បុរសម្នាក់ត្រូវបានគេស្គាល់ថាជាមន្ត្រីយោធាបើករថយន្តឡិចស៊ីRX៣៥០ បត់ឆ្លងផ្លូវបំណងចូលផ្ទះសំណាក់ត្រូវបានរថយន្តហ៊ីយ៉ានដាយដឹកត្រី មួយគ្រឿងបើកបុកចំពាក់កណ្តាលរថយន្តបណ្តាលឱ្យរងការខូចខាតយ៉ាងដំណំ កាលពីវេលាម៉ោង១២នឹង២០ នាទីរំលងអាធ្រាតឈានចូលថ្ងៃទី១៥ ខែឧសភា ឆ្នាំ២០១៥ នៅចំណុចមុខផ្ទះសំណាក់ យីហោឬស្សីកែវ តាមបណ្តោយផ្លូវជាតិលេខ៥ ស្ថិតក្នុងភូមិមិត្តភាព សង្កាត់ឬស្សី កែវ ខណ្ឌឬស្សីកែវ ។
សាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តហ៊ីយ៉ានដាយ ដឹកត្រី២តោនកន្លះមួយគ្រឿងពាក់ស្លាកលេខភ្នំពេញ 3C-0317 បើកបរតាមបណ្តោយផ្លូវជាតិលេខ៥ ទិសដៅ ពីជើងទៅត្បូង លុះមកដល់ចំណុចកើតហេតុមុខផ្ទះសំណាក់ យីហោឬស្សីកែវ ស្រាប់តែមានរថយន្តឡិចស៊ីស RX៣៥០ ពណ៍ស្ករ ពាក់ស្លាកលេខភ្នំពេញ 2U-8351 ដែលបើកបរដោយបុរសចំណាស់ម្នាក់ ដែលគេ ស្គាល់ ថាជា មន្ត្រីយោធាបើកបរទិសដៅបញ្ច្រាសទិសគ្នារួចក៏បានស៊ីញ៉ូស្តាំប៉ុន្តែបត់ឆ្វេងបំណងចូលផ្ទះសំណាក់ ខាង លើ យ៉ាងលើ ធ្វើឱ្យរថយន្តហ៊ីយ៉ានដាយចាប់ហ្វ្រាំងមិនទាន់ក៏ជ្រុកបុកពេញ ចំពាក់កណ្តាលពេញទំហឹង តែ ម្តងបណ្តាលឱ្យរងការខូចខាតយ៉ាងដំណំ ហើយក្រោយពីកើតហេតុគេបានឃើញមន្ត្រីយោធាម្នាក់នោះចុះពីលើរថយន្តទាំងស្ថានភាពស្រវឹងស្រាផងដែរ ។
បន្ទាប់មកសមត្ថកិច្ចមូលដ្ឋានបានចុះទៅដល់កន្លែងកើតហេតុ និងបានធ្វើការសម្របសម្រួលដល់ភាគីទាំងសងខាង ហើយនៅពេលនោះភាគីខាងរថយន្តហ៊ីយ៉ានដាយ បានព្យាយាមទៅចចាជាមួយភាគី ខាង រថយន្ត ឡិចស៊ីសដែរ ប៉ុន្តែម្ចាស់រថយន្តឡិចស៊ីសRX៣៥០ មិនព្រមនិយាយជាមួយនោះទេ ទើបសមត្ថ កិច្ច មូលដ្ឋានសម្រេច សហការជាមួយសមត្ថកិច្ចជំនាញចុះវាស់វែងយករថយន្តទាំង២គ្រឿងទៅរក្សាទុកនៅ ការិយាល័យ ចរាចរណ៍ជើងគោករាជធានីភ្នំពេញ រង់ចាំដោះស្រាយគ្នានាពេលក្រោយ ៕