ជនជាតិបរទេស២នាក់ប្តីប្រពន្ឋ ជិះម៉ូតូឌុបគ្នាដើរលេង ត្រូវជនសង្ស័យ២នាក់ ជិះម៉ូតូមកជិតរួចបានធ្វើសកម្មភាពឆក់ទូរស័ព្ទពួកគេបានសម្រេច ហើយជិះគេចខ្លួនបាត់ដោយសុវត្ថិភាពមិនរំខានដល់សមត្ថកិច្ច ។ ហេតុការណ៍នេះបានកើតឡើង កាលពីវេលាម៉ោង១១នឹង៤០នាទីយប់ថ្ងៃទី៨ ខែមិថុនា ឆ្នាំ២០១៥ នៅចំណុចមុខវត្តមហាមន្ត្រី ជាប់របងខាងត្បូងពហុកីឡដ្ឋានជាតិ តាមបណ្តោយផ្លូវព្រះសីហនុ ស្ថិតក្នុងសង្កាត់វាលវង់ ខណ្ឌ៧មករា ។សាក្សីជាអ្នកលក់មីឆា ដែលបានឃើញហេតុការណ៍បានឱ្យដឹងថា មុនពេលកើតហេតុ គេបានឃើញ ជនជាតិបរទេស២នាក់ប្តីប្រពន្ឋ ជិះម៉ូតូម៉ាកSUZUKI Hayateពណ៍ខ្មៅ មួយគ្រឿង ពាក់ស្លាកលេខ សៀមរាប 1J-4707 ជិះឌុបគ្នាតាមបណ្តោយផ្លូវព្រះសីហនុ ទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានជនសង្ស័យ២នាក់ ជិះម៉ូតូមិនចាំម៉ាក មកអែបក្បែរនិងបានធ្វើសកម្មភាណឆក់ទូរស័ព្ទដៃ ពីជនជាតិបរទេស ដែលត្រូវជាប្រពន្ឋដែលជិះពីក្រោយ កំពុងតែកាន់ទូរស័ព្ទនៅក្នុងដៃ រួចជិះគេចខ្លួនបាត់ដោយសុវត្ថិភាព មិនរំខានដល់សមត្ថកិច្ចទាល់តែសោះ ។បើតាមសម្តីជនរងគ្រោះជាប្តី បានឱ្យដឹងថា ពួកគេ២នាក់ប្តីប្រពន្ឋ គឺជាជនជាតិអាមេរិចកាំង ទើបតែមកលេងប្រទេសកម្ពុជា១សប្តាហ៍តែប៉ុណ្ណោះ ដោយបានឌុបគ្នាដើរលេង លុះមកដល់ចំណុចកើតហេតុ ក៏ស្រាប់តែមានជនសង្ស័យ២នាក់ ជិះម៉ូតូឆក់ទូរស័ព្ទដៃ ម៉ាក ASUS Fone6 ពីប្រពន្ឋរបស់ខ្លួន ដែលជិះពីក្រោយតែម្តងទៅ ។
បន្តិចក្រោយមកមានសមត្ថកិច្ចជាច្រើននាក់ កំពុងជិះល្បាតបានឃើញហេតុការណ៍ភ្ញាក់ផ្អើលនេះ រួចបានឌុបជនរងគ្រោះទៅបុស្តិ៍ ដើម្បីធ្វើការសួរនាំ និងដាក់ពាក្យបណ្តឹង ប៉ុន្តែពេលទៅដល់បុស្តិ៍ន គរបាលរដ្ឋវាលវង់ ជនរងគ្រោះ២នាក់ប្តីប្រពន្ឋ បែរជាមិនដាក់ពាក្យបណ្តឹងទៅវិញ គ្រាន់តែចង់ឱ្យសមត្ថកិច្ច រកទូរស័ព្ទរបស់ខ្លួនវិញតែប៉ុណ្ណោះ បន្ទាប់មកពួកគេបានជិះម៉ូតូ ទៅកន្លែងខ្លួនស្នាក់នៅវិញតែម្តង ៕