សៀមរាបៈ មានការភ្ញាក់ផ្អើលមួយ បានបង្ករឲ្យភ្ញៀវទេសចរណ៍ ព្រលឹងចុងសក់ ដោយសារតែរថយន្ត២៥កៅអ៊ី បានឆ្លងចរន្តអគ្គីសនីយ៍ ឆេះសន្ធរសន្ធៅនៅ តាមបណ្តោយផ្លូវជាតិលេខ៦ ត្រង់ចំនុចភូមិរកាកំបុត ឃុំត្រពាំងធំ ស្រុកប្រាសាទបាគង ខេត្តសៀមរាប កាលពីរសៀលម៉ោង ៣.២០នាទី ថ្ងៃទី ៧ ខែ មិថុនា ឆ្នាំ ២០១៥ ដែលត្រូវបានគេស្គាល់ថា ជាក្រុមហ៊ុនដឹកភ្ញៀវទេសចរណ៍ បីឌូ ដឹកភ្ញៀវទេសចរណ៍ ក្នុងខេត្តសៀមរាប។
តាមការឲ្យដឹងពីសមត្ថកិច្ចដែលបានចុះទៅពិនិត្យស្ថានភាពកើតហេតុ បានឲ្យដឹងថា មុនពេលកើតហេតុ រថយន្តទេសចរណ៍ ម៉ាកហ៊ីយ៉ានដាយ ពណ៌ ស បានដឹកភ្ញៀវទេសចរណ៍ ដែលជាជនជាតិចិន ចំនួន ១៨នាក់ ទៅទស្សនារមណីយដ្ឋានធម្មជាតិ ស្ថិតនៅស្រុកស្វាយលើ ក្រោយមកបានធ្វើដំណើរត្រឡប់មកវិញ លុះមដល់កន្លែងកើតហេតុ ស្រាប់តែរថយន្តមានបញ្ហារ ឆ្លងចរន្ត ថែមទាំងមានផ្កាភ្លើង ទើបមានអាការៈមិនស្រួល ក៏បានឲ្យភ្ញៀវទេសចរណ៍ដែលធ្វើដំណើរក្នុងរថយន្ត ចុះមករងចាំខាងក្រៅរថយន្ត ក្រោយមកស្ថានភាពការឆេះនេះកាន់តែធ្ងន់ធ្ងរ ទើបធ្វើឲ្យភ្ញៀវទេសចរណ៍មានការភ័យ តែមិនបណ្តាលឲ្យ មាននណាម្នាក់គ្រោះថ្នាក់ ឬរបួសនោះឡើយ ចំណែករថយន្តត្រូវបាន អគ្គីភ័យលេបត្របាក់ទាំងស្រុងបន្សល់តែគ្រោងឆ្អឹងដែលជារថយន្តកម្មសិទ្ធរបស់ ក្រុមហ៊ុនដឹកភ្ញៀវទេសចរណ៍ បីឌូ ។
លោក អនុសេនីយ៍ឯកសុខ ប៊ុនរ៉ុង នាយផ្នែកសណ្ដាប់ធ្នាប់ចរាចរផ្លូវគោក នៃអធិការដ្ឋាននគរបាលស្រុកប្រាសាទបាគង បានឲ្យដឹងថាករណីឆេះរថយន្តទេសចរណ៍នេះ បានកើតឡើងនៅកណ្តាលវាលស្រឡះ ពីទីប្រជុំជន ទើបមិនបណ្តាលឲ្យមានការឆ្លងឆាបឆេះទៅគេហដ្ឋានរបស់ប្រជាពលរដ្ឋ បើសិនជាកើតហេតុនៅទីប្រជុំជន និងមានផលប៉ះពាល់របស់ប្រជាពលរដ្ឋមិនខាន ដូច្នេះក្នុងនាមលោក ជាសមត្ថកិច្ចក៏សូមំណូមពរ ដល់អ្នកបើកបរយាន្តយន្ត គ្រប់ប្រភេទចូលរួមគោរពច្បាប់ ចរាចរណ៍ផ្លូវគោក បំពាក់នូវគ្រឿងសម្ភារៈបច្ចេកទេសឲ្យបានត្រឹមត្រូវ ដើម្បីបញ្ជ្រាសនូវករណីគ្រោះថ្នាក់ចរាចរណ៍កើតឡើង ជាពិសេសក្រុមហ៊ុនទទួលដឹកភ្ញៀវទេសចរណ៍ និងអ្នកបើកបរ សូមមានការត្រួតពិនិត្យ គ្រឿងយន្តឲ្យបានជាប្រចាំ ជៀសវាងមានករណីគ្រោះថ្នាក់ ឬឆ្លងចរន្តកើឡើង ។
ដោយ ខេង ឧត្តម