ភ្នំពេញ ៖ របាំងថ្មពុះចែកទ្រូងផ្លូវចំនួន២កង់ បានរងការខូចខាត ដោយសារតែបុរសម្នាក់ស្រវឹងស្រា បើករថយន្ត ឡិចស៊ីស អរអិច៣០០ ក្នុងល្បឿនយ៉ាងលឿន បុកពេញទំហឹង កាលពីវេលាម៉ោង១១នឹង៤០នាទីយប់ ថ្ងៃទី១៧ ខែឧសភា ឆ្នាំ២០១៥ តាមបណ្តោយផ្លូវព្រះមុន្នីវង្ស កែងនឹងផ្លូវម៉ៅសេទុង ស្ថិតក្នុងសង្កាត់ទន្លេបាសាក់ ខណ្ឌចំការមន ហើយរថយន្តបានព្យាយាមបើករត់ដល់ចំណុចផ្លូវលេខ៦៣ បានឈប់និងទំនាក់ទំនងទៅរថយន្ត ស្ទូចយកទៅដោយខ្លួនឯង មិនមានសមត្ថកិច្ចមូលដ្ឋានណាដឹងនោះទេ ។
ប្រភពពត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញរថយន្តឡិចស៊ីស អរអិច ៣៣០ ពណ៍ខ្មៅ គ្មានស្លាកលេខ ធ្វើដំណើរតាមបណ្តោយផ្លូវព្រះមុន្នីវង្ស ទិសដៅពីជើងទៅត្បូង ខណះមកដល់ចំណុចកើតហេតុ រថយន្តបានរេចង្កូតជ្រុលទៅបុករបាំងថ្ម ពុះចែកទ្រូងផ្លូវ បាក់អស់ចំនួន២កង់ ហើយរថយន្តបង្ក បានព្យាយាមបើករត់ដល់ចំណុចផ្លូវលេខ៦៣ទើបឈប់ និងទំនាក់ទំនងទៅរថយន្ត ស្ទូចយកទៅដោយខ្លួនឯង មិនមានសមត្ថកិច្ចមូលដ្ឋានណាដឹងនោះទេ ។
សូមបញ្ជាក់ថា នៅក្នុងគ្រោះថ្នាក់ចរាចរណ៍ខាងលើ គឺមិនមានឃើញវត្តមានសមត្ថកិច្ចណាម្នាក់ ចុះមកអន្ត រាគមន៍នៅកន្លែងកើតហេតុ ឬធ្វើការឃាត់រថយន្តដែលបង្កនោះទេ ៕