សៀមរាបៈ សមត្ថកិច្ចកងរាជអាវុធហត្ថខេត្តសៀមរាប បានចុះបង្ក្រាបផ្ទះទីតាំងស្តុកឈើគ្រញូង ចំនួន២កន្លែង ដែលឈ្មួញដុះស្លែរបានប្រមូលផ្តុំឈើគ្រញូងត្រៀមដឹកទៅខេត្តកំពង់ចាម តែត្រូវបានដឹកនាំការបង្ក្រាបដោយលោក សុខ កែវបណ្ឌិត ព្រះរាជអាជ្ញារងអមសាលាដំបូង ខេត្តសៀមរាប និងលោក វរៈសេនីយ៍ឯក ស្រី យូរ៉ា ចុះបង្ក្រាបនៅចំនុចភូមិ ព្នៅ ឃុំសសរស្ដម្ភ ស្រុកពួក ខេត្តសៀមរាប នៅវេលាម៉ោង៤រសៀលថ្ងៃទី៧ ខែមិថុនា ឆ្នាំ២០១៥។
កិច្ចសហការបង្ក្រាបនេះ សមត្ថកិច្ចបានឃាត់រថយន្តចំនួន២គ្រឿង ដែលធ្វើសកម្មភាពដឹកជញ្ជូនឈើគ្រញូង ដែលជាប្រភេទរថយន្តកាម៉ារី ពណ៌ស្លែរ ពាក់ស្លាកលេខ 2w-4065 មានឈើគ្រញូង ២៩ដុំ និងមួយគ្រឿងទៀត ពណ៌ស្លែរដូចគ្នា ពាក់ស្លាកលេខ សៀមរាប 2A-7179 ព្រមទាំងបានដកហូតបានឈើគ្រញូងចំនួន ២តោនបន្ថែម ទៀតក្នុងរយះពេល២ថ្ងៃ ដែលត្រូវបានគេស្គាល់ ម្ចាស់ឈើគ្រញូងឈ្មោះ ឆេត ភេទ ប្រុស និងលោក ឈិត និងលោក ឃុន ជាអ្នករកស៊ីឈើគ្រញូងដុះស្លែប្រចាំខេត្តសៀមរាប ។
តាមឲ្យដឹងពីប្រភពពត៌មាន នៅកន្លែងកើតហេតុ បានឲ្យដឹងថា ឈើគ្រញូងដែលលោកបានទិញយកមកស្តុបទុក នេះគឺត្រូវបានដឹកតាមរថយន្តសេរីទំនើប និងរថយន្តកាម៉ារី ឆ្ពោះទៅខេត្តកំពង់ចាម តាមបណ្តោយផ្លូវជាតិលេខ៦ ហើយត្រូវបានបង់ជូនសមត្ថកិច្ចខេត្តសៀមរាប និងខេត្តកំពង់ធំ អស់ហើយ ពុំដែលមានចន្លោះប្រហោងនោះទេ ហើយពុំដែលរំលងម្តងណាឡើយ តែការដែលសមត្ថកិច្ចចុះមកបង្ក្រាបនេះ សង្ស័យមានអ្នកច្រណែន និងកាច់កុង គ្នាហើយមានចេតនាឲ្យគេចុះបង្ក្រាបទីតាំងនេះតែម្តង។
ដោយ ខេង ឧត្តម និង ពូន ប៉េង 
