បាត់ដំបង: នៅមុខសាលាខេត្តបាត់ដំបងនាព្រឹកថ្ងៃទី11-5-15 មានប្រជាពលរដ្ឋប្រមាណជាង60នាក់មកពីភូមិក្បាលថ្នល់ ឃុំកំពង់ព្រៀង ស្រុកសង្កែ ខេត្តបាត់ដំបង ដែលសុទ្ធសឹងជាអ្នករស់នៅជុំវិញបឹងបុរាណដែលមានឈ្មោះថា”បឹងតាអឿ”បានឡើងមកសុំជួបនឹងលោកអភិបាលខេត្ត ក្នុងគោលបំនងសុំអោយលោកជួយពន្លឿនក្នុងការរកដំណោះស្រាយរឿងបឹងបុរាណនៅក្នុងតំបន់នោះ ដោយសារតែរដូវប្រាំងបានឈានចូលមកដល់ហើយ ឯការស្តារបឹងក៏ត្រូវអាក់ខានដោយសារតែមានបុគ្គលមួយចំនួន កំពុងអង្កន់ផ្ទៃបឹងចង់ច្បាមយកធ្វើជកម្មសិទ្ធិឯកជន។គួរបញ្ជាក់ដែរថា កន្លងមកដីបឹងតាអឿ ដែលជាបឹងបុរាណរបស់រដ្ឋ ត្រូវបានទទួលស្គាល់ដោយចាស់ព្រឹទ្ធាចារ្យជាច្រើននាក់នៅក្នុងភូមិ ពីលោកសួន សាវ៉េត អភិបាលស្រុកសង្កែ លោកចៅគឹមអូន អតីតអនុប្រធានមន្ទីរសុរិយោដីខេត្ត និងមន្ត្រីនៅក្នុងមន្ទីរនេះមួយចំនួនផងដែរ បន្ទាប់ពីបាន ចុះវាស់វែង និងបានចងក្រងជាប្រព័ន្ធចេញប័ណ្ណកាន់កាប់កម្មសិទ្ធិស្របច្បាប់កាលពីឆ្នាំ2008រួចមក
ដោយក្នុងប្លង់នីមួយៗសុទ្ធតែបានបញ្ជាក់ថាដីចំនុចនេះគឺជា”បឹងតាអឿ”។
រហូតដល់មានចំណារឯកភាពពីលោកអភិបាលនៃគណ:អភិបាលខេត្តដោយអនុញ្ញាតិអោយ
ប្រជាពលរដ្ឋនៅក្នុងសហគមន៍នេះធ្វើការស្តារបឹងឡើងវិញក្នុងទំហំ40ម៉ែត្រគុណ70ម៉ែត្រជំរៅ5ម៉ែត្រ ក្នុងទិសដៅពីរយ៉ាងគឺទីមួយរំដោះទឹកនារដូវវស្សាដើម្បីបញ្ជៀសនូវទឹកជំនន់ ទីពីររក្សាទឹកទុកស្រោច ស្រពផលដំណាំ ពិសេសគឺស្រូវប្រាំងនារដូវប្រាំង ដោយយល់ឃើញនូវបញ្ហាដែលអាចប្រឈមមុខនឹងផលវិបាករបស់ប្រជាពលរដ្ឋនៅក្នុងតំបន់ដែលគ្មានប្រភពតឹកនេះទើបលោអភិបាលខេត្តធ្វើការ សម្រេច ដែលមានលោកអភិបាលខេត្តរងជាម ច័ន្ទសោភ័ណ ជាអ្នកចុះហត្ថលេខា។ប៉ុន្តែការស្តារបឹងនេះទើបតែបានប្រមាណ40ភាគរយប៉ុណ្ណោះ ក៏ស្រាប់តែមានអ្នកមានលុយ មួយក្តាប់តូចបានមករារាំងថាដីនេះជាដីលំនៅដ្ឋានរបស់ពួកគេទៅវិញ ដែលធ្វើអោយដំណើរការ នៃការស្តារត្រូវបានផ្អាកជាបណ្តោះអាសន្ន ដែលជនដែលចង់ទន្ទ្រានយកដីបឹងនោះមានឈ្មោះ លោកហេង ហុង និងអ្នកស្រីម៉ាក់ ចាន់ថន ដែលមានអាស័យដ្ឋាននៅឯស្រុកគាស់ក្រឡឯណោះ ព្រមទាំងមានអ្នកចេញមុខមកចាត់ការក្នុងរឿងនេះគឺលោកឡេង ស្រ៊ុន ដែលគេស្គាល់ច្បាស់ថាជាថៅកែការ៉ាស់សាំង ផងដែរ។ បច្ចុប្បន្នដោយសារតែរដូវវស្សាកាន់តែខិតជិតមកដល់ហើយនោះ ប្រជាពលរដ្ឋនៅក្នុងសហគមន៍បឹងតាអឿទាំងមូល កំពុងរងចាំការរកដំណោះស្រាយពីសំណាក់អាជ្ញាធរខេត្តយ៉ាងអន្ទះសារ ដោយម្នាក់ៗមិនហ៊ានចេញទៅប្រកបរបរអ្វីដែលនៅឆ្ងាយៗនោះទេ ដោយនៅរង់ចាំមើលការដោះស្រាយនេះ ព្រមទាំងបាននៅចាំមើលខ្លាចក្រុមនេះលួចចុះទៅធ្វើអ្វីមួយនៅលើផ្ទៃបឹងនេះផង។
ពីមួយថ្ងៃទៅមួយថ្ងៃការទន្ទឹងរង់ចាំរបស់ប្រជាពលរដ្ឋកាន់តែស្ងាត់ទៅៗ ដោយគេមិនដឹងថា
តើចំណាត់ការរបស់លោកអភិបាលខេត្តឈានដល់កំរិតណាហើយនោះទេ ទើបនៅព្រឹកថ្ងៃទី11ឧសភានេះប្រជាពលរដ្ឋទាំងអស់នៅក្នុងសហគមន៍បាននាំគ្នាមកប្រមូលផ្តុំខាងមុខសាលាខេត្តដើម្បីសុំជួបលោកអភិបាលខេត្ត ក្នុងនោះក៏មានខាងអង្គការអាដហុក ក៏បានចូលរួមផងដែរ នៅទីបំផុតសាលាខេត្តបានអនុញ្ញាតិអោយតំណាងចំនួន6នាក់ចូលជួប ប៉ុន្តែនៅព្រឹកនោះដែរលោកអភិបាលខេត្តជាប់មានធុរ:ប្រជុំជាមួយនឹងអង្គភាពប្រឆាំងអំពើពុករលួយដូច្នេះ ប្រជាពលរដ្ឋបានត្រឹមតែជួបនឹងតំណាងចំនួន3រូបតែប៉ុណ្ណោះគឺលោក នាង ចាន់ខារ៉ា នាយកទីចាត់ការអន្តរវិស័យនៃសាលាខេត្ត លោកង៉ែត មករា មន្ត្រីការិយាល័យកិច្ចការច្បាប់ខេត្ត និង លោកឈឹម សាប៊ុន អ្នកនាំពាក្យសាលាខេត្ត។ជំរាបជូននៅពេលនោះលោកហើស គី ប្រធានសហគមន៍បឹងតាអឿបានប្រគល់ឯកសារព្រមទាំងបានលើកឡើងថារដូវវស្សាឈានចូលមកដល់ហើយ ដូច្នេះប្រជាពលរដ្ឋទាំងអស់ស្នើសុំដល់លោកអភិបាលខេត្តមេត្តាជួយពន្លឿនក្នុងការរកដំណោះស្រាយ ដើម្បីបានស្តារបឹងនេះឡើងវិញក្នុងពេលឆាប់ៗខាងមុខនេះ ព្រោះការទាមទានេះពុំមែនយកទៅធ្វើជាកម្មសិទ្ធិរបស់អ្នកណាម្នាក់ឡើយ
