បន្ទាយមានជ័យ : ដើម្បីប្រមូលចែករំលែកព័ត៍មានបញ្ហាប្រឈម និងរកដំណោះស្រាយសម្រាប់អនុវត្តបន្តពាក់ព័ន្ធនិងការងារបញ្ជ្រាបយេនឌ័រ និងបង្កើតភាពអង់អាចដល់ស្ត្រី មន្ទីកិច្ចការនារីខេត្តបន្ទាយមានជ័យបានបើកអង្គប្រជុំពិភាក្សាមួយ ដោយមានការចូលរួមពីសំណាក់លោក សួន បវរ អភិបាលរងខេត្តបន្ទាយមានជ័យ និងអភិបាល អភិបាលរងស្រុក ក្រុង ប្រធាន អនុប្រធានមន្ទីរពាក់ព័ន្ធនានាជុំវិញខេត្ត ។
អង្គប្រជុំនេះធ្វើឡើងកាលពីព្រឹកថ្ងៃទី៨ មិថុនា ២០១៥ នៅសាលប្រជុំសាលាខេត្តបន្ទាយមានជ័យ ដោយមានសមាជិកចូលរួមសរុប ៦៨នាក់ ។
លោកស្រី ម៉េង គឹមហួយ ប្រធានមន្ទីរកិច្ចការនារីខេត្តបន្ទាយមានជ័យបានលើកឡើងក្នុងកិច្ចប្រជុំខាងលើថា នេះជាលើកទី១ ហើយដែលមន្ទីកិច្ចការនារីខេត្តបន្ទាយមានជ័យ មានឱកាសបានប្រជុំប្រមូល និងចែករំលែកនូវបញ្ហាប្រឈមនានាពាក់ព័ន្ធការងារបញ្ជ្រាបយេនឌ័រ និងបង្កើនភាពអង់អាចដល់ស្ត្រី ជាពិសេសពង្រឹងបណ្តាញការងាររបស់ស្ត្រី យុវវ័យ និងកុមារ តាមមន្ទីរ ស្ថាប័ន ស្រុក ក្រុង និងអង្គការពាក់ព័ន្ធ ។ លោកស្រីបន្តថា សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិឆ្នាំ២០១៥ នៅខេត្តបន្ទាយមានជ័យ ថវិកាសរុបមានចំនួន ៥៤២៧ដុល្លា ដោយអនុវត្តលើសកម្មភាពចំនួន៥ គឺ ១. រៀបចំកិច្ចប្រជុំបណ្តាញជាមួយមន្ទីរ ស្ថាប័ន និងអង្គការ ២. រៀបចំសិក្ខាសាលាសមាជិកក្រុមប្រឹក្សា អភិបាលនារី ៣. រៀបចំប្រជុំវេទិការជាមួយគណ:កម្មាធិការពិគ្រោះយោបល់កិច្ចការស្ត្រី និងកុមា ថ្នាក់ឃុំ ៤. រៀបចំកិច្ចប្រជុំជាមួយការិយាល័យពាក់ព័ន្ធជុំវិញស្រុកក្រុង ៥. ចុះបេសកកម្មត្រួតពិនិត្យជំរុញការងារបញ្ជ្រាបយេនឌ័រ ។
លោក សួន បវរ អភិបាលខេត្តបន្ទាយមានជ័យបានមានមតិចូលរួមក្នុងកិច្ចប្រជុំខាងលើថា បច្ចុប្បន្នស្ត្រីគឺជាធនធានមនុស្សមួយសំខាន់សម្រាប់សង្គមយើង ដូចនេះការលើកស្ទួយស្ត្រីក៏ជាកិច្ចការមួយដែលយើងទាំងអស់គ្នាត្រូវអនុវត្ត អោយខានតែបាន ៕