ភ្នំពេញ៖ យុវជនម្នាក់ត្រូវក្រុមចោរប្លន់ចំនួនពីរនាក់ប្រដាប់ដោយកាំភ្លើងខ្លីមួយដើម បានធ្វើសកម្មភាពភ្ជង់ប្លន់យកម៉ូតូ R-Six មួយគ្រឿង ពណ៌ខ្មៅ ពាក់ស្លាកលេខ ភ្នំពេញ1AH-5911 យកទៅបាត់ដោយសុវត្ថភាពខណៈរូបខ្លួនអង្គុយលេងជាមួយមិត្តស្រីនៅក្នុងកោះពេជ្រ ទល់មុខអាគារG ក្នុងសង្កាត់ទន្លេបាសាក់ ខណ្ឌចំការមន។ ហេតុការណ៍ភ្ជង់ប្លន់ខាងលើនេះកើតឡើងកាលពីវេលាម៉ោង២៣និង២០នាទីយប់ថ្ងៃទី៩ មេសា ឆ្នាំ២០១៤។
ជនរងគ្រោះខាងលើមានឈ្មោះ ដាំ សួគា៍ អាយុ២៨ ឆ្នាំ មុខរបរជាអ្នករកស៊ីទិញនិងលក់ស្រូវ មានស្រុកកំណើតនៅភូមិគីរីថ្មី សង្កាត់អង្គឈ្នួល ខេត្តកណ្តាល។ យោងតាមប្រភពព័ត៌មានពីឈ្មោះ ដាំ សួគា៍ដែលជាជនរងគ្រោះបានឲ្យដឹងថា នៅមុនពេលមានហេតុការណ៍កើតឡើង គឺរូបខ្លួនបានណាត់មិត្ត ស្រីមកអង្គុយលេងនៅក្នុងកោះពេជ្រ ទល់មុខអាគារG តាំងពីម៉ោង២២និង៤០នាទី ខណៈនោះស្រាប់តែប្រទះឃើញជនសង្ស័យពីរនាក់ ជិះម៉ូតូមួយគ្រឿងម៉ាកស្ទេបមិនចាំភិនភាគច្បាស់លាស់ ជិះក្រឡឹងចុះឡើងៗហាក់ដូចជាចង់រកអ្នកណាម្នាក់ លុះដល់វេលាខាងលើជនសង្ស័យទាំងពីរនាក់ បានជិះម៉ូតូចូលមកគៀកហើយ ធ្វើសកម្មភាពភ្ជង់គំរាមយកម៉ូតូពីរជនរងគ្រោះហើយជិះចេញទៅបាត់ដោយសុវត្ថិភាព។
ជនរងគ្រោះបានបន្ថែមថា ក្នុងហេតុការណ៍ភ្ជង់ប្លន់នេះគឺក្រុមចោរមិនត្រឹមតែប្លន់យកម៉ូតូពីខ្លួននោះទេ គឺថែមទាំងប្លន់យកខ្សែកមួយខ្សែ ទូរស័ព្ទដៃ ចំនួន៣គ្រឿង និងកាបូបលុយដែលមានលុយក្នុងនោះប្រមាណជា២០០ដុល្លារផងដែរ។ ហើយបន្ទាប់ពីកើតហេតុជនរងគ្រោះនិងមិត្តស្រីបានទៅធ្វើការដាក់ពាក្យបណ្តឹងនៅប៉ុស្តិ៍រដ្ឋបាលទន្លេបាសាក់ ហើយហៅសាច់ញាតិមកដឹកត្រឡប់ទៅ គេហដ្ឋានវិញទាំងទឹកមុខក្រៀមក្រំនិង សោកស្តាយ ព្រោះខ្លួនស្រលាញ់ម៉ូតូ R-Six ដែលក្រុមចោរប្លន់យកទៅបាត់នោះយ៉ូរមកហើយ ហើយទើបតែពេល នេះមានលុយទិញជិះបានតែមួយអាទិត្រតែប៉ុណ្ណោះ ព្រោះតម្លៃរបស់វារហូតទៅដល់៥ពាន់ដុល្លារស្រាប់តែមានរឿងអកុសលដូចនេះកើតឡើងតែម្តងទៅ៕
