សៀមរាប ៖ លោកវរៈសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ចខេត្តសៀមរាប បាន សហការជាមួយ មន្ទីរសុខាភិបាលខេត្តសៀមរាប ចុះសួរនាំទីតាំងបើកធ្វើអជីវកម្មពិនិត្យឈាម និងចាក់វ៉ាក់សាំង បង្ការជំងឺគ្រប់មុខ ដោយលបលួចបើកធ្វើអជីវកម្មដោយពុំមានច្បាប់អនុញ្ញាតិ ត្រូវបានបញ្ជាផ្ទាល់ពីលោកកើត សុវណ្ណរ៉េត ព្រះរាជអាជ្ញាអមសាលាដំបូងខេត្តសៀមរាប ឲ្យធ្វើការផ្អាកទទួលបំរើសេវាកម្មពិនិត្យឈាម ចាប់តាំងពីថ្ងៃទី ៨ ខែ មិថុនា ឆ្នាំ ២០១៥។
តាមឲ្យដឹងពីសមត្ថកិច្ចបានឲ្យដឹងថា ម្ចាស់អជីកម្មមានឈ្មោះ សោ ច័ន្ទលី កើតនៅថ្ងៃទី ១២ ខែ មេសា ឆ្នាំ ២០១៥ មានសមត្ថភាពគ្រប់គ្រាន់ ក្នុងការ ទទួលសញ្ញាប័ត្រអ្នកបច្ចេកទេសមន្ទីរពិសោធន៍មធ្យម ហើយបានបើក កន្លែងពិនិត្យឈាម និងទទួលចាក់វ៉ាក់សាំងគ្រប់មុខ ដោយគ្មានច្បាប់អនុញ្ញាតិ នៅទល់មុខមន្ទីរពេទ្យបង្អែកខេត្តសៀមរាប ស្ថិតនៅផ្ទះលេខ ១០០ ភូមិមណ្ឌល១ ក្រុមទី៣ សង្កាត់ស្វាយដង្គម ក្រុងសៀមរាប ខេត្តសៀមរាប ដោយលិខិតអនុញ្ញាតិច្បាប់របស់ លោក សោ ច័ន្ទលី បានផុតសុពលភាពតាំងពីឆ្នាំ ២០០៧មកម្លេះ ហើយម្ចាស់ អជីវកម្មនេះពុំព្រមបន្តច្បាប់អនុញ្ញាតទៀតទេ បែរជាលួចបើកបំរើសេវាកម្មជិត១០ឆ្នាំ ។
លោកវរៈសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ចខេត្តសៀមរាប បានឲ្យដឹងថា ដោយយោងតាមពិនិត្យជាក់ស្តែងគឺលោក សោ ច័ន្ទលី បានបើកបំរើសេវាកម្ម ត្រួតពិនិត្យឈាម និងចាក់វ៉ាក់ សាំងការពារជំងឺគ្រប់មុខនេះ គឺបច្ចុប្បន្នពុំមានលិខិតអនុញ្ញាតិត្រឹមត្រូវនោះទេ ទើបយោងតាមបទបញ្ជារបស់ ព្រះរាជអាជ្ញា បានសម្រេចឲ្យមានការផ្អាកបណ្តោះអាសន្ន លុះត្រាតែទទួលបានលិខិតអនុញ្ញាតិត្រឹមត្រូវទើប បានអនុញ្ញាតិទទួលសេវាកម្មបន្តទៀត។
ចំណែកអ្នកស្រី ត្រូវជាប្រពន្ឋរបស់លោក សោ ច័ន្ទលី បានឲ្យដឹងថា ឲ្យគាត់ធ្វើយ៉ាងម៉េច បើគាត់តែងតែទៅសុំ ដល់ទៅក្រសួងសុខាភិបាល និងមន្ទីរសុខាភិបាលខេត្តសៀមរាប តែគេពុំព្រមចេញនិងបន្តអាជ្ញាប័ណ្ណឲ្យសោះ ដោយអ្នកនេះឆ្លើយដាក់អ្នកនោះ ហើយនៅពេលនេះបែរជាចុះមកបិទអាជីវកម្មរបស់គាត់មិនឲ្យគាត់រកស៊ីទៀត ហើយអ្នកណាជាអ្នកទទួលខុសត្រូវចិញ្ចឹមគ្រួសាររបស់អ្នកស្រី ដូច្នេះគាត់បានសុំឲ្យសម្តេចជួយផ្តល់អាញ្ញាប័ណ្ណ ប្រកបមុខរបរជូនគាត់ផង ។
ដោយ ប៊ុន រដ្ឋា
