះតាមបណ្តោយផ្លូវសហព័ន្ឋរ៉ុស្សី ទិសដៅពីលិចទៅកើត ក្នុងល្បឿនយ៉ាងលឿន និងបានវ៉ារថយន្ត ហើយបានបុកម៉ូតូជនរងគ្រោះពេញទំហឹង អូសប្រមាណជិត១០ម៉ែត្រ បណ្តាលឱ្យ
យុវជនម្នាក់ បោកក្បាលហូរឈាមស្លាប់ភ្លាមៗតែម្តង ដោយសារមិនបានពាក់មួកសុវត្ថិភាពនិង២នាក់ទៀត រងរបួសធ្ងន់ ចំណែកនារីម្នាក់នោះ ក៏របួសធ្ងន់ធ្ងរដែរ ត្រូវបានរថយន្តសាមុយ ដឹកយកទៅសង្គ្រោះនៅមន្ទីរពេទ្យ ។
ក្រោយកើតហេតុ សមត្ថកិច្ចបានចុះមកធ្វើការវាស់វែង យកម៉ូតូទាំង២គ្រឿង ទៅរក្សាទុកនៅការិយាល័យ ចរាចរណ៍ជើងគោក រាជធានីភ្នំពេញ រង់ចាំដោះស្រាយគ្នានាពេលក្រោយ ចំណែកសពជនរងគ្រោះ សមត្ថកិច្ចទំនាក់ទំនងទៅសាច់ញាតិ ឱ្យមកទទួលយកទៅធ្វើបុណ្យតាមប្រពៃណី ៕