ដោយគ្រាន់តែទាមទាយកដីបឹងនេះមកទុកជាសម្បត្តិរដ្ឋវិញតែប៉ុណ្ណោះ បន្ទាប់ពីមានបុគ្គមួយចំនួនចង់បានដីបឹងនេះជារបស់កម្មសិទ្ធិឯកជន។ក្នុងនោះផងដែរមន្ត្រីសាលាខេត្តទាំង3រូបបានបញ្ជាក់ប្រាប់ប្រជាពលរដ្ឋវិញថា លោកនឹងពាំនាំឯកសារ និងសំណូមពរទាំងនេះទៅជំរាបលោកអភិបាលខេត្តអោយលោកបានជ្រាប ព្រមទាំងត្រៀមបង្កើតក្រុមគណ:កម្មការជំនាញដើម្បីចុះទៅដោះស្រាយក្នុងរឿងនេះ។ ទន្ទឹមនឹងនេះផងដែរ តំណាងប្រជាពលរដ្ឋបានស្នើសុំអោយអាជ្ញាធរខេត្តចាត់តាំងកំលាំង ក្នុងក្រុមគណ:កម្មការនោះដែលមានសមាសភាពដូចជាលោកងួន រតន: អតីតប្រធានមន្ទីររៀបចំ ដែនដីនគរូបនីយកម្ម លោកចៅ គឹមអូន អតីតអនុប្រធានមន្ទីរដែលបានចូលនិវត្តន៍ និងមន្ត្រីមួយចំនួន ដែលធ្លាប់បានចុះទៅសិក្សានិងវាស់វែងដីធ្លីនៅក្នុងតំបន់នេះ ដោយសុំបញ្ជៀសនូវលោកអ៊ូ ដារី ដែលលោកមិនសូវបានដឹងច្បាស់ពីប្រវត្តិដីបឹងតាអឿនេះ។ ក្រោយពីប្រជាពលរដ្ឋបានវិលត្រឡប់ទៅលំនៅដ្ឋានវិញនោះ ស្រាប់តែគេបានសង្គេតឃើញ ភាគីដែលមានគំនិតទន្ទ្រានដីបឹងនេះបានមកឈរនៅខាងមុខសាលាខេត្តឆ្ការដៃ ឆ្ការជើងនិងស្រែក ក្តែងៗដោយបានចោទប្រកាន់ថាប្រជាពលរដ្ឋជាអ្នកប្លន់ដីរបស់គេទៅវិញ ដោយគ្មានការខ្មាស់អៀន អ្វីបន្តិចទាល់តែសោះ ព្រោះចំនុចនេះអ្នកណាក៏គេស្គាល់ថាបឹងដែរ តែបែរជាគេហ៊ានពុសដីបឹងយកមកធ្វើជាកម្មសិទ្ធិឯកជនបែបនេះទៅវិញ។មិនត្រឹមតែប៉ុណ្ណោះគេចង់សំរុកចូលទៅជួបនឹងលោកអភិបាលខេត្តប៉ុន្តែត្រូវបានសមត្ថកិច្ចដែលនៅយាមប្រចាំការនៅទីនោះមិនអនុញ្ញាតិអោយចូលឡើយ។ នៅចំពោះមុខកម្ពុជាថ្មី ប្រជាពលរដ្ឋទាំងអស់បានសំណូមពរដល់សម្តេចតេជោ ហ៊ុន សែន មេត្តាជួយដល់ប្រជាពលរដ្ឋនៅក្នុងសហគមន៍បឹងតាអឿនេះផងព្រោះបញ្ហាកង្វះខាតទឹកបានកើតឡើង ជារៀងរាល់ឆ្នាំនៅក្នុងតំបន់នេះ ឯការទាមទាដីបឹងនេះក៏គ្មានសំរាប់បុគ្គលណាម្នាក់ដែរគឺដើម្បីផល ប្រយោជន៍រួមតែប៉ុណ្ណោះសំរាប់សហគមន៍”បឹងតាអឿ” ៕