កាលពីវេលាម៉ោង១១និង១៥នាទីព្រឹក ថ្ងៃទី០៦ មិថុនា ឆ្នាំ២០១៥ នារីវ័យក្មេងម្នាក់ បានសម្រេចចិត្តចងកសម្លាប់ខ្លួន ព្រោះតែខឹងនឹងគ្រួសាររបស់ខ្លួន បំបែកបំបាក់ស្នេហាពីមនុស្សដែលខ្លួនស្រឡាញ់ ក្រោមហេតុផលខាងប្រុសក្រីក្រពេក ។ ហេតុការណ៍ភ្ញាក់ផ្អើលនេះ បានកើតឡើងនៅចំណុចភូមិទឹកជ្រាប់ ឃុំពេជចង្វា ស្រុកបរិបូណ៍ ខេត្តកំពង់ឆ្នាំង។សមត្ថកិច្ចបានឲ្យដឹងថា នារីរងគ្រោះមានឈ្មោះ លី សុខ អាយុ១៩ឆ្នាំ ចំណែកខាងប្រុសមានឈ្មោះ ម៉យ ម៉ុច អាយុ២១ឆ្នាំ ទាំង២នាក់ រស់នៅភូមិឃុំជាមួយគ្នា ។ប្រភពពីអ្នកជិតខាង បានឲ្យដឹងថា គូរស្នេហ៍ទាំង២នាក់នេះ មិនទាន់បានភ្ជាប់ពាក្យពេញលេញទេ គឺគ្រាន់តែមានឪពុកម្តាយ និង
ចាស់ទុំខាងប្រុស យកស្លាម្លូចូលចែចូវប៉ុណ្ណោះ ។ប្រភពដដែលបន្តថា លុះមកដល់រយៈពេល២ទៅ៣ថ្ងៃមុននេះ បងប្អូនខាងស្រី ដែលរស់នៅប្រទេសថៃ បានទូរស័ព្ទមកប្រាប់ថា មិនឲ្យ២នាក់នឹងយកគ្នាទេ ព្រោះខាងប្រុសក្រណាស់ គ្មានទ្រព្យសម្បត្តិអ្វីទេ ទើបដំណឹងនេះលេចឮដល់កូនក្រមុំ ហើយកូនក្រមុំ ក៏ទៅប្រាប់កូនកម្លោះទាំងទឹកភ្នែកថា យើងផ្តាច់ពាក្យទៅ ព្រោះយើងគ្មាននិស្ស័យទេ ។ លុះរហូតមកដល់ព្រឹកកើតហេតុ ក្រុមគ្រួសារខាងស្រីឆ្ងល់មិនឃើញកូនស្រី ចុះមកហូបបាយ ក៏នាំគ្នាដើររកមើល ក៏ស្រាប់តែឃើញនារីរងគ្រោះ ចងក នឹងខ្សែនីឡុង នៅនឹងដើមត្រាចក្នុងព្រៃ ចង្ងាយ៣គីឡូម៉ែត្រពីផ្ទះ ស្លាប់បាត់ទៅម្តង ។ក្រោយកើតហេតុ សមត្ថកិច្ចបានចុះដល់កន្លែងកើតហេតុ ហើយបានធ្វើកោសល្យវិច្ច័យ រួចបានប្រគល់សព ឲ្យក្រុមគ្រួសារ យកទៅធ្វើបុណ្យតាមប្រពៃណី ៕
