ខេត្តបន្ទាយមានជ័យ៖ កម្លាំងនគរបាលការិយាល័យប្រឆាំងគ្រឿងញៀននៃស្នងការ ដ្ឋាននគរបាលខេត្តបន្ទាយមានជ័យបានសហការជាមួយកំលាំងនគរបាលក្រុងសិរីសោភ័ណបានធ្វើការស្រាវជ្រាវរហូតឈានទៅដល់ការចាប់ខ្លួនជនសង្ស័យបាន៣នាក់ពាក់ព័ន្ធនិង
សកម្មភាពចែកចាយនិងប្រើប្រាស់គ្រឿងញៀននៅផ្ទះសំណាក់ភ្នំពេជ្របានដកហូតថ្នាំញៀនបានមួយចំនួនធំ។ការចាប់ខួនជនសង្ស័យបានចំនួន៣នាក់នៅព្រឹកថ្ងៃទី១៤ខែឧសភាឆ្នាំ២០១៥នៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។លោកសីុវសុជាតិអធិការនគបាលក្រុងសិរីសោភ័ណបានឲ្យដឹងថា ក្រោយ ពីទទួល បានព័ត៌មានអំពីសកម្មភាពចែកចាយនិងជក់គ្រឿងញៀននៅក្នុងផ្ទះសំណាក់ខាងលើ រួចមកនោះលោកបានសុំគោលការណ៍និងបទបញ្ជាពីសំណាក់ស្នងការនគរបាលខេត្តលោកឧត្តមសេនីយ៍ អាត់ខែមហើយបានដឹកនាំកម្លាំងចុះទៅស្រាវជ្រាវ រហូតឈាន ទៅដល់ការបង្ក្រាប និងចាប់ខ្លួនជនសង្ស័យ២នាក់ព្រមទាំងដកហូតថ្នាំញៀនបានមួយកញ្ចប់តូច។លោកជាតិបានបន្តទៀតថាក្រោយការសួរនាំជនសង្ស័យទាំង២នាក់កម្លាំងនគរបាលរបស់លោកបានឈានទៅដល់ការចាប់ខ្លួនជនសង្ស័យបានម្នាក់ទៀតនិងដកហូតថ្នាំញៀនចំនួន៤កញ្ចប់បន្តទៀត។បើតាមរបាយការណ៍ របស់ការិយាល័យប្រឆាំងគ្រឿងញៀនខេត្តបន្ទាយមានជ័យ បានបង្ហាញថាជនសង្ស័យទី១មានឈ្មោះ ផនពន្លក អាយុ២០ឆ្នាំ មុខរបរមិនពិតប្រាកដ និងរស់នៅភូមិកន្ទួត សង្កាត់កំពង់ស្វាយ ក្រុងសិរីសោភ័ណ ទី២ឈ្មោះ សាន មករា អាយុ២៣ឆ្នាំ មុខរបរកម្មកររស់នៅភូមិ១សង្កាត់ព្រះពន្លានិងទី៣ឈ្មោះលីសុគីណាអាយុ២៥ឆ្នាំ មុខរបរ ជាងជួសជុល ទូរស័ព្ទ រស់នៅភូមិទឹកថ្លាសង្កាត់ទឹកថ្លាក្រុងសិរីសោភ័ណ។
ក្រោយការចាប់ខ្លួនជនសង្ស័យទាំង៣នាក់ត្រូវបានបញ្ជូនទៅសួរនាំនៅការិយាល័យប្រឆាំងគ្រឿងញៀនដើម្បីកសាងសំណុំរឿង ទៅកាន់តុលាការដើម្បីចាត់ការតាមផ្លូវច្បាប់។
បើតាមលោកឧត្តមសេនីយ៍ត្រីអាត់ខែមស្នងការនគរបាលខេត្តបន្ទាយមានជ័យលោកបានដាក់ផែនការឲ្យនគបាលចុះស្រាវជ្រាវ និងបង្ក្រាបមុខសញ្ញាគ្រឿងញៀនជាបន្តបន្ទាប់ដូចភ្លៀងរលឹមកុំឲ្យមានការប៉ះពាល់ដល់សង្គមជាតិ យ៉ាងធ្ងន់ធ្ងរបន្តទៀត៕
