កំពង់ឆ្នាំង៖សមិទ្ធិផលមួយចំនួនរួមមាន សាលាធម្មសភាមួយខ្នង ស្រះទឹកធំមួយកន្លែង ដងទង់មួយគូរនិងបន្ទប់ទឹកបង្គន់អានាម័យរបស់វត្តត្រពាំងធម៌ស្ថិតនៅក្នុងភូមិក្រឡាញ់ ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង បានចំណាយបច្ច័យកសាងអស់ចំនួន ១៥៣.៨៩៤ម៉ឺនដុល្លា ត្រូវបានសម្ភោធដាក់អោយប្រើប្រាស់ជាផ្លូវការ នៅព្រឹកថ្ងៃទី០៨ ខែមិថុនា ឆ្នាំ២០១៥ ក្រោមអធិបតីភាព សម្តេចជហ្វាវាំង គង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង ដែលមានមន្ត្រីរាជការជុំវិញនិងប្រជាពល រដ្ឋចំនួន៦១០នាក់បានចូលរួមផងដែរ។
ឯកឧត្តម ឈូរ ច័ន្ទឌឿន អភិបាលខេត្តកំពង់ឆ្នាំងបានថ្លែងក្នុងពិធីសម្ភោធខាងលើនេះអោយដឹងថា៖នៅក្នុងខេត្តកំពង់ឆ្នាំង វត្តព្រះពុទ្ធសាសនាមានចំនួន២០៧វត្ត អាស្រមមាន២១កន្លែង ព្រះសង្ឃសរុបមានចំនួន២២៥១អង្គ អាចារ្យមានចំនួន៦១០នាក់។ឥស្លាមសាសនាមានព្រះវិហារ ៥៧កន្លែង ស៊ូរ៉ាវ ៣៧កន្លែង គ្រឺះសាសនាមានវិហារ ៨២កន្លែង និងស្នាក់ការថ្វាយបង្គំ ២៤កន្លែង។ដោយឡែកស្រុកកំពង់ត្រ ឡាចមានវត្តព្រះពុទ្ធសាសនា ២៩កន្លែង និងវិហារឥស្លាមមាន៣៣កន្លែង។
វត្តត្រពាំងធម៌វិបស្សនាធុរៈ ខាងលើនេះត្រូវបានកសាងឡើងនៅឆ្នាំ១៩៤១ ប៉ុន្តែនៅក្នុងរបប ប៉ុល ពត ត្រូវបានបំផ្លាញខ្ទេចខ្ទីទាំងអស់។នៅក្រោយថ្ងៃរំដោះ៧មករាឆ្នាំ១៩៧៩ក្រោមការដឹកនាំរបស់សម្តេចទាំង៣ សមិទិ្ធផលនៅក្នុងវត្តត្រពាំងធម៌ត្រូវបានកសាងឡើងវិញជាបន្តបន្ទាប។ជាក់ស្តែងសមិទ្ធិផលដែលត្រូវសម្ភោធដាក់អោយប្រើប្រាស់ក្នុងពេលនេះមាន៖ សាលាធម្មសភា ស្រះទឹក ដងទង់ បន្ទប់ទឹក និងសមិទ្ធិផលមួយចំនួនទៀត ដែលចំណាយថវិការសរុបចំនួន ១៥៣.៨៩៤ដុល្លា។អ្នកចូលរួមកសាងមាន លោក ធីវ ម៉េត លោក គង្គ ឃាង និងលោកជំទាវ តុង ណារី ឯកឧត្តម សៅ សុខា និងលោកជំទាវ លោ
កវេជ្ជបណ្ឌិត វ៉េន តិចឡា និងលោកស្រី លី ពៅ ឧបាសក ង៉ូវ ណាន និងឧបាសិកា នុត ឡា រួមជាមួយសប្បុរសជន ក្នុង និងក្រៅស្រុក អាជ្ញាធរដែនដី និងពុទ្ធបរិស័ទចំណុះជើងវត្ត ក្រោយការដឹកនាំរបស់ព្រះចៅអធិការ សំ ប៊ុនធឿន សាំង អ៊ីម និងក្រោមការជួយឧបត្ថម្ភ របស់សម្តេច ហ៊ុន សែន សម្តេចគតិព្រឹទ្ធបណ្ឌិត សម្តេចជហ្វាវាំង គង់ សំអុល និងលោកជំទាវ ព្រមទាំងថ្នាក់ដឹកនាំគណបក្សប្រជាជនកម្ពុជាមួយចំនួនទៀត។
នៅក្នុងពិធីសម្ភោធសមិទ្ធិផលនេះសម្តេចជហ្វាវាំង គង់ សំអុល បានចូលបច្ច័យប្រគេនព្រះសង្ឃវត្តត្រពាំងធម៌ចំនួន១.០០០ដុល្លា ( ជាបច្ច័យរបស់ព្រះមហាក្សត្រ ព្រះនរោត្តម សីហមុនី ) និងប្រគេនបច្ច័យ និងទ័យទានដល់ព្រះសង្ឃចំនួន ៣០អង្គ ដែលបាននិមន្តចូលរួមក្នុងពិធីបុណ្យខាងលើនេះផងដែរ។ដោយឡែកយុវជនកាកបាទក្រហម យុជនគណបក្សប្រជាជន យុវជនកាយរិទ្ធដែលបានចូលរួមក៏បានទទួលអំណោយជាថវិកាមួយចំនួនផងដែរ។
ចំណែកប្រជាពលរដ្ឋចូលរួមប្រមាណជាង៤០០នាក់ ក៏ត្រូវបានលោក គង្គ ឃាង ជាអនុប្រធានមន្ទីរសាធារណៈខេត្ត និងលោកជំទាវ តុង ណារី ជាសមាជិកក្រុមប្រឹក្សាខេត្ត ដែលជាផ្តើមធ្វើបុណ្យឆ្លងសមិទ្ធិផលនានាក្នុងវត្តត្រពាំងធម៌ ក៏បានចែកថវិកាជាអំណោយគ្រប់ៗគ្នាផងដែរ៕